​អំពើ​ហិង្សា​​​កាន់តែ​សាហាវក្នុង​ចំណោម​​និកាយសាសនា​​ ផ្ទុះ​​ឡើង​​នៅ​​​ប្រទេស​ស៊ីរី

យ៉ាងហោចណាស់ជនស៊ីវិល១៣៨៣នាក់ត្រូវបានសម្លាប់នៅក្នុងអំពើហិង្សានាពេលថ្មីៗនេះដែលបង្កឡើងដោយក្រុមប្រដាប់អាវុធគាំទ្រអតីតប្រធានាធិបតីលោក Bashar al-Assad នៅក្នុងតំបន់ឆ្នេរនៃប្រទេសស៊ីរី។ ​យោង​សារ​ព័ត៌មាន Xinhua នៅថ្ងៃទី១៣ខែមីនានេះ​។

អ្នកនាំពាក្យសិទ្ធិមនុស្សរបស់អង្គការសហប្រជាជាតិ លោក​ Thameen Al-Kheetan បានឲ្យដឹងថា អំពើហិង្សាបានកើនឡើងយ៉ាងរហ័សបង្កទៅជាការប៉ះទង្គិចគ្នាផ្នែកនិកាយសាសនាកាន់តែ​រីករាលដា​​ល ដោយផ្តោតសំខាន់លើទីប្រជុំជន និងភូមិភាគច្រើននៃក្រុមជនជាតិភាគតិច Alawite ។

ការ​ស៊ើបអង្កេត​ដំបូង​​ បាន​បង្ហាញ​ថា ​ជនល្មើស​រួម​មាន​ក្រុម​យុទ្ធជន​ដែល​មាន​ទំនាក់ទំនង​ជាមួយ​អាជ្ញាធរ​បណ្តោះអាសន្ន​របស់​ស៊ីរី​ក៏ដូចជា​ក្រុម​គាំទ្រ​ លោក Assad ខណៈសហគមន៍ Alawite គឺជានិកាយជនជាតិភាគតិចដែលដឹកនាំដោយ​លោក Assad។

យោងតាមក្រុមអ្នកឃ្លាំមើលសិទ្ធិមនុស្សស៊ីរី អំពើហិ​ង្សាបានផ្ទុះឡើងកាលពីថ្ងៃទី៦ខែមីនា ដែលបង្កឡើងដោយការវាយប្រហាររបស់ក្រុមប្រដាប់អាវុធគាំទ្រអតីតប្រធានាធិបតីលោក Bashar al-Assad ទៅលើកងកម្លាំងសន្តិសុខក្នុងខេត្ត Latakia ជាប់មាត់សមុទ្រ ដោយ​សម្លាប់បុគ្គលិកសន្តិសុខយ៉ាងហោចណាស់១៦នាក់ ។

រហូតមកដល់ពេលនេះ ក្រុមសង្កេតការណ៍ដែលមានមូលដ្ឋាននៅចក្រភពអង់គ្លេសបានចងក្រងឯកសារមរណភាពជនស៊ីវិលយ៉ាងហោចណាស់ ១៣៨៣នាក់ រួមទាំងព្រមានប្រឆាំងនឹងនីតិវិធីបញ្ចុះសពមិនត្រឹមត្រូវ ដោយសារទំហំនៃអំពើហិង្សាប៉ះពាល់ដល់សមត្ថភាពក្នុងតំបន់ក្នុងការគ្រប់គ្រងវិបត្តិ។

លើសពីនេះចំនួនអ្នកស្លាប់ទំនងជានឹងកើនឡើងនៅពេលដែលសាកសពកាន់តែច្រើនត្រូវបានរកឃើញបន្តបន្ទាប់ បូករួមនឹងការស្លាប់ចុងក្រោយបង្អស់នៅក្នុងខេត្ត Latakia, Tartous និង Hama។

ពាក់ព័ន្ធបញ្ហានេះកាលពីថ្ងៃអាទិត្យសប្ដាហ៍មុន ប្រធានាធិបតីបណ្តោះអាសន្នស៊ីរីលោក Ahmed al-Sharaa បានបញ្ជា​ឱ្យបង្កើតគណៈកម្មាធិការជាតិឯករាជ្យមួយ ដើម្បីស៊ើបអង្កេតលើអំពើហិង្សានេះ និងស្វែងរកជនល្មើសមកទទួលខុសត្រូវ ដោយគណៈកម្មាធិការនេះត្រូវបំពេញបេសកកម្មរបស់ខ្លួនក្នុងរយៈពេល៣០ថ្ងៃ៕

អត្ថបទ៖ ប៊ុន សុភាព