សុខភាព

សូមកុំត្រេកត្រអាលនឹងការបរិភោគទុរេនច្រើនពេក ព្រោះវាអាចបង្កហានិភ័យដល់សុខភាព

បានផុស

១ year មុន

នៅ

ថ្ងៃព្រហស្បតិ៍ ២២ ឧសភា ២០២៥

ដោយ

ការបរិភោគទុរេនច្រើនលើសកម្រិត ពិតជាអាចបង្កហានិភ័យដល់សុខភាពពិតមែន។ ទោះបីវាមានអត្ថប្រយោជន៍ផ្នែកអាហារូបត្ថម្ភដូចជា វិតាមីន C, ប៉ូតាស្យូម, សារជាតិចិញ្ចឹម សារធាតុរ៉ែ និងជាតិស្ករពីធម្មជាតិក៏ដោយ តែវាមានផលប៉ះពាល់ប្រសិនបើបរិភោគមិនត្រឹមត្រូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទុរេនមានជាតិស្ករខ្ពស់ ដូចជា ស្ករធម្មជាតិ ហ្វ្រ៊ុកតូស និងគ្លុយកូស ជាពិសេស ទុរេន១០០ក្រាមផ្ទុកនូវកាឡូរី ១៤០ ទៅ ១៦០ និងជាតិស្ករសំខាន់ៗផ្សេងទៀត។ ការទទួលទានទុរេនច្រើនអាចនាំឲ្យឡើងទម្ងន់ និងអាចបង្កើនកម្រិតជាតិស្ករក្នុងឈាម និងគ្រោះថ្នាក់ដល់សុខភាពបេះដូងដែលជាហានិភ័យសម្រាប់អ្នកដែលមានជំងឺទឹកនោមផ្អែម, អ្នកដែលព្យាយាមគ្រប់គ្រងទម្ងន់ ឬជាតិស្ករក្នុងឈាម។

មិនតែប៉៉ុណ្ណោះ ទុរេនត្រូវបានគេចាត់ទុកថាមានកំដៅខ្លួនខ្ពស់ បង្កជាតិក្តៅក្នុងរាងកាយនាំឲ្យអ្នកហូបមានបញ្ហា រោគរូស,ដំបៅមាត់, ក្អក, ឈឺក, ការទល់លាមក, និងខ្សោយ។ ជាពិសេស មានអារម្មណ៍ធ្ងន់ខ្លួន ពិបាកដាច់ដង្ហើមនិងរំលាយអាហារជាដើម។

លើសពីនេះទៀត សម្រាប់អ្នកដែលនិយមទទួលទានទុរេនលាយឡំជាមួយស្រា ក៏អាចបង្កការប៉ះទង្គិចក្នុងកោសិកាពោះវៀននិងថ្លើម ដោយសារតែសារធាតុស្ពាន់ធ័រក្នុងទុរេន ធ្វើឲ្យរាងកាយពិបាកបំបែកអាល់កុល។ ជាពិសេស វាក៏នាំឲ្យហើមពោះ ចង្អោរ ឬសូម្បីតែជំងឺបេះដូង។

ទោះជាយ៉ាងណាក៏ដោយ សម្រាប់មនុស្សដែលចូលចិត្តទុរេនជាប្រចាំ អ្នកក៏អាចហូបបានដោយមិនបាច់ភ័យខ្លាចថាវានឹងបង្កហានិភ័យដល់សុខភាពនោះទេ បើសិនអ្នកទទួលទានក្នុងបរិមាណសមរម្យ។ មនុស្សពេញវ័យដែលមានសុខភាពល្អ អាចកំណត់ត្រឹមប្រហែល ១០០ទៅ១៥០ក្រាម ឬ ២ទៅ ៣ផ្នែកនៃទុរេនមួយផ្លែ។ ជាពិសេស ក៏មិនគួរញ៉ាំច្រើនថ្ងៃជាប់ៗគ្នាពេកដែរ។

ចំពោះអ្នកមានអ្នកជំងឺទឹកនោមផ្អែម, ជំងឺបេះដូង, ឬសម្ពាធឈាមខ្ពស់ គួរពិគ្រោះជាមួយវេជ្ជបណ្ឌិតមុនពេលទទួលទាន។ បើទទួលទានលើសកម្រិត គួរផឹកទឹកឲ្យបានច្រើន និងចៀសវាងអាហារដែលមានជាតិខ្លាញ់ ឬជាតិស្ករខ្ពស់ផ្សេងទៀតក្នុងពេលតែមួយ៕