កម្ពុជាតេស្ដសំណាក រកមិនឃើញសារធាតុគីមីបង្កជំងឺលើទុរេននាំចូល

កម្ពុជាមិនមានរកឃើញសារធាតុបង្ករជំងឺលើទុរេននាំចូលពីប្រទេសថៃ និងវៀតណាម ចាប់តាំងពីរដ្ឋាភិបាលបានធ្វើការរឹតបន្តឹងក្នុងការនាំចូលទុរេនជ្រលក់ថ្នាំ ដែលបង្ករជំងឺ។

លោក ឌិត ទីណា រដ្ឋមន្ត្រីក្រសួងកសិកម្ម បានលើកឡើងនៅក្នុងសមាជរដ្ឋសភា និងព្រឹទ្ធ​សភាថ្ងៃទី ០៣ ខែមិថុនា​ថា វៀត​​ណាមក៏ដោយ ថៃក៏ដោយ នៅពេលដែលគាត់​ទទួលបាន​នូវ​ការមិន​អនុញ្ញាតឱ្យនាំចូល​ទុរេនពីប្រទេសចិន គឺមានការ​ភ្ញាក់ខ្លួន ក្នុងការជ្រលក់ថ្នាំ​ហើយ​ថ្នាំ​​​ដែល​​ជ្រលក់​ទុរេននេះ វាមិនមែនថ្នាំដាក់​នៅដើមទុ​រេន​ទេ គឺជ្រលក់ផ្លែ។

លោករដ្ឋមន្ត្រីបញ្ជាក់ថា៖ «ទំនិញដែលជ្រលក់យើងអត់ឱ្យចូលទេ ពីព្រោះ​យើងធ្វើការជាមួយក្រសួងពាណិជ្ជកម្ម ជាគយ និងកាំកុងត្រូល គឺបាន​យកសំណាក បើ​ទុរេននាំចូលគឺបានយកសំណាក មកពិនិត្យរួចហើយ ឃើញថា អត់មាន​អីទេ តាំងពីយើង​ចាប់ផ្ដើមរឹតបន្តឹងទុរេនមក គឺអត់ហានយកទុរេនមានថ្នាំចូលទេ»។

លោករដ្ឋមន្ត្រី ឌិត ទីណា បានថ្លែងថា ក្រសួងកសិកម្ម បានសហការជាមួយក្រសួងពាណិជ្ជកម្ម និងមន្ត្រីជំនាញនៅតាមច្រកព្រំដែន ដោយធ្វើ​ការត្រួតពិនិត្យលើផ្លែទុរេន មុននឹងអនុញ្ញាតឱ្យ​នាំចូលពីប្រទេសជិតខាង ដើម្បីទប់ស្កាត់​កុំឱ្យនាំចូលទុរេនមានជាតិគីមី នាំឱ្យប៉ះពាល់ដល់សុខ​ភាពអ្នកបរិភោគ។

លោក ឃឹម ប៊ុនឡែន ស្ថាបនិក និងជានាយកប្រតិបត្តិ សហគមន៍ចម្ការស្តេច​ទុរេន​បានលើកឡើងថា ការរឹតត្បិតទុរេននាំចូលពីវៀតណាម និងថៃ​ របស់រាជរដ្ឋាភិបាលកម្ពុជា មានប្រសិទ្ធ​ភាពល្អ ខណៈការដឹកជញ្ជូន​ចូលមកហាក់មិនមានច្រើនដូចមុន ដែលបានចូលរួមដល់ការលើកកម្ពស់ទីផ្សារក្នុងស្រុក។

កាលពីថ្ងៃទី ១៨ ខែកុម្ភៈ ឆ្នាំ ២០២៥ រាជរដ្ឋាភិបាល បានសម្រេចឱ្យក្រសួងពាណិជ្ជកម្ម រៀបចំសមត្ថភាពមន្ទីរពិសោធន៍លើការវិភាគរកសារធាតុគីមី ​Basic Yellow 2 បន្ទាប់ពីប្រទេសចិនបានរឹតត្បិត​ការនាំចូលផ្លែទុរេន​ពីវៀតណាម និងថៃ ដើម្បីជួយគាំទ្រដល់អគ្គនាយកដ្ឋានគយ និងរដ្ឋាករកម្ពុជា ក្នុងការវិភាគ នៅតាមមាត់ច្រកព្រំដែន នៅពេលដែលមានការនាំចូលផ្លែទុរេនស្រស់ ដែលមិនមានវិញ្ញាបនបត្របញ្ជាក់ និងធានាមិនឱ្យមានការប្រើប្រាស់សារធាតុទាំងពីរនេះ លើផលិតផលក្នុងស្រុក ដើម្បីការពារអ្នកប្រើប្រាស់។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មប្រាប់កម្ពុជាថ្មីថា អាជ្ញាធរស្ថាប័នពាក់ព័ន្ធបានដាក់ចេញវិធានទប់ស្កាត់ការហាមឃាត់ទុរេនដែលមាន​​សារធាតុគីមីលួចនាំចូលមក។

លោកថា ក្រសួងពាណិជ្ជកម្ម បានសហការជិតស្និទ្ធជាមួយអាជ្ញាធរ​គយ និងមន្ត្រីអនាម័យ និងភូតគាមអនាម័យ របស់ក្រសួងកសិកម្ម ក្នុងការត្រួតពិនិត្យរកមើលទំនិញដែលផ្ទុកសារធាតុគីមី។

លោក ប៉ែន សុវិជាតិ បន្ថែមថា ក្រសួងពាណិជ្ជកម្មបានអប់រំឱ្យម្ចាស់ចម្ការទុរេន និងអ្នកលក់ផ្លែឈើទាំងអស់កុំឱ្យនាំចូលទុរេនបរទេសហើយកុហកបន្លំថា ជាទុរេនរបស់ខ្មែរ ដើម្បីការពារអ្នកប្រើប្រាស់ និងសុខមាលភាពរបស់ប្រជាពលរដ្ឋ៕

អត្ថបទ៖ ឡេង ដេត