កីឡា

ជម្រើសជាតិអាមេរិកកំណើតខ្មែរ ពិសី ជាប់ឈ្មោះជា«អ្នកលោតទឹកឆ្នើមប្រចាំឆ្នាំ»

បានផុស

៥ years មុន

នៅ

ថ្ងៃពុធ ៣១ មីនា ២០២១

ដោយ

កីឡាករជម្រើសជាតិអាមេរិកដើមកំណើតខ្មែរ ចូដាន ពិសី វីនដល (Jordan Pisey Windle) បានជាប់ឈ្មោះជា«កីឡាករលោតទឹកឆ្នើមប្រចាំឆ្នាំ២០២១» បន្ទាប់ពីទទួលបានលទ្ធផលល្អប្រសើរក្នុងការប្រកួតជើងឯកជាតិឆ្នាំ២០២១នេះ។

ការប្រកួតហែលទឹក និងលោតទឹកជ្រើសរើសជើងឯកថ្នាក់ជាតិអាមេរិក (NCAA Championships)ទើបបញ្ចប់ទៅកាលពីចុងសប្តាហ៍កន្លងទៅនេះ កីឡាករ ចូដាន ពិសី វីនដល បានឈ្នះជើងឯក (មេដាយមាស) សម្រាប់វិញ្ញាសាបុរសលោតទឹក១ម៉ែត្រ ។ រូបគេក៏ឈ្នះបានមេដាយប្រាក់សម្រាប់វវិញ្ញាសា៣ម៉ែត្រ និងទទួលបានចំណាត់ថ្នាក់លេខ៤សម្រាប់វិញ្ញាសា Platform។

តាមរយៈសមិទ្ធផលនេះ សមាគមគ្រូបង្វឹកហែលទឹក និងលោតទឹកមហាវិទ្យាល័យសហរដ្ឋអាមេរិក (CSCAA) បានជ្រើសរើស ពិសី ជាកីឡាករលោតទឹកឆ្នើមប្រចាំឆ្នាំ២០២១។

កាលពីឆ្នាំ២០១៩ ចូដាន ពិសី បានឈ្នះជើងឯកលោតទឹកលើវិញ្ញាសា Platform។

កីឡាករអាមេរិកដើមកំណើតខ្មែរ ពិសី បានជាប់ជម្រើសជាតិអាមេរិកតងពីឆ្នាំ២០១៥ដែលឆ្នាំនោះរូបគេបានចូលរួមប្រកួតជើងឯកពិភពលោកស្ថិតនៅចំណាត់ថ្នាក់លេខ៣លើវិញ្ញាសា៣ម៉ែត្រ។ ការប្រកួតជើងឯកពិភពលោកឆ្នាំ២០១៧ រូបគេបានបញ្ចប់នៅចំណាត់ថ្នាក់លេខ២៦លើវិញ្ញាសា Platform។

Jordan Pisey Windle ជាកុមារកំព្រាមានស្រុកកំណើតនៅខេត្តព្រៃវែងបានទៅដល់សហរដ្ឋអាមេរិកតាំងពីរូបគេទើបអាយុបាន២ឆ្នាំ។ រូបគេត្រូវបានដាក់ឲ្យរស់នៅក្នុងមណ្ឌលកុមារកំព្រាមួយកន្លែងនៅទីក្រុងភ្នំពេញ បន្ទាប់មកបុរសជនជាតិអាមេរិក Jerry Windle បានយកទៅចិញ្ចឹមធ្វើជាកូន និងរស់នៅសហរដ្ឋអាមេរិករហូតដល់បច្ចុប្បន្ន។

កាលពីខែឧសភា ឆ្នាំ២០១៦ ពិសី បានមកលេងប្រទេសកម្ពុជាដែលទឹកដីកំណើតម្តងហើយទទួលបានការស្វាគមន៍យ៉ាងខ្លាំងពីប្រជាជនខ្មែរ ក៏ដូចជាថ្នាក់ដឹកនាំផ្នែកកីឡាខ្មែរ។ ទោះជាយ៉ាងណា រូបគេនៅតែជាកីឡាករជម្រើសជាតិអាមេរិកសម្រាប់ការប្រកួតលក្ខណៈអន្តរជាតិ៕