ភ្ញៀវទេសចរជាតិ និងអន្តរជាតិជាង៣ម៉ឺននាក់ បានទៅឆ្លងឆ្នាំ និងស្រាយទុក្ខកង្វល់ចេញពីខ្លួននៅក្នុងខេត្តមណ្ឌលគិរី

ក្នុងរយៈពេល៣ថ្ងៃនៃឱកាសឆ្លងឆ្នាំចាស់ ចូលឆ្នាំថ្មី២០២៥ ភ្ញៀវទេសចរជាតិ និងអន្តរជាតិចំនួន៣១ ០៣០ នាក់ កើនឡើង២០,៦៨% បានទៅលេងកម្សាន្ត បំបាត់ទុក្ខកង្វល់ និងអបអរសាទរឆ្លងឆ្នាំចាស់ចូលឆ្នាំថ្មី២០២៥ នៅក្នុងខេត្តមណ្ឌលគិរី។ ក្នុងនោះ ភ្ញៀវទេសចរជាតិមានចំនួន៣០ ៧៦៩នាក់ កើនឡើង២០,៧៦% ភ្ញៀវទេសចរអន្តរជាតិមានចំនួន២៦១នាក់ កើនឡើង១២,០១%។ នេះបើយោងតាមរបាយការណ៍របស់មន្ទីរទេសចរណ៍ ខេត្តមណ្ឌលគិរី។

ភ្ញៀវទេសចរជាតិ និងអន្តរជាតិ ជាង៣ម៉ឺននាក់នេះ បានធ្វើដំណើរកម្សាន្តតាមរមណីដ្ឋាននានានៅក្នុងខេត្តមណ្ឌលគិរីយ៉ាងច្រើកុះករ ជាពិសេស រមណីដ្ឋានធំៗ មានជាអាទិ៍ រមណីដ្ឋានទឹកជ្រោះប៊ូស្រាដែលមានភ្ញៀវសម្រុកមកកម្សាន្តច្រើន ព្រោះរដូវនេះ ទឹកហូរធ្លាក់ច្រោះពេញ ស្រស់ស្អាតគួជាទីចាប់ចិត្តសម្រាប់ភ្ញៀវទស្សនាកម្សាន្ត។ ក្រៅពីនេះ ភ្ញៀវទេសចរ ក៏បានទៅលេងកម្សាន្តនៅភ្នំថ្មណាមលៀរ ដែលជាភ្នំថ្មដ៏ធំមហិមាប្រចាំខេត្តមណ្ឌលគិរី បើទោះបីជាផ្លូវធ្វើដំណើរឆ្ងាយជាងរមណីដ្ឋានទឹកជ្រោះប៊ូស្រាក៏ដោយ ក៏ភ្ញៀវទេសចរ នៅតែទៅយ៉ាងច្រើនសន្ធឹកសន្ធាប់។ នៅទីនោះ ភ្ញៀវទេសចរ បានឡើងលើកំពូលភ្នំមើលទេសភាពព្រៃធម្មជាតិដ៏ធំល្វឹងល្វើយ។ បន្ថែមលើនេះ ភ្ញៀវវទេសចរ ក៏បានធ្វើដំណើកម្សាន្តទៅតាមរមណីដ្ឋានផ្សេងទៀតនៅទូទាំងខេត្តមណ្ឌលគិរីផងដែរ។

