កីឡា

លោតទឹកម៉ាឡេស៊ីខ្លាំងស្ទើរគ្មានគូប្រជែងនៅស៊ីហ្គេមដែលថ្មីសម្រាប់កម្ពុជា២០២៣

បានផុស

២ years មុន

នៅ

ថ្ងៃពុធ ២០ កក្កដា ២០២២

ដោយ

ម៉ាឡេស៊ីមានធនធានកីឡាករ កីឡាការិនីផ្នែកកីឡាលោតទឹកខ្លាំងជាងគេបំផុតនៅក្នុងប្រទេសអាស៊ានដែលចូលរួមប្រកួតកីឡាស៊ីហ្គេម។ ប្រភេទលោតទឹកនេះស្ថិតក្នុងចំណោមកីឡាហែលទឹក៤ប្រភេទដែលត្រូវដាក់ឲ្យប្រកួតជាផ្លូវការនៅក្នុងព្រឹត្តិការណ៍កីឡាស៊ីហ្គេម ឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះលើកដំបូងក្នុងប្រវត្តិសាស្ត្រ។

ហែលទឹកទាំង៤ប្រភេទគឺហែលទឹក (Swimming) លោតទឹក (Diving) បាល់ទឹក (Water Polo) និងហែលពាក់ជើងទា (Fin Swimming)។ ក្នុងចំណោមប្រភេទហែលទាំង៤នេះមានពីរថ្មីសុទ្ធសម្រាប់ម្ចាស់ផ្ទះកម្ពុជាគឺ លោតទឹក និង បាល់ទឹក។

កីឡាករម៉ាឡេស៊ីឈ្នះមេដាយមាសលោតទឹកនៅវៀតណាម

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

និយាយពីកីឡាលោតទឹក ប្រទេសម៉ាឡេស៊ីតែងតែប្រមូលយកមេដាយមាសស្ទើរតែទាំងអស់រាល់ការប្រកួតកីឡាស៊ីហ្គេម ជាពិសេសគិតចាប់តាំងពីស៊ីហ្គេមឆ្នាំ២០១៣រហូតដល់ឆ្នាំ២០២២នៅប្រទេសវៀតណាម ម៉ាឡេស៊ីប្រមូលយកបានមេដាយមាសស្ទើរតែគ្រប់វិញ្ញាសា។

ស៊ីហ្គេម ឆ្នាំ២០១៣ លោតទឹកមាន៨វិញ្ញាសា ម៉ាឡេស៊ីឈ្នះមេដាយមាសទាំង៨។ ឆ្នាំ២០១៥មាន៨វិញ្ញាសា ម៉ាឡេស៊ីឈ្នះមេដាយមាសទាំង៨ទៀត។ ឆ្នាំ២០១៧មាន១៣វិញ្ញាសា ម៉ាឡេស៊ីឈ្នះមេដាយមាស១២ ហើយសិង្ហបុរីឈ្នះមេដាយមាស១។ ឆ្នាំ២០១៩ មាន៤វិញ្ញាសា ម៉ាឡេស៊ីឈ្នះមេដាយមាសទាំង៤ ហើយចុងក្រោយស៊ីហ្គេម ឆ្នាំ២០២២នៅវៀតណាម មាន៨វិញ្ញាសា ម៉ាឡេស៊ីឈ្នះមេដាយមាសទាំងអស់ទៀត។

ដូច្នេះតាមរយៈលទ្ធផលនេះអាចនិយាយបានថា កីឡាលោតទឹកស្ទើរគ្មានប្រទេសណាផ្សេងនៅតំបន់អាស៊ានអាចប្រកួតប្រជែងជាមួយម៉ាឡេស៊ីឡើយ។

ចំពោះកម្ពុជាមិនធ្លាប់មានកីឡាលោតទឹក និងបាល់ទឹកទាំងការប្រកួតក្នុងស្រុក ឬចេញទៅប្រកួតនៅក្រៅប្រទេសដែរ ប៉ុន្តែកីឡាទាំងពីរប្រភេទនេះត្រូវបានដាក់ឲ្យប្រកួតនៅក្នុងកីឡាឆ្នាំ២០២៣។ យ៉ាងណា សហព័ន្ធខ្មែរកីឡាហែលទឹកកំពុងដុតដៃជើងដើម្បីប្រកួតប្រជែងក្នុងនាមជាម្ចាស់ផ្ទះ។

អ្នកតាមដានកីឡាកម្ពុជាប្រហែលជាធ្លាប់ដឹងហើយ កីឡាករ Jordan Pisey Windle ជាកូនកំព្រានៅប្រទេសកម្ពុជាត្រូវបានជនជាតិអាមេរិកយកទៅចិញ្ចឹម ហើយបានហ្វឹកហាត់កីឡាលោតទឹកជាប់ជម្រើសជាតិអាមេរិក និងបានតំណាងជាតិអាមេរិកចូលរួមការប្រកួតអូឡាំពិក២០២១នៅប្រទេសជប៉ុនទៀតផង៕

អត្ថបទ៖ វីរបុត្រ