ព័ត៌មានអន្ដរជាតិ

រុស្ស៊ី ព្រមានហ៊ានប្រើគ្រប់មធ្យោបាយ នៅក្នុងសង្គ្រាមជាមួយអ៊ុយក្រែន

បានផុស

២ years មុន

នៅ

ថ្ងៃសុក្រ ៦ ធ្នូ ២០២៤

ដោយ

Chheang

រដ្ឋមន្ត្រីការបរទេសរុស្ស៊ី លោក Sergey Lavrov បានប្រាប់ថា សម្ព័ន្ធមិត្តរបស់អ៊ុយក្រែន ត្រូវស្វែងយល់ឲ្យច្បាស់លាស់ អំពីការប្រើប្រាស់មីស៊ីលល្បឿនលឿនជាងសំឡេងរបស់ក្រុងមូស្គូ នៅក្នុងសង្គ្រាមកាលពីពេលថ្មីៗកន្លងទៅ ហើយព្រមានថា រុស្ស៊ីបានត្រៀមខ្លួនរួចជាស្រេច ក្នុងការប្រើប្រាស់ «គ្រប់មធ្យោបាយទាំងអស់» ដើម្បីការពារខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Lavrov បាននិយាយនៅក្នុងបទសម្ភាសន៍មួយកាលពីថ្ងៃព្រហស្បតិ៍ជាមួយបុគ្គលិកប្រព័ន្ធផ្សព្វផ្សាយអាមេរិកថា សហរដ្ឋអាមេរិក និងសម្ព័ន្ធមិត្តរបស់ខ្លួន «ត្រូវតែយល់ថា យើងនឹងត្រៀមខ្លួនជាស្រេចក្នុងការប្រើប្រាស់គ្រប់មធ្យោបាយទាំងអស់ មិនអនុញ្ញាតឲ្យពួកគេទទួលបានជោគជ័យក្នុងអ្វីដែលពួកគេហៅថាការបរាជ័យជាយុទ្ធសាស្ត្ររបស់រុស្ស៊ីនោះទេ»។

កាលពីពីរសប្តាហ៍មុន រុស្ស៊ីបានបាញ់មីស៊ីលល្បឿនលឿនជាងសំឡេង Oreshnik ថ្មីរបស់ខ្លួនទៅលើទីក្រុង Dnipro របស់អ៊ុយក្រែន ដែលជាការកើនឡើងកម្ដៅនៃសង្រ្គាមដែលមានអាយុកាលជិតបីឆ្នាំ។

ចាប់ពីពេលនោះមក ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានគំរាមប្រើអាវុធថ្មីលើទីក្រុងកៀវ ដើម្បីជាការឆ្លើយតបការដែលអាមេរិកបើកដៃឲ្យអ៊ុយក្រែនប្រើប្រាស់ប្រព័ន្ធមីស៊ីល ATACMS រយៈចម្ងាយឆ្ងាយរបស់ខ្លួន វាយប្រហារចូលជ្រៅក្នុងទឹកដីរុស្ស៊ី។

លោក Lavrov បានប្រាប់ថា៖ «យើងកំពុងបញ្ជូនសញ្ញា ហើយយើងសង្ឃឹមថា សញ្ញាចុងក្រោយកាលពីប៉ុន្មានសប្តាហ៍មុន សញ្ញាជាមួយនឹងប្រព័ន្ធអាវុធថ្មីហៅថា Oreshnik ត្រូវបានគេយកចិត្តទុកដាក់យ៉ាងខ្លាំង»។

លោក ពូទីន បាននិយាយថា មីស៊ីល Oreshnik ហោះក្នុងល្បឿនលឿនជាងសំឡេង ១០ដង ហើយមិនអាចស្ទាក់ចាប់បានដោយប្រព័ន្ធការពារដែនអាកាសឡើយ។

ប្រធានាធិបតីអ៊ុយក្រែនលោក Volodymyr Zelensky បានហៅការវាយប្រហារនេះថាជា «ការប្រយុទ្ធចុងក្រោយបំផុតនៃភាពឆ្កួតលីលារបស់រុស្ស៊ី» និងបានអំពាវនាវសម្ព័ន្ធមិត្តឲ្យផ្ដល់ប្រព័ន្ធការពារដែនអាកាសដែលទំនើប ដើម្បីឆ្លើយតបនឹងការគំរាមកំហែងថ្មីនេះ៕

ដោយ៖ ឈាង