ស្ថានទូតអាមេរិក ប្រកាសពីកម្មវិធីផ្លាស់ប្តូរការសិក្សាទៅអាមេរិក ដើម្បីទទួលបានជំនាញភាពជាអ្នកដឹកនាំអន្តរជាតិ

ស្ថានទូតអាមេរិកប្រចាំកម្ពុជា បានប្រកាសពីកម្មវិធីផ្លាស់ប្តូរការសិក្សា Spring and Fall 2026 YSEALI Academic Fellows Program (YSEALI AFP) នៅសហរដ្ឋអាមេរិករយៈ៥សប្តាហ៍ ដើម្បីទទួលបានជំនាញភាពជាអ្នកដឹកនាំអន្តរជាតិ។ នេះបើតាមការផ្សព្វផ្សាយរបស់ស្ថានទូតអាមេរិកប្រចាំកម្ពុជា នាថ្ងៃទី២៣ ខែមិថុនា ឆ្នាំ២០២៥។

កម្មវិធីផ្លាស់ប្តូរការសិក្សានេះ សម្រាប់អ្នកដឹកនាំវ័យក្មេងកម្ពុជា មានអាយុចាប់ពី១៨ឆ្នាំ ដល់២៥ឆ្នាំ អាចដាក់ពាក្យចូលរួមកម្មវិធីផ្លាស់ប្តូរការសិក្សានេះ រយៈពេលប្រាំសប្តាហ៍ទៅកាន់សហរដ្ឋអាមេរិក ដើម្បីទទួលបានជំនាញភាពជាអ្នកដឹកនាំអន្តរជាតិ ការយល់ដឹងកាន់តែស៊ីជម្រៅអំពីបញ្ហាសកលសំខាន់ៗ និងការបង្កើតទំនាក់ទំនងដ៏រឹងមាំជាមួយនឹងបេក្ខជនដ៏ទៃទៀតមកពីសហរដ្ឋអាមេរិក និងអាស៊ីអាគ្នេយ៍។

សូមជម្រាបថា កម្មវិធីផ្លាស់ប្តូរការសិក្សារបស់សហរដ្ឋអាមេរិក (YSEALI AFP) នេះ គឺជាកម្មវិធីដែលគាំទ្រដោយក្រសួងការបរទេសសហរដ្ឋអាមេរិក និងទទួលបានមូលនិធិពីរដ្ឋាភិបាលអាមេរិក គ្រប់គ្រងដោយមជ្ឈមណ្ឌល Maureen និង Mike Mansfield នៅសាកលវិទ្យាល័យ Montana ។ កម្មវិធីនេះ ដើម្បីស្វែងរកការកសាងសមត្ថភាពភាពជាអ្នកដឹកនាំរបស់យុវជននៅក្នុងតំបន់ ពង្រឹងទំនាក់ទំនងរវាងសហរដ្ឋអាមេរិក និងអាស៊ីអាគ្នេយ៍។ កម្មវិធីនេះ រួមមានកន្លែងស្នាក់នៅសិក្សា សកម្មភាពសេវាកម្មសហគមន៍ ការចែករំលែកបទពិសោធក្នុងវិស័យសិក្សា សិក្ខាសាលា និងសមាសភាគផ្លាស់ប្តូរគ្នាទៅវិញទៅមក ដែលបញ្ជូនជនជាតិអាមេរិកទៅកាន់អាស៊ីអាគ្នេយ៍។

សម្រាប់អ្នកដែលមានចំណាប់អារម្មណ៍ចង់ដាក់ពាក្យកម្មវិធីផ្លាស់ប្តូរការសិក្សានេះ អាចដាក់ពាក្យ និងស្វែងយល់ព័ត៌មានបន្ថែមបានតាមរយៈតំណភ្ជាប់៖ (https://www.ysealiafp.org/) ផុតកំណត់ទទួលពាក្យនៅថ្ងៃទី២១ ខែកក្កដា ឆ្នាំ២០២៥៕