រាជិនីសម្រស់​ប្រទេស ​កូតឌីវ័រ ទាក់ទាញ​ការ​ចាប់​អារម្មណ៍​ ពី​បវរកញ្ញា​ពិភពលោក

រូបភាពរបស់បវរកញ្ញា Fatoumata Coulibaly ដែលបានបង្ហោះដោយអ្នករៀបចំបវរកញ្ញាពិភពលោកនៅលើវេទិកានៃការប្រកួត បានទាក់ទាញការចាប់អារម្មណ៍យ៉ាងច្រើន ពីសំណាក់អ្នកគាំទ្ររាជិនីសម្រស់។ គេហទំព័រសម្រស់មួយចំនួនក៏បានដាក់បវរកញ្ញាស្បែកខ្មៅរូបនេះ ទៅក្នុងបេក្ខនារីដែលគួរឲ្យចាប់អារម្មណ៍បំផុត ដោយព្យាករណ៍ថា នាងនឹងមានចំណាត់ថ្នាក់ខ្ពស់នៅលើឆាកអន្តរជាតិនាពេលមុខ។

បវរកញ្ញាវ័យ២១ឆ្នាំរូបនេះ បានគ្រងមកុដបវរកញ្ញាពិភពលោកក្នុងប្រទេសកំណើតកូតឌីវ័រ (Côte d’Ivoire) កាលពីដើមឆ្នាំ២០២៥ ហើយនាងគ្រោងនឹងចូលរួមប្រកួតបវរកញ្ញាពិភពលោកលើកទី៧២ ដែលធ្វើឡើងនៅប្រទេសឥណ្ឌា ក្នុងខែឧសភា ឆ្នាំ២០២៥។

រាជិនី​សម្រស់​ប្រចាំទឹកដីកូតឌីវ័រមានភាពទាក់ទាញខ្លាំង ដោយសារតែមាន​កម្ពស់១ម៉ែត្រនិង៨៥សង់ទីម៉ែត្រ និង​កំពុង​សិក្សា​ច្បាប់​នៅឯ​ស្រុក​កំណើត។ មិនតែប៉ុណ្ណោះ ភាពស្រស់ស្អាតពីធម្មជាតិរបស់នាង បានទាក់ទាញការចាប់អារម្មណ៍ជាមួយនឹងសំបុរស្បែកពណ៌សូកូឡា និងកែវភ្នែកជ្រៅដូចជាតុក្កតាចេញពីគំនូរជីវចល ជាពិសេសជើងវែងរបស់នាង ជួយឲ្យ Fatoumata លេចធ្លោនៅក្នុងព្រឹត្តិការណ៍ ឬកម្មវិធីបង្ហាញម៉ូដនានា។

ប្រព័ន្ធផ្សព្វផ្សាយ Ivorian ក៏បានអត្ថាធិប្បាយថា Fatoumata គឺជាគំរូរបស់ស្ត្រីសម័យទំនើប ឆ្លាតវៃ និងបំផុសគំនិតដល់មនុស្សជាច្រើន។ បវរកញ្ញាស្បែកខ្មៅរូបនេះ ត្រូវបានគេសម្ដៅជាញឹកញាប់ ជាមួយឃ្លាដូចជា «Black Queen» និង «Black Pearl» ។

ដោយឡែក នៅលើ Instagram ផ្ទាល់ខ្លួន បវរកញ្ញាកូតឌីវ័របាននិយាយថា នាងនឹងនាំយកទៅចូលរួមការប្រកួតនូវរឿងរ៉ាវអំពីស្ត្រីជនជាតិអាហ្វ្រិកដ៏ក្លាហានម្នាក់ ដែលប្រាថ្នាចង់ឈានដល់ពិភពលោក។ ក្នុងនោះ នាងបានសរសេរថា «សារនៃការគាំទ្ររបស់អ្នកគ្រប់គ្នា ពិតជាបានប៉ះបេះដូងរបស់ខ្ញុំ។ ការលើកទឹកចិត្ត និងដំបូន្មានទាំងអស់បានជួយខ្ញុំឲ្យយកឈ្នះខ្លួនឯង និងរៀបចំឲ្យកាន់តែប្រសើរឡើង ដើម្បីនាំមកនូវមោទនភាពដល់ប្រទេសកូតឌីវ័រ»។

សូមជម្រាបជូនថា បវរកញ្ញាពិភពលោក (Miss World០ គឺជាកម្មវិធីប្រកួតសម្រស់ដ៏កិត្យានុភាពបំផុតមួយក្នុងពិភពលោក រួមជាមួយនឹងបវរកញ្ញាចក្រវាឡ ដែលប្រារព្ធឡើងជាលើកដំបូងនៅប្រទេសអង់គ្លេសក្នុងឆ្នាំ ១៩៥១។ រាជិនីសម្រស់ Krystyna Pyszková មកពីសាធារណរដ្ឋឆេក នឹងត្រូវផ្ទេរមកុដបន្តនៅវគ្គផ្តាច់ព្រ័ត្ររដូវកាលទី ៧២ ដែលនឹងប្រព្រឹត្តទៅនៅល្ងាចថ្ងៃទី ៣១ ឧសភា ឆ្នាំ២០២៥៕

សូមទស្សនារូបភាពរបស់បវរកញ្ញា Fatoumata Coulibaly ខាងក្រោម៖

អត្ថបទ៖ សាង ស្រីល័ក្ខ

ចុចអាន៖គូស្នេហ៍តារាចិន Lu Han និង Guan Xiaotong សង្ស័យថាបែកគ្នា​មែនទែន​ហើយ​