ក្នុងការធ្វើដំណើរកម្សាន្តមកកាន់ខេត្តមណ្ឌលគិរីនាឱកាសឆ្លងឆ្នាំសកលនេះ ភ្ញៀវទេសចរជាច្រើនបានបង្ហាញចំណាប់អារម្មណ៍រំភើបរីករាយដែលពួកគេបានមកដល់ខេត្តភូមិភាគឦសានមួយនេះ ហើយបានឃើញទិដ្ឋភាពជាក់ស្ដែងនៅតាមរមណីយដ្ឋាន ក៏ដូចជា ស្រូបខ្យល់អាកាសដ៏បរិសុទ្ធ ចំពេលដែលធាតុអាកាសចុះត្រជាក់ គួរជាទីចាប់ចិត្តសម្រាប់ដំណើកម្សាន្ត។ ភ្ញៀវទេសចរបានសរសើមិនដាច់ពីមាត់ថា ពួកគេបានមកលេងខេត្តមណ្ឌលគិរីពិតជាមានអារម្មណ៍ស្រស់ស្រាយ ស្រាយអស់ទុក្ខកង្វល់ក្នុងឆ្នាំចាស់ ពេលបានមកឃើញទិដ្ឋភាពទាំងមូលនៃខេត្តមណ្ឌលគិរី ដែលមានភាពស្រស់ស្អាតលើសពីការរំពឹងទុក។

ភ្ញៀវទេសចរជក់ចិត្តដិតដាននឹងទិដ្ឋភាពដ៏ស្រស់ត្រកាលនៃខេត្តមណ្ឌលគិរី ដូចជា ទិដ្ឋភាពភ្នំតូចធំទាបខ្ពស់រំលេចដោយស្មៅពណ៌មាស ហើយពួកគេពិតជារំភើបរីករាយនឹងសម្បត្តិធម្មជាតិទាំងអស់នេះ យកអ្វីមកប្រៀបផ្ទឹមពុំបានឡើយ។ លើសពីនេះទៀត ខេត្តមណ្ឌលគិរី មានហេដ្ឋារចនាសម្ព័ន្ធក្នុងខេត្ត ផ្លូវងាយស្រួលក្នុងការធ្វើដំណើរទៅរមណីដ្ឋាននានា បើទោះបីផ្លូវធ្វើដំណើរជិតទៅដល់រមណីយដ្ឋានមួយចំនួន មានការលំបាកបន្តិចបន្តួច ប៉ុន្តែ វាមិនមែនជាបញ្ហាសម្រាប់ពួកគេឡើយ។ ពាក់ព័ន្ធនឹងសេវាកម្ម ម្ហូបអាហារ ការស្នាក់នៅក្នុងខេត្តមណ្ឌលគិរីវិញ គឺមានតម្លៃសមរម្យ ដែលពួកគេអាចទទួលយកបាន។ អ្វីដែលភ្ញៀវទេសចរចាប់អារម្មណ៍ដែរនោះ គឺបញ្ហាសន្តិសុខ សណ្ដាប់ធ្នាប់ ធ្វើឱ្យពួកគេ ក៏ដូចភ្ញៀវទេសចរដ៏ទៃទៀត មានសុខសុវត្ថិភាពល្អ ក្នុងការធ្វើដំណើរកម្សាន្តទៅតាមរមណីយដ្ឋានផ្សេង។ ភ្ញៀវទេសចរជាច្រើន បានបញ្ជាក់យ៉ាងច្បាស់ថា នាឱកាសឆ្លងឆ្នាំសកលនៅឆ្នាំក្រោយៗទៀត ពួកគេនឹងមក CountDown និងលេងកម្សាន្តក្នុងខេត្តមណ្ឌលគិរីជាថ្មីម្តងទៀត។

ដោយឡែក ប្រជាសហគមន៍តាមតំបន់រមណីយដ្ឋាន ក៏ដូចជា អាជីវករលក់ដូរវិញ បានលើកឡើងផងដែរថា ការឆ្លងឆ្នាំសកលឆ្នាំនេះ ភ្ញៀវទេសចរហាក់មានការកើនឡើងច្រើនបើធៀបនឹងឆ្នាំមុន ហើយពួកគេពិតជាសប្បាយរីករាយដែលមានភ្ញៀវទេសចរយ៉ាងច្រើន ធ្វើដំណើរកម្សាន្តទូទាំងខេត្តមណ្ឌលគិរី ដោយពួកគេអាចលក់ផលិតផលប្រចាំតំបន់ជូនភ្ញៀវទេសចរបានច្រើនគួរសម៕

ដោយ៖ រៀម សុខហេង