ស​មាគមឧកញ៉ា រម្លឹកអ្នកមានគោរមងារឧកញ៉ាថា កុំប្រើបណ្ដាញសង្គមធ្វើឱ្យប៉ះពាល់ងារដែលព្រះករុណាប្រទាន

សមាគមឧកញ៉ាកម្ពុជា ក្រើនរម្លឹកដល់គោរមវន្ត ដែលមានគោរមងារឧកញ៉ា ត្រូវប្រកាន់ខ្ជាប់នូវកិត្តិយស សីលធម៌ សុជីវធម៌ និងសេចក្តីថ្លៃថ្នូរនៅក្នុងសង្គម ក្នុងការប្រកបមុខរបរនិងវិជ្ជាជីវៈឱ្យបានខ្ជាប់ខ្ជួន និងត្រូវយកចិត្ត ទុកដាក់ឱ្យបានខ្ពស់បំផុត ចំពោះការប្រើប្រាស់បណ្តាញសង្គម ឬមធ្យោបាយផ្សព្វផ្សាយនានា ជៀសវាងចែកចាយ ឬ ផ្សព្វផ្សាយនូវសកម្មភាព ឬការប្រើពាក្យសម្តីទាំងឡាយណា ដែលធ្វើឱ្យប៉ះពាល់ដល់ងារជាកិត្តិយស ដែល អង្គព្រះមហាក្សត្រ បានព្រះរាជទាន។

ជាមួយគ្នា សមាគមឧកញ៉ាកម្ពុជា ក៏ព្រមានចាត់វិធានការតាមនីតិវិធីច្បាប់ជាក់ ស្តែង ចំពោះគោរមវន្តណា ដែលត្រូវបានរកឃើញថាបានប្រព្រឹត្តសកម្មភាព ឬប្រើពាក្យសម្តីទាំងឡាយណា ដែលធ្វើឱ្យប៉ះពាល់ដល់គុណតម្លៃ និងឧត្តមភាពដ៏ឧត្តុង្គឧត្តម នៃគោរមងារឧកញ៉ា ស្របតាមព្រះរាជក្រឹត្យ និងអនុក្រឹត្យជាធរមាន។

សមាគមឧកញ៉ាកម្ពុជា ចេញមកដាស់តឿន និងព្រមានដូច្នេះ បន្ទាប់ពីបុគ្គលឈ្មោះ ឈាវ មុន្និន ដែលទទួលងារជាឧកញ៉ា កាលពីថ្ងៃ​ទី១៩ ខែធ្នូ ឆ្នាំ​២០២២ និងមានឋានន្តរស័ក្តិថ្នាក់ឧត្តមសេនីយ៍ត្រី តួនាទីជានាយករង នៃនាយកដ្ឋានបច្ចេកទេស កងទ័ពជើងអាកាស អគ្គនាយកដ្ឋានសម្ភារៈបច្ចេកទេស ក្រសួងការពារជាតិផង ប្រើប្រាស់បណ្ដាញសង្គមបង្ហោះវីដេអូរាំរែក ក្នុងការិយាល័យ ហើយត្រូវបានមហាជនរិះគន់ថា រាំបែកស្លុយ មិនសមជាមន្ត្រីរាជការ និងល្មើសទៅនឹងច្បាប់ស្ដីពីលក្ខន្តិកៈទូទៅចំពោះយោធិន នៃកងយោធពលខេមរភូមិន្ទ។

បន្ទាប់ពីមហាជនរិះគន់យ៉ាងចាស់ដៃ ឧបនាយករដ្ឋមន្ត្រី រដ្ឋមន្ត្រីការពារជាតិ លោក ទៀ សីហា ឲ្យអង្គភាពជំនាញរៀបចំបង្កើតក្រុមប្រឹក្សាវិន័យ ដើម្បីពិនិត្យ និងវាយតម្លៃរាល់ទង្វើទាំងឡាយរបស់ឧត្ដមសេនីយ៍ត្រី ឈាវ មុន្និន  ដើម្បីដាក់ ទណ្ឌកម្មឱ្យស្របទៅនឹងច្បាប់ស្តីពីលក្ខន្តិកៈទូទៅចំពោះយោធិន នៃកងយោធពលខេមរភូមិន្ទ។

ក្រសួងការពារជាតិ ចាត់ទុកសកម្មភាពរាំរែកនៅក្នុងការិយាល័យក្រសួងការពាតិរបស់ឧកញ៉ា ឈាវ មុន្និន ថាជាអាកប្បកិរិយាមិនសមរម្យក្នុងនាមជាយោធិន ដែលធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយស សេចក្តីថ្លៃថ្នូរ និងឧត្តមភាពរបស់ក្រសួងការពារជាតិ និងកងយោធពលខេមរភូមិន្ទទាំងមូល។

​ព្រះរាជក្រឹត្យ​​ស្ដីពី​គោរមងារ​ឧកញ៉ា ដែល​បាន​ចេញ​កាល​ពី​​​ថ្ងៃ​ទី២៣ ខែតុលា ឆ្នាំ​២០២៤ កំណត់ថា មន្ត្រី​រាជការ​ស៊ីវិល មន្ត្រី​នគរបាល​ជាតិ និង​យោធិន ដែល​កំពុង​បំពេញ​ការងារ​តាម​ក្រសួង ស្ថាប័ន​នានា​របស់​រដ្ឋ ដែល​ទទួល​បាន​គោរមងារ​ឧកញ៉ា​ពី​មុន​ ត្រូវ​ស្នើ​សុំ​លា​ឈប់​ប្រើ​ប្រាស់​គោរមគោរមងារ​ឧកញ៉ា ឬ​លា​ឈប់​ពី​ក្របខណ្ឌ​​ទាំង​នោះ​ភ្លាមៗ​បន្ទាប់​ពីថ្ងៃព្រះរាជក្រឹត្យ​នេះចេញជាផ្លូវការ៕