ព័ត៌មានអន្ដរជាតិ

ប្រធានាធិបតីអ៊ីរ៉ង់ ប្រកាសម៉ាត់ៗថាមិនធ្លាប់ប៉ុនប៉ងធ្វើឃាតលោក ត្រាំ នោះទេ

បានផុស

១ year មុន

នៅ

ថ្ងៃពុធ ១៥ មករា ២០២៥

ដោយ

Chheang

ប្រធានាធិបតីអ៊ីរ៉ង់ លោក Masoud Pezeshkian បានច្រានចោលការចោទប្រកាន់ពីមុនៗរបស់សហរដ្ឋអាមេរិក ដោយបញ្ជាក់យ៉ាងច្បាស់ថា រដ្ឋាភិបាលអ៊ីរ៉ង់មិនធ្លាប់មានគម្រោងធ្វើឃាតលោក ដូណាល់ ត្រាំ នោះឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងបទសម្ភាសន៍ជាមួយទូរទស្សន៍ NBC កាលពីថ្ងៃទី១៤ខែមករាឆ្នាំ២០២៥ លោក Pezeshkian បាននិយាយថា៖ «មិនមានទាល់តែសោះ។ យើងមិនដែលព្យាយាមប៉ុនប៉ងធ្វើវាឡើយ ហើយយើងក៏មិនដែលនឹងធ្វើដែរ»។

នៅខែវិច្ឆិកាឆ្នាំ២០២៤ ក្រសួងយុត្តិធម៌អាមេរិកបានចោទប្រកាន់បុរសជនជាតិអ៊ីរ៉ង់ម្នាក់ ពាក់ព័ន្ធនឹងផែនការដែលបញ្ជាដោយកងឆ្មាំបដិវត្តន៍ជាន់ខ្ពស់អ៊ីរ៉ង់ ដើម្បីធ្វើឃាតលោក ដូណាល់ ត្រាំ ដែលជាប្រធានាធិបតីទើបជាប់ឆ្នោតរបស់អាមេរិក។

លោក ត្រាំ បាននិយាយកាលពីឆ្នាំមុនក្នុងអំឡុងពេលយុទ្ធនាការបោះឆ្នោតអាមេរិកថា អ៊ីរ៉ង់ប្រហែលជានៅពីក្រោយការប៉ុនប៉ងសម្លាប់លោក។

លោក ត្រាំ ដែលបានឈ្នះការបោះឆ្នោតអាមេរិកឆ្នាំ២០២៤ ហើយនឹងចូលកាន់តំណែងនៅថ្ងៃទី២០ខែមករា បានរួចផុតពីការប៉ុនប៉ងធ្វើឃាតចំនួនពីរលើកក្នុងអំឡុងពេលយុទ្ធនាការ ដោយមួយលើកនៅក្នុងខែកញ្ញាឆ្នាំ២០២៤ ខណៈពេលដែលលោកកំពុងវាយកូនហ្គោលនៅរដ្ឋផ្លរីដា និងមួយលើកទៀតក្នុងអំឡុងពេលបាតុកម្មខែកក្កដាឆ្នាំ២០២៤ នៅរដ្ឋ Pennsylvania។ យ៉ាងណា ទាំងពីរករណីនេះ អ្នកស៊ើបអង្កេតមិនបានរកឃើញភស្តុតាងនៃការជាប់ពាក់ព័ន្ធរបស់អ៊ីរ៉ង់ទេ។

កន្លងមក អ៊ីរ៉ង់ បានបដិសេធការអះអាងអំពីការជ្រៀតជ្រែកក្នុងកិច្ចការអាមេរិក រួមទាំងការវាយប្រហារតាមប្រព័ន្ធអ៊ីនធឺណិតផងដែរ។

អ៊ីរ៉ង់ សង្កត់ធ្ងន់ថា មានតែអាមេរិកទៅវិញទេ ដែលបានជ្រៀតជ្រែកក្នុងកិច្ចការរបស់ខ្លួនអស់រយៈពេលជាច្រើនទសវត្សរ៍ ដោយលើកឡើងពីព្រឹត្តិការណ៍នានារាប់ចាប់ពីរដ្ឋប្រហារឆ្នាំ១៩៥៣ ប្រឆាំងនឹងនាយករដ្ឋមន្ត្រី រហូតដល់ឆ្នាំ២០២០ ពាក់ព័ន្ធនឹងការសម្លាប់មេបញ្ជាការយោធារបស់ខ្លួននៅក្នុងការវាយប្រហារដោយយន្តហោះគ្មានមនុស្សបើករបស់សហរដ្ឋអាមេរិក៕

ដោយ៖ ឈាង

ចុចអាន៖ អាមេរិក ព្រមានពីការវាយប្រហារហិង្សា នៅថ្ងៃលោក ត្រាំ ស្បថចូលកាន់តំណែង