ព័ត៌មានជាតិ

រដូវបៃតង (Green Season) ក្នុងមួយសប្ដាហ៍ខេត្តមណ្ឌលគិរីទទួលទេសចរបានជិត៨ពាន់នាក់

បានផុស

១ year មុន

នៅ

ថ្ងៃចន្ទ ២៦ ឧសភា ២០២៥

ដោយ

ភ្ញៀវទេសចរជាតិនិងអន្តរជាតិជាបន្តបន្ទាប់បានទៅកម្សាន្តខេត្តមណ្ឌលគិរីច្រើនហូរហែមិនថាថ្ងៃបុណ្យជាតិ ឬថ្ងៃធម្មតា ក្នុងរដូវទេសចរណ៍ រដូវបៃតង ឬ Green Seasonនេះ។ បើតាមប្រធានមន្ទីរទេសចរណ៍ខេត្តមនុស្សជិត៨ពាន់នាក់បានធ្វើដំណើរកម្សន្តនៅខេត្តមណ្ឌលគិរីកាលពីសប្ដាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានមន្ទីរទេសចរណ៍ខេត្តមណ្ឌលគិរីលោក ស៊ាង សឿន បានឱ្យកម្ពុជាថ្មីដឹងថារយៈពេលក្នុងមួយសប្តាហ៍ពីថ្ងៃច៍ន្ទទី១៩ រហូតដល់អាទិត្យ ទី២៥ ខែឧសភា មានភ្ញៀវទេសចរជាតិនិងអន្តរជាតិបានមកកម្សាន្តនៅតាមរមណីដ្ឋានផ្សេងៗទូទាំងខេត្តមណ្ឌលគិរីសរុបចំនួន ៧ ៧៨៧នាក់ ក្នុងនោះភ្ញៀវទេសចរបរទេស ៩៧នាក់។

លោកបានបញ្ជាក់ថា៖ «ទោះបីជារដូវនេះមិនមែនជារដូវប្រាំង ហើយមានភ្លៀងធ្លាក់ជាហូហែក៏ដោយប៉ុន្តែភ្ញៀវទេសចរជាតិនិងអន្តរជាតិនៅតែចង់ដឺងចង់ស្គាល់ខេត្តនៅតំបន់ភូមិភាគឥឦសាន្តប្រទេសកម្ពុជា ដែលសម្បូរទៅដោយសម្បត្តិធនធានធម្មជាតិ ដ៏ច្រើនសម្បូបែប ហើយអ្វីដែលពិសេសខែនេះខេត្តមណ្ឌលគិរីមានវាលស្មៅលូតលាស់ខៀវខ្ចីស្រស់បំព្រងផ្កាព្រៃរីកស្គុសស្គាយគួជាទីចាប់ចិត្តទាក់ទាញភ្ញៀវទេសចរឲ្យមកទស្សនាកម្សាន្តនារដូវនេះ»។

រដ្ឋាភិបាលកម្ពុជាបានសម្រេចដាក់ចេញនូវយុទ្ធនាការ «រដូវកាលបៃតង» (Green Season) កាលពីថ្ងៃទី២៧ ខែកុម្ភៈ កន្លងទៅដើម្បីជំរុញទេសចរណ៍ក្នុងស្រុក និងពង្រាយភ្ញៀវទេសចរឱ្យបានច្រើនគ្រប់ខែ។ រដ្ឋាភិបាលបានណែនាំក្រសួងទេសចរណ៍ សហការជាមួយស្ថាប័នពាក់ព័ន្ធ រដ្ឋបាលថ្នាក់ក្រោមជាតិ និងវិស័យឯកជន ក្នុងការរៀបចំយន្តការឱ្យមានប្រសិទ្ធភាព និងប្រសិទ្ធភាពខ្ពស់។

គួរឱ្យដឹងដែរថា ទេសចរណ៍រដូវកាលបៃតង ចាប់ពីខែមេសា ដល់តុលា ដែលត្រូវយកមកជំនួសពាក្យថា Low Season ដែលបានប្រើពីកន្លងទៅ៕