នាវាចម្បាំងអាមេរិកលុបចោលការចូលចតនៅវៀតណាម បង្វែរ​គោលដៅយ៉ាង​ប្រញាប់​ទៅ​មជ្ឈិមបូព៌ា​

កងទ័ពជើងទឹកអាមេរិក បានបញ្ជាក់ថា នាវាផ្ទុកយន្តហោះ USS Nimitz បានលុបចោលដំណើរទស្សនកិច្ច​ដែលគ្រោងទុករបស់ខ្លួនទៅកាន់​ទីក្រុង Da Nang ប្រទេសវៀតណាម ហើយឥឡូវនេះកំពុងធ្វើដំណើរឆ្ពោះទៅមជ្ឈិមបូព៌ា ជាកន្លែងដែលភាពតានតឹងរវាងអ៊ីស្រាអែល និងអ៊ីរ៉ង់ បានកើនឡើងយ៉ាងខ្លាំងក្នុងរយៈពេលប៉ុន្មានថ្ងៃថ្មីៗនេះ។

អ្នកនាំពាក្យរបស់ស្ថានទូតអាមេរិកនៅទីក្រុងហាណូយ បាន​ឲ្យ​ដឹង​​កាលពីថ្ងៃ​ចន្ទ​ទី​១៦​មិថុនា​ថា ការលុបចោល​នៃដំណើរទេសចរណ៍សុច្ឆន្ទៈក្នុងតំបន់ ធ្វើ​ឡើង​ព្រោះ​តែ «តម្រូវការប្រតិបត្តិការបន្ទាន់»។ នាវា USS Nimitz ត្រូវបានគេរំពឹងថានឹងចូលចតនៅវៀតណាមនៅថ្ងៃទី​២០​ខែមិថុនា ដែលជាពេលវេលាដ៏សំខាន់ក្នុងកិច្ចសហប្រតិបត្តិការយោធារវាងសហរដ្ឋអាមេរិក និងវៀតណាម។ ការ​ចូលចត​​​នេះ គឺជាផ្នែកមួយនៃកិច្ចខិតខំប្រឹងប្រែងទូលំទូលាយក្នុងការធ្វើ​ឲ្យ​កាន់តែស៊ីជម្រៅនូវទំនាក់ទំនងដែនសមុទ្រទ្វេភាគី និងរក្សាវត្តមានរបស់​អាមេរិកនៅក្នុងសមុទ្រចិនខាងត្បូង។

ទោះជាយ៉ាងណាក៏ដោយ ការសម្រេចចិត្តបោះបង់ដំណើរទស្សនកិច្ចនេះ បង្ហាញពីការផ្លាស់ប្តូរយ៉ាងឆាប់រហ័សនៅក្នុងអាទិភាពកងទ័ពជើងទឹករបស់​ក្រុង​វ៉ាស៊ីនតោន ក្នុងការឆ្លើយតបទៅនឹងវិបត្តិមជ្ឈិមបូព៌ាដែលកំពុងកើតឡើង។

​​​ប្រព័ន្ធ​តាម​ដាន​ទិន្នន័យ​កងទ័ពជើងទឹក បានបង្ហាញ​ថា ក្រុមនាវាផ្ទុកយន្តហោះ​អាមេរិក​ផ្លាស់ប្តូរទិសដៅពីសមុទ្រចិនខាងត្បូងកាលពីព្រឹកថ្ងៃចន្ទ ដោយធ្វើដំណើរឆ្ពោះទៅភាគខាងលិច​មហាសមុទ្រឥណ្ឌា។ នាវា Nimitz បាន​ទៅ​ចូលរួមជាមួយ​ក្រុម​នាវា​ចម្បាំង USS Carl Vinson ដែលឈរជើងរួចហើយនៅភាគខាងកើតសមុទ្រ​មេឌីទែរ៉ាណេ ជាផ្នែក​មួយ​នៃយុទ្ធសាស្ត្ររារាំងដ៏​ធំ​របស់​អាមេរិក។

ការ​បង្វែរ​ទិសដៅ​នៃនាវាចម្បាំងដ៏ធំបំផុតមួយរបស់ពិភពលោក បានកើតឡើង​អំឡុង​ពេល​​ជម្លោះ​តាម​ដែន​​អាកាស​កាន់តែ​ក្ដៅខ្លាំង​រវាងអ៊ីស្រាអែល និងអ៊ីរ៉ង់ បើទោះបីជាមានការអំពាវនាវពីអន្តរជាតិ​ឲ្យ​កាត់​បន្ថយភាព​តានតឹង​​ក៏ដោយ។

សូមជម្រាប​ថា នាវា Nimitz អាចផ្ទុក​មនុស្ស​បាន ៥ ០០០​នាក់ និងយន្តហោះ​ចម្បាំង​ជាង ៦០​គ្រឿង៕

ដោយ៖ ឈាង

ចុចអាន៖ ​ក្រុម​មេដឹកនាំ​ G7​ គាំទ្រ​អ៊ីស្រាអែល​ក្នុងការវាយប្រហារ​​អ៊ីរ៉ង់​ ចាត់ទុក​ជា​«ការការពារខ្លួន​»​