ព័ត៌មានជាតិ

ផលិតកម្មបរទេសបន្តបន្ទាប់ ចុះមកថតនៅតំបន់រមណីយដ្ឋានអង្គរ ផ្សព្វផ្សាយទៅក្រៅប្រទេស

បានផុស

៤២ វិនាទី មុន

នៅ

ថ្ងៃពុធ ៤ មិថុនា ២០២៥

ដោយ

រមណីយដ្ឋានអង្គរបានក្លាយជាគោលដៅដ៏ទាក់ទាញមួយសម្រាប់ផលិតកម្មក្រៅស្រុក និងក្នុងស្រុក ដែលមួយរយៈចុងក្រោយនេះបានសហការជាមួយអាជ្ញាធរជាតិអប្សរា ចុះមកថតជាផ្ទាំងទស្សនីយភាពផ្សព្វផ្សាយទៅក្រៅប្រទេស។

លោក សេង សុធារ៉ា ប្រធាននាយកដ្ឋានអភិវឌ្ឍន៍ និងទេសចរណ៍នៃអាជ្ញាធរជាតិអប្សរាបានគូសបញ្ជាក់ថា ផលិតកម្មមកពីប្រទេសចិនបានចុះអនុស្សរណៈយោគយល់ជាមួយអាជ្ញាធរជាតិអប្សរា ដើម្បីសហការក្នុងការថតជាផ្ទាំងទស្សនីយភាពពីអច្ឆរិយនៃតំបន់រមណីយដ្ឋានអង្គរ ដើម្បីផ្សព្វផ្សាយទាក់ទាញទេសចរចិនមកកម្សាន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីផលិតកម្មមានមូលដ្ឋាននៅបរទេស ក៏មានផលិតកម្មក្នុងស្រុកមួយចំនួនដែលសហការជាមួយផលិតកម្មក្រៅស្រុក បានស្នើទីតាំងនៅតំបន់រមណីយដ្ឋានអង្គរ ដើម្បីថតជាផ្ទាំងទស្សនីយភាពនិងស្ពតផ្សព្វផ្សាយជាបន្តបន្ទាប់។ លោក សេង សុធារ៉ា បន្ថែម។

លោក សេង សុធារ៉ា បានបញ្ជាក់ថា អាជ្ញាធរតែងតែសហការនិងលើកទឹកចិត្ត ដើម្បីជំរុញការផ្សព្វផ្សាយពីរមណីយដ្ឋានអង្គរឲ្យបានទូលំទូលាយ ដើម្បីធ្វើឲ្យតំបន់នេះក្លាយជាគោលដៅអាចទាក់ទាញទេសចរមកកម្សាន្តកាន់តែច្រើនថែមទៀត។

បើតាមមន្រ្តីអាជ្ញាធរអប្សរា នៅឆ្នាំ ២០២៤ មានផលិតកម្មចំនួន ២ បានជ្រើសរើសតំបន់ភ្នំគូលែនថតជាស្ពតផ្សព្វផ្សាយដោយសារជាទីតាំងដែលមានសក្តានុពលល្អ ហើយដែលត្រូវបានយកទៅផ្សព្វផ្សាយនៅតាមបណ្តាញសង្គម និងព័ត៌មានធំៗនៅលើពិភពលោក៕