សេដ្ឋកិច្ច

កម្ពុជានាំចេញទៅចិនសម្រេចបានទឹកប្រាក់ជិត $៣៥០ លាន នៅត្រីមាសទី១

បានផុស

១ year មុន

នៅ

ថ្ងៃសៅរ៍ ១២ មេសា ២០២៥

ដោយ

កម្ពុជាបាននាំទំនិញទៅប្រទេសចិនសម្រេចបាននូវទំហំទឹកប្រាក់ជិត ៣៥០ លានដុល្លារ នៅក្នុងត្រីមាសទី១ ឆ្នាំ ២០២៥ ធ្លាក់ចុះជិត ៥% ធៀបនឹងរយៈពេលដូចគ្នាកាលពីឆ្នាំមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) បង្ហាញថា ការនាំចេញទំនិញរបស់កម្ពុជា ទៅចិនមានទំហំទឹកប្រាក់ ៣៤៨,១៩ លានដុល្លារ ធ្លាក់ចុះ ៤,៩ ភាគរយ ចំណែកឯការនាំទំនិញចូលមកវិញមានទំហំទឹកប្រាក់ ៣,៧២ ពាន់លានដុល្លារ កើន ៣០,៨ ភាគរយ។

លោក ឡោ វិចិត្រ អនុប្រធានសមាគមពាណិជ្ជកម្មកម្ពុជា-ចិន ប្រាប់កម្ពុជាថ្មីថា កម្ពុជាទិញទំនិញពីចិនមកច្រើនជាងនាំចេញ ក្នុងនោះកម្ពុជានាំចូលវត្ថុធាតុដើមក៏ច្រើន។

លោក ឡោ វិចិត្របញ្ជាក់បញ្ជាក់ថា កម្ពុជាប្រៀបដូចជាមជ្ឈមណ្ឌលបង្គុំហើយនាំចេញទៅទីផ្សារអឺរ៉ុប និងអាមេរិក ដោយសារកម្ពុជាខ្វះវត្ថុធាតុដើម ខណៈផលិតផលនាំចូលមួយចំនួនជាផលិតផលសម្រេច ហើយមួយចំនួនជាវត្ថុធាតុដើម។

លោក ប៉ែន សុវិជាតិ រដ្ឋលេខាធិការក្រសួងពាណិជ្ជកម្មកម្ពុជា បានលើកឡើងថា ទាំងចិន និងកម្ពុជា សុទ្ធតែជាសមាជិកនៃ កិច្ចព្រមព្រៀងពាណិជ្ជកម្មសេរី (RCEP) ដែលកិច្ចព្រមព្រៀងនេះ បានរួមចំណែកនៅក្នុងទីផ្សារនាំចេញរបស់កម្ពុជាប្រមាណ ៦៣% នៃចំណែកនៃការនាំចេញទំនិញទាំងមូលរបស់កម្ពុជា។

អ្នកនាំពាក្យរូបនេះ បន្ថែមថា៖ «កំណើននៅក្នុងវិស័យពាណិជ្ជកម្មនេះ មានកំណើនរហូតចាប់តាំងពីបានចុះកិច្ចព្រមព្រៀងពាណិជ្ជកម្មសេរី ដោយក្នុងនោះប្រទេសចិនបានទទួលទិញទំនិញកសិផលរបស់កម្ពុជា ដែលរួមមាន អង្ករ ត្រី ដំឡូងមី ជាការទទួលទិញ និងជាកិច្ចសហប្រតិបត្តិការមួយដែលជំរុញឱ្យមានការកែច្នៃ មានន័យថា សេចក្តីត្រូវការរបស់ទីផ្សារ បានបង្រៀនឱ្យយើងចេះកែច្នៃផលិតផលដើមឱ្យទៅជាផលិតផលសម្រេច ហើយត្រូវនឹងតម្រូវការរបស់ទីផ្សារ»។

ទំនិញកម្ពុជានាំទៅប្រទេសចិនភាគច្រើនគឺជាផលិតផលកសិកម្ម គ្រឿងសង្ហារឹម គ្រឿងអលង្ការ និងផលិតផលវាយនភណ្ឌ ចំណែកទំនិញដែលប្រទេសចិននាំមកកម្ពុជា មានដូចជា វត្ថុធាតុដើមសម្រាប់រោងចក្រ សហគ្រាស ផលិតផលប្រើប្រាស់ប្រចាំថ្ងៃ អាហារ ភេសជ្ជៈ រថយន្ត គ្រឿងម៉ាស៊ីន គ្រឿងសំណង់ គ្រឿងអគ្គិសនី អេឡិចត្រូនិក។

យោងតាមក្រសួងពាណិជ្ជកម្ម នៅក្នុងឆ្នាំ ២០២៤ ពាណិជ្ជកម្មទ្វេភាគីរវាងកម្ពុជា-ចិន សម្រេចបាននូវទំហំទឹកប្រាក់ ១៥,១៨ ពាន់លានដុល្លារ កើនឡើង ២៣,៨ ភាគរយ ធៀបនឹងឆ្នាំ ២០២៣៕

អត្ថបទ៖ ឡេង ដេត

សេចក្ដីជូនដំណឹង១ សប្តាហ៍ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា