តបតាមការសួររក! សេន រ៉ានុត និពន្ធនិងច្រៀងបទ «លោកពុក» ផ្ញើជូនសម្តេចតេជោ

តារាចម្រៀងលោក សេន រ៉ានុត បន្ទាប់ពីឃ្លាតឆ្ងាយសិល្ប:យូរឆ្នាំ ដោយបានទៅរស់នៅឯសហរដ្ឋអាមេរិកសាងសុភមង្គលគ្រួសារនៅទីនោះកាលពីថ្មីៗនេះ ស្រាប់តែសម្តេចតេជោ ហ៊ុន សែន បានរម្លឹកនិងសួរនាំរកតារាចម្រៀងប្រុសរូបនេះ។

ភ្លាមៗនៃការសួរនាំរម្លឹកឈ្មោះពីសំណាក់សម្តេចតេជោ តារាចម្រៀងលោក សេន រ៉ានុត បានសម្តែងក្តីរំភើបខ្លាំង និងបាននិពន្ធបទចម្រៀងមួយបទ ចំណងជើងថា « លោកពុក » គោរពផ្ញើជូនសម្ដេចតេជោ ហ៊ុន សែន ផងដែរ។

លោក សេន រ៉ានុត បានរៀបរាប់ថា សូមគោរពផ្ញេីជូនសម្តេចតេជោដោយក្តីគោរពដ៏ខ្ពង់ខ្ពស់បំផុតហេីយគោរពអរគុណលោកពុកដែលបានពេញចិត្តអត្ថន័យដែលកូនបានសរសេរ ព្រមទាំងអ្នកម្តាយដែលបានពេញចិត្តសូមគោរពអរគុណគ្រប់យ៉ាងដែលលោកបានផ្តល់តម្លៃជូនកូន។

សេន រ៉ានុត បានបន្តថា សូមគោរពផ្ញេីជូនសម្តេចតេជោ តាមរយ:បទចម្រៀង និងបានឆ្លេីយតបសាររបស់លោកដែលលោកពុកបានសួររកកូនថាកូនទៅនៅឯណាហេីយ។ អ៊ីចឹងកូនសូមឆ្លេីយតបលោកពុកវិញ តាមរយ:ជាបទចម្រៀងថាកូនរស់នៅទីណា។

លោក សេន រ៉ានុត និយាយបន្តថា “កូនដឹងថា លោកពុកបានសណ្តាប់ហេីយលោកប្រាកដជាសម្រក់ទឹកភ្នែក តែបេីលោកសម្រក់ទឹកភ្នែកដោយសារនឹកកូន ស្រលាញ់កូន គឺកូនមានមោទនភាពណាស់ តែបេីលោកពុកស្រក់ទឹកភ្នែកដោយសារដឹងថាកូនជាក្មេងមិនល្អក្នុងសង្គមកូនពិតជាមានវិប្បដិសារីជំនួសលោកពុក”។

តារាចម្រៀងលោក សេន រ៉ានុត បន្ថែមទៀតថា កូនមានមោទនភាពដែលលោកពុកទទួលសណ្តាប់ហេីយកូនមានឱកាសបានជូនពរគ្រួសារសម្តេចពុក នឹងប្រជាជនខ្មែរទាំងមូលផងដែរនេះជាសំនៀងរវាងលោកឪពុកនឹកកូន កូននឹកលោកឱពុក៕ អត្ថបទ៖ ចាន់រ៉ា