កសិករក្នុងខេត្តបាត់ដំបង បានធ្វើការដាំដុះដំណាំស្រូវ បានលឿនបើធៀបឆ្នាំ២០២៤

ប្រជាកសិករនៅតាមតំបន់គោលដៅកសិកម្មមួយចំនួនក្នុងខេត្តបាត់ដំបង បានចាប់ផ្តើមធ្វើដំណាំស្រូវជាបន្តបន្ទាប់ ខណះមានភ្លៀងធ្លាក់ជាបន្តបន្ទាប់ ចាប់ពីដើមខែឧសភា រហូតមកដល់ពេលនេះ។

កសិករក្នុងឃុំព្រៃតូច ស្រុកមោងឫស្សី លោក សឹម ឌី បានឲ្យដឹងថា លោកបានធ្វើការដាំដុះជាង២អាទិត្យមកហើយ ព្រោះ ទឹកភ្លៀងបានធ្លាក់ជាបន្តបន្ទាប់ ចាប់ពីដើមខែឧសភានេះ ហើយកសិករក្នុងភូមិ ក៏បានសម្រុកនាំគ្នាធ្វើការដាំដុះរួចរាល់ខ្លះៗ ដែរហើយ។

លោកថា កាលពីឆ្នាំកន្លងទៅ លោកនិងកសិករផ្សេងៗទៀត បានចាប់ផ្តើមដាំដុះចាប់ពីចុងខែឧសភា តែឆ្នាំនេះបានចាប់ផ្តើមដាំពីដើមខែឧសភា ដោយសារតែកត្តាទឹកភ្លៀង។

បើតាមកសិកររូបនេះបានបញ្ជាក់ថា “នៅក្នុងភូមិខ្ញុំ “ភូមិកូនខ្លុង” អ្នកភូមិបានធ្វើរួចរាល់ស្ទើរទាំងអស់ ហើយដើមស្រូវកំពុង​តែលូតលាស់ល្អ ឆ្នាំនេះខ្ញុំនឹងបានប្រមូលផលចូលទីផ្សារបានលឿនជាងឆ្នាំមុន ហើយទិន្នផលក៏នឹងកើនជាងឆ្នាំមុនដែរ”។

ចំណែកកសិករ នៅក្នុងឃុំគា ស្រុកមោងឫស្សី គឺលោក ប៊ុនឡឹប បានសម្តែងអារម្មណ៍ថា “ខ្ញុំសប្បាយចិត្តឆ្នាំនេះ ខ្ញុំក៏មិនបានដឹងច្បាស់ដែរទៅលើអាកាសធាតុ ខ្ញុំបានភ្ជួរដីហាលតាំងពីចូលឆ្នាំហើយមកម្លេះ ហើយក៏បានភ្ជួរប្រែដី ១ លើកទៀត​នៅចុងខែ មេសា តាមទម្លាប់ រង់​ចាំទឹកភ្លៀងជោកជាំនៅចន្លោះពីចុងខែឧសភា និងដើមខែមិថុនា តែគួរឲ្យសប្បាយចិត្តដែលបានភ្លៀងធ្លាក់ជាប់គ្នានៅដើមខែឧសភានេះ ខ្ញុំបានធ្វើការដាំដុះបានលឿនជាងឆ្នាំមុន”។

លោក ហេង សិទ្ធ មន្ត្រីនៃមន្ទីរកសិកម្មខេត្ត បានឲ្យដឹងថា បើគិតចាប់ពីដើមខែឧសភា រហូតមកដល់ពេលនេះ កសិករបានធ្វើការដាំដុះផលដំណាំស្រូវបានប្រមាណជាង ៥ មុឺនហិកតា បើធៀបផែនការបានជាង១០ភាគរយ។

លោកថា ពេលនេះនៅមិនទាន់ស្រង់ទិន្នន័យជាក់លាក់នៅឡើយថា តើឆ្នាំនេះផលដំណាំស្រូវបានកើនឡើងជាងឆ្នាំមុនឬយ៉ាងណានោះ គឺរង់​ចាំរហូត ដល់រយះពេលជាក់លាក់ក្នុងខែតុលា ដែលជារយះពេលកសិករត្រូវបានបញ្ចប់នៃការដាំដុះស្រូវ​ទាំងស្រុង ទើបខាងជំនាញធ្វើការស្រង់ទិន្នន័យនិងធ្វើការប្រៀបធៀបបាន៕

អត្ថបទ÷សៅ សារិទ្ធ