បង្រ្កាបទីតាំងល្បែងសុីសងខុសច្បាប់ឃាត់ខ្លួនមនុស្សប្រុសស្រីសរុប ៣៣នាក់

កម្លាំងនគរបាលការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ បានឆ្មក់បង្ក្រាបទីតាំងបង្កប់ល្បែងស៊ីសងខុសច្បាប់មួយកន្លែង ឃាត់ខ្លួនមនុស្សប្រុសស្រីសរុប ៣៣នាក់ ដកហូតសម្ភារៈមួយចំនួន និងម៉ូតូច្រើនគ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិបត្តិការនេះបានធ្វើឡើងកាលពីវេលាម៉ោង៣រសៀល ថ្ងៃទី២១ ខែមករា ឆ្នាំ២០២៥ នៅចំណុចទីតាំងផ្ទះមួយកន្លែងតាមបណ្តោយផ្លូវលេខ ៤៧៤ ក្នុងសង្កាត់បឹងត្របែក ខណ្ឌចំការមន រាជធានីភ្នំពេញ។

ប្រភពពីសមត្ថកិច្ចបានអោយដឹងថា ការចុះបង្ក្រាបទីតាំងបង្កប់ល្បែងស៊ីសងនេះ គឺអនុវត្តតាមបទបញ្ជារបស់ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការដ្ឋាននគរបាលរាជធានីភ្នំពេញ ដឹកនាំដោយប្រធានការិយាល័យព្រហ្មទណ្ឌកម្រិតធ្ងន់ឆ្មក់ចុះបង្ក្រាបជាក់ស្ដែងឃាត់ខ្លួនមនុស្សសរុប៣៣នាក់ ក្នុងនោះមានបុគ្គលិក៣នាក់។

ក្រោយឃាត់ខ្លួន មនុស្សប្រុសស្រីទាំង ៣៣នាក់ និងវត្ថុតាងត្រូវបានកម្លាំងនគរបាលបញ្ជូនទៅស្នងការដ្ឋាននគរបាលរាជធានីភ្នំពេញដើម្បីចាត់ការតាមនីតិវិធី៕

អត្ថបទ៖ រដ្ឋា