ដាណឺម៉ាក ព្រមានថា ៥ឆ្នាំទៀត រុស្ស៊ី អាចបញ្ឆេះសង្គ្រាមធំនៅអឺរ៉ុប

ចារកម្មដាណឺម៉ាក (DDIS) បានចេញរបាយការណ៍យ៉ាងភ្ញាក់ផ្អើលដែលបង្ហាញថា រុស្ស៊ីកំពុងត្រៀមធ្វើសង្គ្រាមទ្រង់ទ្រាយធំនៅអឺរ៉ុបក្នុងរយៈពេល៥ឆ្នាំទៀត ពេលណាដែលទីក្រុងមូស្គូ មើលឃើញថា អង្គការណាតូ ចុះខ្សោយហើយនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរបាយការណ៍ចេញកាលពីថ្ងៃអង្គារទី១១ខែកុម្ភៈឆ្នាំ២០២៥, រុស្ស៊ីទំនងជាធ្វើសង្គ្រាមជាមួយប្រទេសជាសមាជិកណាមួយចំនួន១ ឬច្រើនជាងនេះ នៅពេលវាយតម្លៃឃើញថា យោធាប្រទេសនោះចុះខ្សោយនិងមានការបែកបាក់នយោបាយផ្ទៃក្នុង។ ម្យ៉ាងទៀត រុស្ស៊ីអាចឆ្លៀតឱកាសធ្វើសកម្មភាព នៅពេលមានជំនឿចិត្តថា សហរដ្ឋអាមេរិក លែងសូវខ្វាយខ្វល់ជាមួយណាតូ។

របាយការណ៍នេះបានបញ្ចេញស្របពេល សហរដ្ឋអាមេរិក ក្រោមការដឹកនាំរបស់លោក ដូណាល់ ត្រាំ កំពុងរិះគន់រដ្ឋជាសមាជិកណាតូ ជុំវិញការបង់ថ្លៃចំណាយចូលសម្ព័ន្ធភាពយោធាមួយនេះ ហើយថែមទាំងគំរាមកាត់ជំនួយទៀតផង។

របាយការណ៍របស់ DDIS ធ្វើឲ្យគេនឹកឃើញដល់ការព្រមានរបស់មេទ័ពអាល្លឺម៉ង់ ដែលប្រាប់ឲ្យរដ្ឋាភិបាលទីក្រុងបែរឡាំង រៀបជើងព្រួលឲ្យហើយ និងត្រៀមកម្លាំងយោធាចំពោះជម្លោះដែលអាចផ្ទុះឡើងជាមួយរុស្ស៊ី ក្នុងរយៈពេលប្រាំឆ្នាំខាងមុខ។

លោក Carsten Breuer និយាយថា ប្រទេសជាតិចាំបាច់ត្រូវបង្កើតផែនការទប់ស្កាត់ ដើម្បីត្រៀមខ្លួនឲ្យបានប្រសើរ។ អាល្លឺម៉ង់ អាចធ្លាក់ចូលក្នុងសង្គ្រាមគ្រប់ពេល ព្រោះការប្រឈមមុខដាក់គ្នាខាងយោធាជាមួយទីក្រុងមូស្គូ បានឈានដល់កម្រិតខ្ពស់បំផុត ចាប់តាំងពីបញ្ចប់សង្គ្រាមត្រជាក់មក។

ចំណែករដ្ឋមន្ត្រីការពារជាតិអាល្លឺម៉ង់លោក Boris Pistorius ក៏ធ្លាប់ប្រកាសដែរថា ប្រទេសនេះ ត្រូវតែក្លាយជា រដ្ឋមានសមត្ថភាពធ្វើសង្គ្រាម ហើយលោកបានទទូចឲ្យ ទីក្រុងបែរឡាំង និងអង្គការណាតូទាំងមូល គួរតែបំពាក់អាវុធទំនើបៗ ត្រៀមធ្វើសង្គ្រាមឲ្យហើយទៅ។

ទោះបីជាយ៉ាងណាក៏ដោយ ទីក្រុងមូស្គូ តែងច្រានចោលការលើកឡើងអំពីសង្គ្រាមរបស់ខ្លួនជាមួយអង្គការណាតូ ហើយតែងចោទថា ការលើកឡើងទាំងអស់ សុទ្ធសឹងជាការស្រមើស្រមៃ៕

អត្ថបទ៖ សុខ សុវណ្ណ

ចុចអាន៖ មូស្គូ៖ អ៊ុយក្រែនព្យាយាមញុះរុស្ស៊ី ​ហើយ​ទាញ​ណាតូ​ចូល​ក្នុងសង្គ្រាមដោយផ្ទាល់