ជាលើកដំបូង កម្ពុជា បើក​វិទ្យាស្ថានបណ្តុះបណ្តាលគុនខ្មែរ ចាយទន់ខ្ទង់៥​​លានដុល្លារ

នៅថ្ងៃទី ១៨ ខែ មិថុនា ឆ្នាំ ២០២៥ សហព័ន្ធ​កីឡា​ប្រដាល់គុនខ្មែរ និងស្ថាប័ន​ប្រដាល់ Emei Legend របស់ចិនបានចាប់ដៃគ្នាបើក​​សម្ពោធជាផ្លូវការអំពី​វិទ្យាស្ថានបណ្តុះបណ្តាល​កីឡា​ប្រដាល់​គុនខ្មែរ ដែលមានទីតាំងស្ថិតនៅអគារ ZD Security លើផ្លូវជា សុផារ៉ា ក្នុងភូមិទួលថ្ងាន់ សង្កាត់ទួលសង្កែ២ ខណ្ឌឬស្សីកែវ រាជធានីភ្នំពេញ ។

លោក ខូវ ឆាយ ប្រធានសហព័ន្ធប្រដាល់គុនខ្មែរ បានឱ្យដឹងនៅក្នុងសន្និសីទសារព័ត៌មានកាលពីល្ងាចថ្ងៃទី ១៨ ខែ មិថុនា ជុំវិញការបង្កើតវិទ្យាស្ថានបណ្តុះបណ្តាលគុនខ្មែរនេះ គឺជាការសហការគ្នារវាងសហព័ន្ធគុនខ្មែរ និងសមភាគីចិនស្ថាប័ន Emei Legend ក្នុងគោលបំណងដើម្បីបណ្តុះបណ្តាលធនធានមនុស្សក្នុងវិស័យកីឡាប្រដាល់គុនខ្មែរ ដូចជាធនធានគ្រូបង្វឹក អាជ្ញាកណ្តាល ចៅក្រម ដើម្បីចេញទៅដឹកនាំការប្រកួត និងបណ្តុះបណ្តាលគុនខ្មែរបន្តនៅក្រៅប្រទេស ជាពិសេសនៅប្រទេស ចិន។

ជុំវិញមូលហេតុ ដែលខាងសមភាគីចិនសម្រេចចិត្តជ្រើសរើសគុនខ្មែរ ហើយបានចំណាយថវិកា​យ៉ាងច្រើនមកវិនិយោគលើការបើកវិទ្យាស្ថានបណ្តុះបណ្តាលគុនខ្មែរដូចនេះ លោកខូវ ឆាយ បានទម្លាយថា ចិន និងខ្មែរគឺជាមិត្តដែកថែបនឹងគ្នា។ ម្យ៉ាងទៀត បន្ទាប់ពី​ភាគី​ចិន​បានសិក្សាស្វែងយល់ពីគុនខ្មែរ ក៏បានធ្វើឱ្យពួកគេចាប់អារម្មណ៍ ចង់ចូលរួមអភិវឌ្ឍ​ជាមួយ​កម្ពុជា​ ដើម្បីឱ្យគុនខ្មែរក្លាយជាកីឡាសកលនៅថ្ងៃអនាគត និងអាចប្រកួតប្រជែងក្នុងកីឡាអូឡាំពិកពិភពលោក។

លោកខូវ ឆាយ បានបញ្ជាក់បន្ថែមថា វិទ្យាស្ថានបណ្តុះបណ្តាលគុនខ្មែរ ដែលទើបមានលើកដំបូងក្នុងប្រទេស កម្ពុជា នេះ គឺត្រូវបានរ៉ាប់រងសាងសង់ និងរៀបចំបរិក្ខាហ្វឹកហាត់ ដែលមានភាពស្តង់ដាទំនើប ដោយខាងភាគីចិនទាំងស្រុង ដែលចាយទន់ដល់ខ្ទង់ ៤ ទៅ ៥ លានដុល្លារអាមេរិក។ រីឯសហព័ន្ធប្រដាល់គុនខ្មែរវិញ ជាអ្នកទទួលបន្ទុករៀបចំបច្ចេកទេសសិក្សា ដោយផ្តោតលើ ២ ចំណុចធំៗ គឺទី ១ សិក្សាលើបច្ចេកទេសដឹកនាំការប្រកួត និងទី ២ សិក្សាលើជំនាញគុនខ្មែរ។

គួរបញ្ជាក់ថា សិស្សដែលបានបញ្ចប់ការសិក្សាក្នុងវិទ្យាស្ថានបណ្តុះបណ្តាលគុនខ្មែរនេះ នឹងទទួលបានសញ្ញាប័ត្រ ដែលមានតម្លៃស្មើបរិញ្ញាប័ត្រ និងបរិញ្ញាប័ត្រជាន់ខ្ពស់ ហើយសញ្ញាប័ត្រនេះ គឺត្រូវបានទទួលស្គាល់ដោយសកលវិទ្យាល័យក្នុងប្រទេសចិនចំនួន ២ រួចហើយ។ ជាមួយគ្នានេះ សម្រាប់សិស្សដែលបញ្ចប់ការសិក្សានៅក្នុងវិទ្យាស្ថាននេះ នឹងទទួលបានឱកាសទៅសិក្សាបន្តនៅប្រទេសចិន ហើយនឹងអាចក្លាយជាគ្រូនៅទីនោះផងដែរ៕

អត្ថបទ៖ សេម កុសល