ព័ត៌មានជាតិ

ភ្នាក់ងារតំណាងសហគ្រាសដឹកជញ្ជូនទំនិញតាមផ្លូវទឹកជាអន្តរជាតិ ត្រូវអនុវត្តវិធាន ៣ ដើម្បីបានចំណូលកម្រៃជើងសា

បានផុស

១ year មុន

នៅ

ថ្ងៃពុធ ១១ មិថុនា ២០២៥

ដោយ

ពាក់ព័ន្ធទៅនិងការដឹកជញ្ជូនតាមផ្លូវទឹកជាអន្តរជាតិ សហគ្រាសជាភ្នាក់ងារ ដែលបំពេញតួនាទីជាអ្នកតំណាងសហគ្រាសដឹកជញ្ជូនទំនិញជាអន្តរជាតិ ចាំបាច់ត្រូវអនុវត្តវិធាន ៣ ចំណុចសំខាន់ៗ ដើម្បីអាចទទួលបានចំណូលពីកម្រៃជើងសារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីប្រកាសចេញដោយក្រសួងសេដ្ឋកិច្ច និងហិរញ្ញវត្ថុ ស្តីពី«កាតព្វកិច្ចចំពោះសកម្មភាពភាពអាជីវកម្មដឹកជញ្ជូនតាមផ្លូវទឹកជាអន្តរជាតិ» បានឱ្យដឹងថា ភ្នាក់ងារដឹកជញ្ជូនទំនិញតាមផ្លូវទឹកជាអន្តរជាតិ ជាពិសេសសហគ្រាសជាភ្នាក់ងារ ដែលបំពេញតួនាទីជាអ្នកតំណាងរបស់សហគ្រាសដឹកជញ្ជូនទំនិញ ដើម្បីអាចទទួលបានចំណូលពីកម្រៃជើងសារពីការដឹកទំនិញ ចាំបាច់ត្រូវតែអនុវត្តវិធាន ៣ ចំណុច។ ទី១ ត្រូវកត់ត្រាជាចំណូលពីកម្រៃជើងសា និងចំណូលពាក់ព័ន្ធផ្សេងទៀត ដូចមានចែងក្នុងកិច្ចសន្យា ភ្នាក់ងារជាមួយសហគ្រាសដឹកជញ្ជូនទំនិញតាមផ្លូវទឹកជាអន្តរជាតិ។ ដោយឡែក ចំពោះ ថ្លៃសេវាដឹកជញ្ជូនទំនិញតាមផ្លូវទឹកជាអន្តរជាតិដែលសហគ្រាសបានប្រមូលពីអតិថិជន ក្នុងស្រុក ហើយទូទាត់ទៅឱ្យសហគ្រាសដឹកជញ្ជូនទំនិញតាមផ្លូវទឹកជាអន្តរជាតិវិញ មិនមែន ជាចំណូល និងចំណាយរបស់ភ្នាក់ងារទេ។

ទី២. សហគ្រាសជាភ្នាក់ងារ ក៏ត្រូវតែកត់ត្រាបែងចែកដាច់ពីគ្នារវាងចំណូលរបស់ភ្នាក់ងារ និងទឹកប្រាក់ដែលប្រមូលជួសសហគ្រាស ដឹកជញ្ជូនទំនិញតាមផ្លូវទឹកជាអន្តរជាតិ ដោយត្រូវមានឯកសារគាំទ្រច្បាស់លាស់ ដូចជា កិច្ចសន្យាភ្នាក់ងារ វិក្កយបត្រ ឯកសារទូទាត់ជាដើម។ ក្នុងករណីមិនបានរក្សាទុកឯកសារដែល អាចផ្ទៀងផ្ទាត់បាន រដ្ឋបាលសារពើពន្ធមានសិទ្ធិធ្វើការកំណត់ចំណូលជាប់ពន្ធឡើងវិញ។

និងទី៣ សហគ្រាសជាភ្នាក់ងារ ចាំបាច់ត្រូវតែចេញវិក្កយបត្រទៅឱ្យអតិថិជនដែលមានរំលេចឈ្មោះសហគ្រាសដឹកជញ្ជូនទំនិញតាមផ្លូវទឹកជាអន្តរជាតិ ហើយទឹកប្រាក់ដែលប្រមូលជួសនេះ ត្រូវស្មើនឹងទឹកប្រាក់ដែលត្រូវទូទាត់ទៅឱ្យសហគ្រាសដឹកជញ្ជូនទំនិញតាមផ្លូវទឹកជាអន្តរជាតិ មុនកាត់ទុកប្រាក់ពន្ធលើប្រាក់ ចំណូលដូចមានចែងក្នុងប្រការជ នៃប្រកាសនេះ។ ភ្នាក់ងារត្រូវចាត់ទុកថាទទួលបាន ប្រាក់ចំណូលដុលពីអតិថិជន ក្នុងករណីទឹកប្រាក់ដែលបានប្រមូលលើសពីទឹកប្រាក់ដែល ទូទាត់ឱ្យសហគ្រាសដឹកជញ្ជូនទំនិញតាមផ្លូវទឹកជាអន្តរជាតិ ដោយមិនរួមបញ្ចូលនូវលម្អៀង ពីអត្រាប្តូរប្រាក់ឡើយ។

មិនតែប៉ុណ្ណោះ សហគ្រាសដែលដើរតួនាទីជាអ្នកតំណាងរបស់សហគ្រាសដឹកជញ្ជូនទំនិញតាមផ្លូវទឹកជា អន្តរជាតិផង និងជាភ្នាក់ងារបញ្ជូនទំនិញតាមផ្លូវទឹកជាអន្តរជាតិផង ត្រូវទទួលស្គាល់ចំណូល និងត្រូវកត់ត្រាក្នុងបញ្ជីគណនេយ្យដាច់ឡែកពីគ្នារវាងចំណូលដែលទទួលពីកម្រៃជើងសា និង ចំណូលពីសេវាដឹកជញ្ជូនតាមរយៈការទិញ-លក់បន្តនូវកន្លែងផ្ទុកទំនិញនៅក្នុងនាវាដើម្បីយក ចំណេញ ដោយត្រូវមានឯកសារគាំទ្រឱ្យបានត្រឹមត្រូវ និងច្បាស់លាស់។

ភ្នាក់ងារដែលធ្វើសកម្មភាពជាអ្នកតំណាងរបស់សហគ្រាសដឹកជញ្ជូនទំនិញតាមផ្លូវទឹកជាអន្តរជាតិ ដែលជាបុគ្គលទាក់ទិន ត្រូវអនុវត្តការទទួលស្គាល់ចំណូលស្របតាមវិធាន និងនីតិវិធីសម្រាប់បែងចែកចំណូល និងចំណាយក្នុងចំណោមបុគ្គលទាក់ទិន៕