ទីក្រុងហូជីមិញ កំណត់​គោលដៅ​ប្រើ​រថយន្តក្រុងអគ្គិសនី ១០០% នៅឆ្នាំ២០៣០

ទីក្រុងហូជីមិញ​នៃ​ប្រទេស​វៀតណាម គ្រោងនឹងផ្លាស់ប្តូរបណ្តាញរថយន្តក្រុងសាធារណៈទាំ​ង​អស់​របស់ខ្លួនទៅជារថយន្តថាមពលអគ្គិសនី និងបៃតងនៅឆ្នាំ​២០៣០ ហើយ​ចាប់​ផ្ដើម​​​បង្កើត​ផ្លូវរថយន្តក្រុងអគ្គិសនីថ្មីនៅឆ្នាំ២០២៥។

គំនិតផ្តួចផ្តើមនេះ ស្នើឡើងដោយគណៈកម្មាធិការប្រជាជនទីក្រុងហូជីមិញ ស្របតាមការផ្លាស់ប្តូរថាមពលបៃតងជាតិ និងគោលដៅកាត់បន្ថយការបំភាយឧស្ម័ន។

ក្រុម​រថយន្តក្រុងបច្ចុប្បន្នរបស់​​ហូជីមិញ មានរថយន្តជាង ២ ២០០​គ្រឿង ក្នុង​នោះ​មាន​ ៥៥០​គ្រឿងដែលដំណើរការដោយអគ្គិសនី ឬឧស្ម័នធម្មជាតិ (CNG)។ រថយន្តក្រុងម៉ាស៊ូតដែលមានអាយុលើសពី​១៥​ឆ្នាំ នឹងត្រូវជំនួសដោយរថយន្តថាមពលអគ្គិសនី ឬថាមពលបៃតងនៅចន្លោះឆ្នាំ​២០២៥ និង​២០២៩។ នៅឆ្នាំ២០៣០ ផ្លូវទាំងអស់នឹងមាន​តែ​ការ​ប្រើប្រាស់រថយន្តថាមពលអគ្គិសនី ឬថាមពល​បៃតង។

ដើម្បីគាំទ្រដល់ការផ្លាស់ប្តូរ ទីក្រុង​ហូជីមិញ នឹងសាងសង់ស្ថានីយសាកថ្មនៅតាមដេប៉ូ និងចំណតរថយន្ត ដោយ​ផ្តល់ប្រាក់កម្ចីការប្រាក់ទាបសម្រាប់ការទិញរថយន្តក្រុងអគ្គិសនី និងផ្តល់ការឧបត្ថម្ភធនសម្រាប់ស្ថានីយ៍សាកថ្ម និងការវិនិយោគហេដ្ឋារចនាសម្ព័ន្ធ CNG៕

ដោយ៖ ឈាង