គ្រូ Madura United លើកចំណុចល្អ ២ របស់ព្រះខ័នរាជស្វាយរៀង ជាក្តីបារម្ភសម្រាប់ក្រុមលោក

គ្រូបង្គោលរបស់ក្រុម Madura United លោក Angel Alfredo Vera បានកោតសរសើរ ២ ចំណុចអំពីក្រុមតំណាងកម្ពុជា ព្រះខ័នរាជស្វាយរៀង មុនជួបគ្នាថ្ងៃស្អែកទី ១០ ខែ មេសា ក្នុងជើងទី ១ វគ្គពាក់កណ្តាលផ្តាច់ព្រ័ត្រពាន AFC Challenge League។

ក្រុមទាំង ២ ធ្លាប់ជួបគ្នាម្តងរួចមកហើយនៅក្នុងពាន AFC Challenge League នេះ ដែលពេលនោះក្រុម Madura United បានយកឈ្នះលើក្រុម ព្រះខ័នរាជស្វាយរៀង នៅក្នុងវគ្គជម្រុះក្នុងពូលកាលពីថ្ងៃទី ១១ ខែ កុម្ភៈ ក្នុងលទ្ធផល ២-១ នៅ​ប្រទេស​ម៉ុងហ្គោលី។ ទោះបីជាយ៉ាងណាក៏ដោយ គ្រូបង្គោលសញ្ជាតិ អាហ្សង់ទីន វ័យ ៥២ ឆ្នាំ នៅតែលើកសរសើរចំពោះក្រុមម្ចាស់ផ្ទះ ព្រះខ័នរាជស្វាយរៀង ​ថា​ជា​ក្រុម​ដែល​កីឡាករ​មាន​គុណភាព​ល្អ និងយុទ្ធសាស្ត្រលេងនៅលើទីលានល្អ។

ថ្លែងនៅក្នុងសន្និសីទសារព័ត៌មានកាលពីព្រឹកមិញនេះថ្ងៃទី ៩ ខែ មេសា ក្រោយអ្នកសារព័ត៌មានសួរនាំអំពីក្តីព្រួយបារម្ភលើក្រុមម្ចាស់ផ្ទះ ព្រះខ័នរាជស្វាយរៀង លោក Alfredo Vera បានមានប្រសាសន៍យ៉ាងដូច្នេះថា ៖ «ខ្ញុំជឿជាក់ថា គុណភាពកីឡាករក្នុងក្រុមរបស់ព្រះខ័នរាជស្វាយរៀង សុទ្ធតែជាកីឡាករ​ល្អ។ ពាក់ព័ន្ធយុទ្ធសាស្ត្រនៃការលេងរបស់ព្រះខ័នរាជស្វាយរៀងក៏រឹតតែល្អ។ មូលហេតុបែបនេះហើយ ទើបខ្ញុំបានសិក្សាវិភាគលើក្រុមស្វាយរៀង ហើយបន្ទាប់មកយើងនឹងព្យាយាមកែប្រែចំណុចមួយចំនួន ដើម្បីត្រៀមលេងជាមួយព្រះខ័នរាជស្វាយរៀងថ្ងៃស្អែក»។

សូមបញ្ជាក់ជាថ្មីថា នៅថ្ងៃ ព្រហស្បតិ៍ ទី ១០ ស្អែក ក្រុមព្រះខ័នរាជស្វាយរៀង នឹងបើក​ទ្វារ​ពហុកីឡដ្ឋានជាតិមរតកតេជោ ទទួលក្រុមតំណាងឥណ្ឌូណេស៊ី​ Madura United ក្នុងជើងទី ១ វគ្គពាក់កណ្តាល់ផ្តាច់ព្រ័ត្រពាន AFC Challenge League ចាប់ពីម៉ោង ៧ ល្ងាចតទៅ៕

អត្ថបទ៖ សេម កុសល