រន្ធត់! ទេសចរ ២៦នាក់ ត្រូវខ្មាន់កាំភ្លើងបាញ់សម្លាប់នៅតំបន់ កាស្មៀរ

ខ្មាន់កាំភ្លើងបានបើកការវាយឆ្មក់ បាញ់ប្រហារយ៉ាងរន្ធត់ទៅលើទេសចរមួយក្រុមដែលនាំគ្នាទៅលេងក្រុង Pahalgam នៃតំបន់កាស្មៀរខាងគ្រប់គ្រងដោយប្រទេសឥណ្ឌា បណ្តាលឲ្យស្លាប់ចំនួន២៦នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC, ហេតុការណ៍នេះកើតឡើងនៅតំបន់ភ្នំ Baisaran កាលពីថ្ងៃអង្គារទី២២ខែមេសាឆ្នាំ២០២៥ ហើយបើតាមការបញ្ជាក់ពីមន្ត្រីក្នុងតំបន់, ក្រៅពីមនុស្សស្លាប់ ក៏មានទេសចរច្រើននាក់ទៀតរងរបួសផងដែរ ខណៈមួយចំនួនរងរបួសធ្ងន់។

ទេសចរម្នាក់មកពីរដ្ឋ Gujarat ដែលរួចជីវិតពីការវាយប្រហារនេះ បានរៀបរាប់ពីហេតុការណ៍ថា នៅសុខៗខ្មាន់កាំភ្លើងក៏បាញ់លើក្រុមទេសចរតែម្តង ធ្វើឲ្យកើតចលាចល ហើយម្នាក់ៗនាំគ្នារត់យករួចខ្លួនដោយសំឡេងស្រែកយំ យ៉ាងទ្រហឹង។

ទោះបីជាយ៉ាងណាក៏ដោយ មកទល់ពេលនេះមិនទាន់មានក្រុមណាមួយចេញមុខទទួលខុសត្រូវចំពោះអំពើឧក្រិដ្ឋកម្មដ៏សាហាវនេះឡើយ។

ពាក់ព័ន្ធហេតុការណ៍នេះ បានបង្កឲ្យមានការថ្កោលទោសពីសំណាក់មេដឹកនាំនានាលើពិភពលោក ហើយនាយករដ្ឋមន្ត្រីឥណ្ឌា Narendra Modi បានប្តេជ្ញានាំឧក្រិដ្ឋជន មកកាត់ទោសឲ្យទាល់តែបាន។

សូមជម្រាបថា កាស្មៀរដែលស្ថិតនៅតំបន់ភ្នំហិមាល័យ ត្រូវបែងចែកជាពីរក្រោយការប្រកាសឯករាជ្យរបស់ឥណ្ឌាពីចក្រភពអង់គ្លេសនិងការបង្កើតប្រទេសប៉ាគីស្ថាន នៅឆ្នាំ១៩៤៧។ 

យ៉ាងណា ប្រទេសប្រដាប់ដោយនុយក្លេអ៊ែរទាំងពីរនេះ សុទ្ធតែទាមទារគ្រប់គ្រងតំបន់នោះទាំងមូលផ្តាច់មុខ ហើយក៏ធ្លាប់ប្រយុទ្ធគ្នាក្នុងសង្គ្រាមពីរលើករួចមកហើយដែរ។

មិនត្រឹមប៉ុណ្ណឹង ទីនោះក៏កើតមានអំពើបះបោរជាយូរមកហើយដែរ ចាប់តាំងពីឆ្នាំ១៩៨៩មក នៅក្នុងតំបន់ដែលមានជនមូស្លីមភាគច្រើន។

ការវាយប្រហារទ្រង់ទ្រាយធំលើជនស៊ីវិលលើកចុងក្រោយបំផុត គឺកើតឡើងក្នុងខែមិថុនាឆ្នាំ២០២៤ នៅពេលមនុស្ស៩នាក់ ត្រូវបានសម្លាប់និង៣៣នាក់រងរបួស បន្ទាប់ពីក្រុមសកម្មប្រយុទ្ធបាញ់ស្រោចលើរថយន្តក្រុងដឹកអ្នកធ្វើធម្មយាត្រា៕

អត្ថបទ៖ សុខ សុវណ្ណ

ចុចអាន៖ មនុស្ស៧នាក់​ធ្វើការ​នៅ​ផ្លូវរូងក្រោមដីយុទ្ធសាស្ត្រមួយនៅកាស្មៀរត្រូវ​បាញ់​សម្លាប់​