អ៊ីស្រាអែល បាញ់សម្លាប់ពលរដ្ឋប៉ាឡេស្ទីនច្រើននាក់ទៀត ពេលរង់ចាំយកជំនួយ នៅ ហ្គាហ្សា

ក្រុមហាម៉ាសអះអាងថា កងទ័ពអ៊ីស្រាអែល បានបើកការបាញ់ប្រហារទៀតហើយលើពលរដ្ឋប៉ាឡេស្ទីន ដែលកំពុងរង់ចាំយកជំនួយនៅតំបន់ហ្គាហ្សា ដោយបណ្តាលឲ្យមានមនុស្សស្លាប់២៧នាក់ និង៩០នាក់ទៀតរងរបួស។ នេះបើតាមការចុះផ្សាយរបស់ BBC នៅថ្ងៃអង្គារទី៣ខែមិថុនាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកមន្ទីរពេទ្យមួយបានឲ្យដឹងថា ពលរដ្ឋប៉ាឡេស្ទីនត្រូវគ្រាប់កាំភ្លើងពេលរង់ចាំទទួលស្បៀង នៅក្បែរកន្លែងចែកជំនួយក្នុងទីក្រុង Rafah ខណៈអ្នករបួសត្រូវបញ្ជូនទៅកាន់មន្ទីរពេទ្យ Nasser ក្នុងតំបន់ Khan Younis។

ទោះបីជាយ៉ាងណាក៏ដោយ កងកម្លាំងការពារអ៊ីស្រាអែល (IDF) បានចេញសេចក្តីថ្លែងការណ៍ភ្លាមៗថា ខ្លួនឃើញមានជនសង្ស័យនៅក្បែរទីតាំងចែកជំនួយនោះ។ តាមការអះអាងពី IDF, ដំបូងខ្លួនគ្រាន់តែបាញ់ព្រមានទេ ប៉ុន្តែដោយសារជនសង្ស័យមិនព្រមប្រគល់ខ្លួន ក៏សម្រេចចិត្តបាញ់កៀកជនសង្ស័យមួយចំនួនដែលរត់សំដៅមកកងទ័ពតែម្តងទៅ។

នេះគឺជាសោកនាដកម្មថ្មីទៀតដែលកើតលើពលរដ្ឋប៉ាឡេស្ទីនខណៈរង់ចាំយកជំនួយ បន្ទាប់ពីកាល​ពី​ថ្ងៃ​អាទិត្យ​ ក្រសួងសុខាភិបាលដែល​គ្រប់គ្រង​ដោយ​ក្រុមហាម៉ាស ក៏រាយការណ៍ដែរ មនុស្ស៣១​នាក់ ​ត្រូវបានសម្លាប់និងជាង១៧០​នាក់ទៀត រងរបួសនៅជិតកន្លែងចែកចាយ​ស្បៀង​ក្នុង​ទីក្រុង​ Rafah នេះ។

ជុំវិញហេតុការណ៍នោះដែរ ប្រមុខអង្គការសហប្រជាជាតិ បានអំពាវនាវឲ្យមានការស៊ើបអង្កេតជាបន្ទាន់ ដោយលោក Antonio Guterres បានថ្កោលទោសនិងចេញសេចក្តីថ្លែងការណ៍នៅថ្ងៃអង្គារ «ខ្ញុំតក់ស្លុតចំពោះរបាយការណ៍អំពីការស្លាប់និងរបួសពលរដ្ឋប៉ាឡស្ទីនខណៈពេលស្វែងរកជំនួយនៅហ្គាហ្សា កាលពីម្សិលមិញ។ វាមិនអាចទទួលយកបានទេដែលពលរដ្ឋប៉ាឡេស្ទីន ត្រូវប្រថុយជីវិតដើម្បីតែអាហារ។ ដូច្នេះខ្ញុំសូមអំពាវនាវឲ្យបើកការស៊ើបអង្កេ​តជាបន្ទាន់និងឯករាជ្យលើព្រឹត្តិការណ៍នោះ ហើយឲ្យអ្នកប្រព្រឹត្តិមកទទួលខុសត្រូវចំពោះមុខច្បាប់»។

សូមជម្រាបជាថ្មី មនុស្សជិត ៤ ០០០​នាក់ត្រូវបានសម្លាប់នៅតំបន់ហ្គាហ្សាក្នុងរយៈពេល ១០​សប្តាហ៍កន្លងមកនេះ ខណៈ UN និយាយថា មនុស្ស ៦០​ម៉ឺន​នាក់ផ្សេងទៀតត្រូវបានផ្លាស់ទីលំនៅសាជាថ្មី​ ដោយប្រតិបត្តិការជើងគោកនិងបញ្ជាជម្លៀសរបស់អ៊ីស្រាអែល។

ទន្ទឹមនោះរបាយការណ៍របស់អង្គការ IPC គាំទ្រដោយ UN ព្រមានថា មនុស្សប្រហែល ៥០​ម៉ឺន​នាក់នឹង​ប្រឈមមុខជាមួយភាពអត់ឃ្លានក្នុងកម្រិតដ៏មហន្តរាយ នា​ប៉ុន្មានខែខាងមុខនេះ៕

អត្ថបទ៖ សុខ សុវណ្ណ

ចុចអាន៖ ប្រមុខ​ UN អំពាវនាវឲ្យស៊ើបអង្កេតជាបន្ទាន់ លើហេតុការណ៍បាញ់ពលរដ្ឋប៉ាឡេស្ទីន នៅជិតកន្លែងចែកស្បៀង