ក្រុងហ្សាការតារៀបចំផែនការផ្ដល់ការដឹកជញ្ជូនសាធារណៈឥតគិតថ្លៃ ដល់ពលរដ្ឋ

រដ្ឋបាល​ក្រុងហ្សាការតា នៃប្រទេស​ឥណ្ឌូណេស៊ី កំពុង​រៀបចំផែនការ​ផ្តល់ជូននូវសេវា​ដឹកជញ្ជូនសាធារណៈដោយឥតគិតថ្លៃសម្រាប់ប្រជាជន ១៥ ក្រុម ដែលជាផ្នែក​មួយ​នៃ​ «កម្មវិធីរយៈពេល ១០០ ថ្ងៃ» ​របស់​លោក​អភិបាលក្រុង​ Pramono Anung។ នេះបើតាមការចុះ​ផ្សាយ​របស់​ទីភ្នាក់ងារសារព័ត៌មាន​រដ្ឋ Antara។

អភិបាលរងក្រុងហ្សាការតា លោក Rano Karno បាន​ឱ្យដឹងកាលពីថ្ងៃអង្គារថា៖ «យើងកំពុងរៀបចំសម្រាប់ផែនការ​នេះ ជាផ្នែកមួយនៃកម្មវិធី ១០០ ថ្ងៃ»។

ក្រោម​ផែនការ ​ក្រុមប្រជាជន​ដូចជា​មនុស្សចាស់ ជនពិការ និង​អ្នក​មាន​កាត​ Jakarta Smart Card (KJP) នឹងមានសិទ្ធិប្រើប្រាស់មធ្យោបាយធ្វើដំណើរសាធារណៈដោយឥតគិតថ្លៃនៅក្នុងទីក្រុងហ្សាកាតា ដូចជា ឡានក្រុងសាធារណៈ Transjakarta រថភ្លើងសាធារណៈ​ Mass Rapid Transit (MRT) និង​ Light Rail Transit (LRT) និងសេវាកម្មឡាន​សាធារណៈ​ JakLingko។

អភិបាល​ក្រុង​ហ្សាការតា បាន​បង្ហើប​ពីផែនការនេះដំបូង​កាលពីខែវិច្ឆិកា ឆ្នាំមុន ដើម្បីកែលម្អលទ្ធភាព​នៃការ​ប្រើប្រាស់សេវា​ដឹកជញ្ជូនសាធារណៈសម្រាប់ក្រុមប្រជាជនជាក់លាក់មួយ​ចំនួន​។ ការផ្តល់ការដឹកជញ្ជូនសាធារណៈ​ឥតគិតថ្លៃដល់ក្រុម​ប្រជាជនទាំងនោះ រំពឹងថានឹងជួយកាត់បន្ថយទាំងការកកស្ទះចរាចរណ៍នៅក្នុងទីក្រុងហ្សាការតា និងតម្លៃនៃការរស់នៅ។

បើតាម​ Antara ក្រុមប្រជាជនទាំង​ ១៥ ក្រុម ​ដែលមានសិទ្ធិទទួលបានសេវាឥតគិតថ្លៃ រួមមានមន្ត្រីរាជការរបស់​រដ្ឋាភិបាល​​ខេត្តហ្សាការតា និងមន្រ្តី​ចូលនិវត្តន៍របស់​​ខេត្ត កម្មករជាប់កិច្ចសន្យាដែល​ធ្វើការឱ្យ​រដ្ឋាភិបាលខេត្ត​ និស្សិតកាត់កាត KJP បុគ្គលិកផ្នែកឯកជនមួយចំនួន និងប្រជាជន​រស់នៅផ្ទះល្វែងដែលទទួល​ជំនួយ​ពីរដ្ឋាភិបាល​ (Rusunawa) ជាដើម​។

​ក្រៅពីនេះ​ អតីតយុទ្ធជនឥណ្ឌូណេស៊ី ជនពិការ អ្នក​មាន​អាយុច្រើន​ជាង​ ៦០ ឆ្នាំ អ្នកមើលថែទាំវិហារឥស្លាម អ្នកអប់រំ និងបុគ្គលិកអប់រំនៅកន្លែងបង្រៀនកុមារតូចៗ (PAUD) ក៏ទទួល​បាន​សេវាកម្មដឹកជញ្ជូនសាធារណៈឥតគិតថ្លៃផងដែរ។