ព័ត៌មានជាតិ

ឯកឧត្ដម ហ៊ុន ម៉ានី ដឹកនាំក្រុមការងារចុះសួរសុខទុក្ខ និងនាំអំណោយ ចែកជូនពលរដ្ឋ ១២០ គ្រួសារ ដែលជម្លៀសខ្លួននៅព្រំដែនកម្ពុជា-ថៃ

បានផុស

១ year មុន

នៅ

ថ្ងៃព្រហស្បតិ៍ ១២ មិថុនា ២០២៥

ដោយ

ឯកឧត្ដម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ បានអញ្ជើញដឹកនាំក្រុមការងារ និងអាជ្ញាធរខេត្តព្រះវិហារ ចុះជួបសំណេះសំណាល សួរសុខទុក្ខ និងនាំអំណោយចែកជូនប្រជាពលរដ្ឋប្រមាណ ១២០ គ្រួសារ ដែលជម្លៀសខ្លួនមកពីតាមបណ្ដោយព្រំដែន ក្នុងភូមិសាស្ត្រស្រុកជាំក្សាន្ត មកស្នាក់នៅបណ្ដោះអាសន្ននៅទីតាំងសុវត្ថិភាព ក្នុងវត្តពោធិ៍៥០០០ដើម ស្រុកគូលែន កាលពីព្រលប់ថ្ងៃទី ១១ ខែមិថុនា ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាឱកាសនោះ ឯកឧត្ដម ហ៊ុន ម៉ានី មានប្រសាសន៍ថា មុនថ្ងៃទី ២៨ ខែឧសភា ឆ្នាំ ២០២៥ ប្រទេសជាតិយើងបានកសាង និងទទួលសុខសន្តិភាពដោយការលំបាក តាំងពីថ្ងៃទី ២៩ ខែធ្នូ ឆ្នាំ ១៩៩៨ តាមរយៈគោលនយោបាយឈ្នះឈ្នះមកដល់បច្ចុប្បន្ន។ ទោះបីយើងធ្លាប់ប៉ះទង្គិចចន្លោះឆ្នាំ ២០០៨-២០១១ និងកត្តាមួយចំនួនថែមទៀត អាចនិយាយបានថា ក្រោយការបោះឆ្នោតនៅថ្ងៃទី ២៣ ខែកក្កដា ឆ្នាំ ២០២៣ រហូតមកដល់បច្ចុប្បន្ន គឺយើងមិនទាន់បានជួបប្រទះនូវចំណុចណា ដែលធ្វើឱ្យប្រជាពលរដ្ឋមានការព្រួយបារម្ភ និងឈានដល់ការជម្លៀសចេញពីផ្ទះសំបែងរបស់គាត់នោះទេ។

ឯកឧត្ដម ហ៊ុន ម៉ានី បន្តថា អ្វីដែលគំរាមកំហែង ធ្វើឱ្យប៉ះពាល់ដល់ភាពសុខសាន្តរបស់ប្រជាជនកម្ពុជា គឺ ចាប់ផ្ដើមនៅថ្ងៃទី ២៨ ខែឧសភា ឆ្នាំ ២០២៥ ដោយមានការប៉ុនប៉ង និងការឈ្លានពានទាំងផ្នែកយោធានៅប្រទេសជិតខាងយើងនេះ។ ស្ថានភាពបច្ចុប្បន្ននេះ ស.បញ្ជាក់ ទៅលើអ្វីដែលជាការព្រួយបារម្ភរបស់ប្រជាពលរដ្ឋខ្មែរនៅតាមបន្ទាត់ព្រំដែន។ ឯកឧត្ដម ចង់ឱ្យប្រជាពលរដ្ឋទូទាំងប្រទេស និងនៅពិភពលោក និងគ្រប់ទិសទី បានតាមដានដោយយកចិត្តទុកដាក់។

ឯកឧត្ដម ហ៊ុន ម៉ានី បញ្ជាក់ថា មួយចំហៀងយើងផ្តល់កម្លាំងចិត្ត ជំនឿទុកចិត្ត ដល់កងកម្លាំងប្រដាប់អាវុធ គាំទ្រទៅលើវិធានការរបស់រាជរដ្ឋាភិបាល តែថ្ងៃនេះ កន្លែងនេះ ក៏បានបញ្ជាក់ច្បាស់ថា រាជរដ្ឋាភិបាល និងអាជ្ញាធរខេត្តព្រះវិហារ ដែលជាសេនាធិការថ្នាក់ក្រោមជាតិ រាជរដ្ឋាភិបាល បានយកចិត្តទុកដាក់ដល់ប្រជាពលរដ្ឋដែលត្រូវជម្លៀសចេញ ហើយភាគច្រើនជាគ្រួសារកងទ័ពដែលកំពុងឈរជើងការពារទឹកដីនៅខាងមុខ។

ជាមួយនេះ ឯកឧត្ដម ហ៊ុន ម៉ានី បានថ្លែងនូវការអរគុណយ៉ាងជ្រាលជ្រៅបំផុតដល់ទឹកចិត្តរបស់ប្រជាពលរដ្ឋចំពោះអ្វីដែលជាការជួយគាំទ្រ ទាំងកម្លាំងចិត្ត ជូនកងកម្លាំងប្រដាប់អាវុធរបស់យើង។ នេះជាប្រពៃណីទំនៀមទម្លាប់មួយរបស់ប្រជាជនកម្ពុជា គ្រប់កាលៈទេសៈដែលយើងជួបបញ្ហាប្រឈម យើងតែងតែមានការបំផុសដោយប្រជាពលរដ្ឋយើងបានចូលរួមជាវិភាគទានតាមលទ្ធភាពដែលអាចធ្វើទៅបាន។

ក្នុងនាមប្រជាពលរដ្ឋខ្មែរមួយរូប ឯកឧត្ដម ក៏បានគោរពថ្លែងអំណរព្រះគុណចំពោះព្រះរាជហឫទ័យសន្ដោសប្រណីរបស់ព្រះករុណាជាអម្ចាស់ជីវិតលើត្បូង ក៏ដូចជា សម្តេចព្រះមហាក្សត្រី ព្រះវររាជមាតាជាតិខ្មែរ ដែលបានព្រះរាជទានទ្រព្យសម្បត្តិផ្ទាល់របស់ ព្រះមហាក្សត្រ និង សម្តចម៉ែ ដើម្បីរាជរដ្ឋាភិបាលចាត់ចែងទៅតាមអ្វីដែលជាតម្រូវការជាក់ស្ដែង និងអរគុណ សម្តេចតេជោ សម្តេចកិត្តិព្រឹទ្ធបណ្ឌិត ថ្នាក់ដឹកនាំជាច្រើនទៀត។ ថវិកាទាំងអស់ដែលបានជួយទៅដល់រាជរដ្ឋាភិបាល ថ្ងៃនេះគឺជួយដល់អង្គភាពនៅសមរភូមិមុខ ហើយថវិកាទាំងនេះ នឹងចាត់ចែងដោយមានតម្លាភាពបំផុត៕

អត្ថបទ ៖ ជុន កុសល