មន្ត្រីអប់រំ៖ ការបោះជំរំនឹងជួយឲ្យយុវជនទទួលបាននូវការអភិវឌ្ឍសមត្ថភាព និងបំណិនផ្នែកបច្ចេកវិទ្យាព័ត៌មានឌីជីថល

មន្ត្រីក្រសួងអប់រំយុវជននិងកីឡា បានលើកឡើងថា ការបោះជំរំនឹងជួយឱ្យយុវជនទទួលបាននូវការអភិវឌ្ឍសមត្ថភាព និងបំណិនផ្នែកបច្ចេកវិទ្យាព័ត៌មានឌីជីថល និងការបង្កើតគំនិតថ្មីៗ ពិសេស ស្វែងយល់ពីដំណើរស្វែងរក «សន្តិភាព»
ដែលមានតម្លៃមិនអាចគណនាបានជូនជាតិមាតុភូមិ។

នៅក្នុងពិធីបើកការបោះជំរំយុវជនជាសកលលើកទី១០ ក្រោមប្រធាន “យុវជន និងមរតកសន្តិភាព៖ ទស្សនាសៀមរាប
ឆ្នាំ២០២៤” កាលពីថ្ងៃទី១៧ធ្នូ នៅខេត្តសៀមរាប លោក រស់ ភារៈ តំណាងគណៈកម្មការរៀបចំកម្មវិធីមានប្រសាសន៍ថា តាមរយៈការចូលរួមក្នុងការបោះជំរំនាពេលនេះ យុវជនក៏មានឱកាសភ្ជាប់បណ្តាញទំនាក់ទំនងស្មារតីសហគ្រិនភាព ភាពជាអ្នកដឹកនាំចូលរួមលើកស្ទួយផ្សព្វផ្សាយវិស័យទេសចរណ៍ វប្បធម៌ ពង្រឹងកាយសម្បទាស្មារតីមនុស្សធម៌ ចរិយាធម៌ សុខភាពផ្លូវចិត្តយល់ពីហានិភ័យនៃការប្រើប្រាស់ហិរញ្ញវត្ថុដោយមិនមានមូលដ្ឋានច្បាស់លាស់ផងដែរ។

លោកស្រី ទេព ស៊ីណាត អគ្គនាយករងនៃអគ្គនាយកដ្ឋានយុវជន នៃក្រសួងអប់រំយុវជន និងកីឡា បានកោតសរសើរ ចំពោះការខិតខំប្រឹងប្រែង របស់ថ្នាក់ដឹកនាំ ក្រុមការងារ អគ្គនាយកដ្ឋានយុវជន និងយុវជន ស្ម័គ្រចិត្តចំពោះការរៀបចំកម្មវិធីប្រកបដោយគុណតម្លៃនេះ និងរៀបចំតុបតែងជំរំក៏ដូចជាម្ហូបអាហារដ៏មានឱជារស។ លោកស្រីបានន្ថែមទៀតថា « សូមឱ្យការបោះជំរំ របស់យើងក្លាយជាឱកាសនៃការបង្កើតទំនាក់ទំនង បំផុស ជំរុញ និងលើកទឹកចិត្ត។ នៅពេលដែលប្អូនៗត្រឡប់ទៅវិញ ខ្ញុំសង្ឃឹមថា ប្អូនៗនឹងនាំយកទៅជាមួយមិនគ្រាន់តែអនុស្សាវរីយ៍ល្អៗ ថែមទាំងស្មារតីទទួលខុសត្រូវថ្មីមួយ គឺបេសកកម្មកសាងសង្គមមួយដែលធ្វើឱ្យសន្តិភាពមិនមែនត្រឹមតែជាក្តីសុបិនប៉ុណ្ណោះទេ គឺជាសន្តិភាពដែល មានពិតតាមរយៈ សកម្មភាពរបស់ប្អូនៗផ្ទាល់»៕

អត្ថបទ៖ សំអឿន