សមាគមសិល្បករខ្មែរ អាណត្តិទី៦ បង្ហាញឆន្ទ:យ៉ាងមុតម៊ាំរបស់ខ្លួនលើគោលបំណងធំ៥

ស្ថិតក្នុងអាណត្តិទី៦នេះ ប្រធានសមាគមសិល្បករខ្មែរលោកជំទាវអ្នកឧកញ៉ា ម៉ៅ ចំណាន គិតម៉េង បានប្រកាសពីឆន្ទ:របស់សមាគម ដែលចង់ប្រមូលផ្តុំបណ្តាសិល្បករសិល្បការិនីគ្រប់ជំនាញនិងគ្រប់ជំនាន់។

ផ្អែកតាមសេចក្តីប្រកាសរបស់សមាគមបានលើកឡើងថា លក្ខន្តិកៈរបស់សមាគមសិល្បករខ្មែរជំពូកទី១ ប្រការទី១ ចែងថា “គោលបំណង និងគោលដៅសមាគមសិល្បករខ្មែរ អាណត្តិទី៦ គឺដើម្បីប្រមូលផ្តុំបណ្តាសិល្បករគ្រប់ជំនាញនិងគ្រប់ជំនាន់ក្នុងគោលដៅធំ ៥ រួមមាន៖
១. ជាដៃគូដ៏សំខាន់របស់ក្រសួងវប្បធម៌ និងវិចិត្រសិល្ប: ក្នុងកិច្ចការអភិរក្ស ការពារអភិវឌ្ឍ និងលើកស្ទួយសិល្បៈវប្បធម៌ជាតិ។
២. ការពារសិទ្ធិនិងផលប្រយោជន៍របស់សមាជិក។
៣. ស្វែងរកសប្បុរសជន ដើម្បីជួយដល់សកម្មភាពសិល្ប:និងកិច្ចការសង្គម។
៤ .ប្រមូលកម្លាំងធនធានសិល្បករសិល្បការិនីដើម្បីបម្រើសកម្មភាពសិល្ប:និងកិច្ចការសង្គម។
៥. រួមចំណែកលើកកម្ពស់សីលធម៌សង្គម និងក្រមសីលធម៌វិជ្ជាជីវៈរបស់សិល្បករ។

គួរជម្រាបដែរថា រយៈពេលប្រមាណជា ១០ខែ សមាគមសិល្បករខ្មែរ អាណត្តិទី៦ ដែលមានលោកជំទាវអ្នកឧកញ៉ា ម៉ៅ ចំណាន ជាប្រធាន ពិតជាសកម្មខ្លាំងទាំងផ្នែកសប្បុរសធម៌ សកម្មភាពសង្គមនានា ទាំងការងារសិល្បៈ និងទិសដៅលើកស្ទួយវប្បធម៌ជាតិតាមគ្រប់រូបភាព។

កាលពីខែមីនាកន្លងទៅ ប្រធានសមាគមក៏ធ្លាបបានប្រកាសពីទិសដៅធំរបស់ខ្លួន ដែលបាននិងកំពុងរៀបចំកែប្រែសមាគមមួយនេះ​ ក្លាយជាស្ថាប័នតំណភ្ជាប់ធំមួយ ក្នុងការជួយផ្សព្វផ្សាយសិល្បៈវប្បធម៌ អរិយធម៌ខ្មែរ ឱ្យកាន់តែទូលំទូលាយ ទាំងនៅលើឆាកជាតិ-អន្តរជាតិ។ សកម្មភាពទាំងអស់នេះ ក៏ទទួលបានការគាំទ្រ និងកោតស្ញប់ស្ញែងពីពីសំណាក់មហាជន ពិសេសអ្នកសិល្ប:៕ អត្ថបទ៖ ចាន់រ៉ា