កីឡា

កីឡាករលោតទឹកអាមេរិកកំណើតខ្មែរ ពិសី ឈ្នះមេដាយមាសថ្នាក់ជាតិអាមេរិកយប់មិញ

បានផុស

៥ years មុន

នៅ

ថ្ងៃសុក្រ ២៦ មីនា ២០២១

ដោយ

កីឡាករអាមេរិកដើមកំណើតខ្មែរ ចូដាន ពិសី វីនដល (Jordan Pisey Windle) បានឈ្នះមេដាយមាសពីព្រឹត្តិការណ៍ប្រកួតកីឡាលោតទឹកថ្នាក់ជាតិរបស់សហរដ្ឋអាមេរិក NCAA Championships នៅយប់ថ្ងៃព្រហស្បតិ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិសី ដែលមានចំណាត់ថ្នាក់លេខ១មកពីក្លឹប «ហែលទឹក និងលោតទឹក»របស់សកលវិទ្យាល័យ University of Texas បានឈ្នះមេដាយមាសថ្នាក់ជាតិអាមេរិក NCAA Championship នៅយប់ថ្ងៃព្រហស្បតិ៍ នៅមជ្ឈមណ្ឌល Greensboro Aquatic Center បន្ទាប់ពីការប្រកួត៦ជុំ។

ពិសី បានសរុបពិន្ទុពីការប្រកួតទាំង៦ជុំចំនួន ៤៣៥.៦០ពិន្ទុដើម្បីក្លាយជាអ្នកលោតទឹកលើវិញ្ញាសា១ម៉ែត្រច្រើនជាងគេបំផុតដើម្បីទទួលបានមេដាយមាសថ្នាក់ជាតិជាលើកទី២ក្នុងអាជីពរបស់កីឡាករអាមេរិកដើមកំណើតខ្មែររូបនេះ បន្ទាប់ពីលើកទី១រូបគេបានឈ្នះកាលពីឆ្នាំ២១៩។

ព្រឹត្តិការណ៍ប្រកួតលោតទឹកថ្នាក់ជាតិ NCAA Championships នឹងបន្តនៅថ្ងៃសុក្រ ទី២៦ និងសៅរ៍ ទី២៧ ខែមីនា នេះទើបចប់។

Jordan Pisey Windle កុមារកំព្រាមានស្រុកកំណើតនៅខេត្តព្រៃវែងបានទៅដល់សហរដ្ឋអាមេរិកតាំងពីរូបគេទើបអាយុបាន២ឆ្នាំម្ល៉េះ។ រូបគេត្រូវបានដាក់ឲ្យរស់នៅក្នុងមណ្ឌលកុមារកំព្រាមួយកន្លែងនៅទីក្រុងភ្នំពេញ បន្ទាប់ពីឪពុកម្តាយរបស់គេបានស្លាប់។

បន្ទាប់មកបុរសជនជាតិអាមេរិក Jerry Windle បានយកទៅចិញ្ចឹមធ្វើជាកូន និងរស់នៅសហរដ្ឋអាមេរិក តាំងពីមានអាយុត្រឹមតែជិត២ឆ្នាំប៉ុណ្ណោះ។

នៅអាយុ១២ឆ្នាំ ពិសី បានក្លាយជាកីឡាករលោតទឹកដ៏ឆ្នើមនៅអាមេរិកដោយចូលរួមប្រកួតថ្នាក់ជាតិ តំបន់ និងពិភពលោកជាច្រើន។

កាលពីខែឧសភា ឆ្នាំ២០១៦ ពិសី បានមកលេងប្រទេសកម្ពុជាដែលទឹកដីកំណើតម្តងហើយទទួលបានការស្វាគមន៍យ៉ាងខ្លាំងពីប្រជាជនខ្មែរ ក៏ដូចជាថ្នាក់ដឹកនាំផ្នែកកីឡាខ្មែរ។ ទោះជាយ៉ាងណា រូបគេនៅតែជាកីឡាករជម្រើសជាតិអាមេរិកសម្រាប់ការប្រកួតលក្ខណៈអន្តរជាតិ៕

អត្ថបទ៖ វីរបុត្រ
រូបថត៖ texassports

Related Topics:កីឡាលោតទឹក