ព័ត៌មានអន្ដរជាតិ

ប្រទេសសមាជិកណាតូ បិទផ្លូវមិនឲ្យមេដឹកនាំស្លូវវ៉ាគីនិងស៊ែប៊ីឆ្លងកាត់ទៅមូស្គូ

បានផុស

៩ នាទីutes មុន

នៅ

ថ្ងៃសៅរ៍ ១០ ឧសភា ២០២៥

ដោយ

នាយករដ្ឋមន្ត្រីស្លូវ៉ាគី លោក Robert Fico និង ប្រធានាធិបតីស៊ែប៊ី លោក Aleksandar Vucic បានធ្វើដំណើរផ្លូវវាងដ៏វែងឆ្ងាយមួយសម្រាប់ការចូលរួមពិធីខួប៨០ឆ្នាំនៃការប្រារព្វទិវាជ័យជម្នះសង្គ្រាមលោកលើកទី២លើពួកណាស៊ីអាល្លឺម៉ង់នៅក្នុងប្រទេសរុស្ស៊ីនៅថ្ងៃទី៩ខែឧសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មូលហេតុនៃការធ្វើដំណើរលើផ្លូវវាងដ៏វែងឆ្ងាយនេះដោយសារតែដំណើរផ្លូវកាត់ចម្ងាយខ្លីត្រូវឆ្លងកាត់ប្រទេសមួយចំនួនដែលជាសមាជិកអង្គការណាតូ និងមានសមានចិត្តជាមួយប្រទេសអ៊ុយក្រែន បានបិទដែនអាកាសរបស់ពួកគេ មិនឲ្យមេដឹកនាំផ្សេងៗធ្វើដំណើរឆ្លងកាត់ទៅចូលរួមជាមួយមេដឹកនាំរុស្ស៊ីក្នុងព្រឹត្តិការណ៍អន្តរជាតិនោះ។

ប្រទេសអេស្តូនី ឡេតូនី និងលីទុយអានី សមាជិកសហភាពអឺរ៉ុបនិងជាសមាជិករបស់អង្គការប្រដាប់អាវុធណាតូ ដែលនៅជាប់ព្រំដែនជាមួយប្រទេសរុស្ស៊ី និងបេឡារុស កាលពីថ្ងៃពុធបានបដិសេធមិនឱ្យយន្តហោះរបស់មេដឹកនាំប្រទេសតំបន់អឺរ៉ុបដែលមានទំនោរទៅរកប្រធានាធិបតីរុស្ស៊ី លោក វ៉្លាឌីមៀរ ពូទីន ចូលទៅក្នុងដែនអាកាសរបស់ពួកគេ។

យោងតាមគេហទំព័រព័ត៌មាន Dennik មានមូលដ្ឋាននៅប្រទេសស្លូវ៉ាគី យន្តហោះរបស់នាយករដ្ឋមន្ត្រីស្លូវ៉ាគីបានហោះហើរទៅកាន់ទីក្រុងមូស្គូលើផ្លូវវាងតាមភាគខាងត្បូងដែលវែងឆ្ងាយជាងដំណើរធម្មតា។ តាមសេចក្តីរាយការណ៍នោះ យន្តហោះរបស់នាយករដ្ឋមន្ត្រីស្លូវ៉ាគី បានធ្វើដំណើរឆ្លងកាត់ប្រទេសហុងគ្រី រ៉ូម៉ានី សមុទ្រខ្មៅ និងហ្សកហ្ស៊ី មុនទៅដល់ទីក្រុងមូស្គូ។

តាមសេចក្តីរាយការណ៍នោះ ប្រធានាធិបតីស៊ែប៊ី លោក Aleksandar Vucic ក៏ត្រូវរងនូវការបិទដែនអាកាស ហើយត្រូវធ្វើដំណើរផ្លូវវាងវែងឆ្ងាយដូចគ្នាដែរ។

ប្រធានាធិបតីស៊ែប៊ី លោក Aleksandar Vucic។ TASS

យោងសេចក្តីរាយការណ៍របស់ទីភ្នាក់ងារព័ត៌មានរុស្ស៊ី TASS អ្នកនាំពាក្យវិមានក្រឹមឡាំង លោក Dmitry Peskov បាននិយាយនៅលើកញ្ចក់ទូរទស្សន៍ Channel One ថា មេដឹកនាំអន្តរជាតិជាច្រើនបានមកទីក្រុងមូស្គូ ដើម្បីប្រារព្ធខួបលើកទី៨០ឆ្នាំ នៃជ័យជម្នះលើពួកណាស៊ីអាល្លឺម៉ង់ បើទោះបីជាមានសម្ពាធឱ្យនៅឆ្ងាយក៏ដោយ។

នៅពេលត្រូវបានសួរថាតើការប្រារព្ធពិធីបានធ្លាក់ចុះយ៉ាងដូចម្តេច បន្ទាប់ពីការព្រមានដល់អ្នកចូលរួមអន្តរជាតិប្រឆាំងនឹងការមកទស្សនាទីក្រុងម៉ូស្គូ លោក Peskov បាននិយាយថា៖«ជាការពិតណាស់ ពួកគេជាច្រើនបានមកទីនេះ ទោះបីជាមានសម្ពាធខ្លាំងក៏ដោយ»៕

ដោយ រ៉ាន់ រើយ