ខួប៧៥ឆ្នាំចំណងការទូត!ភារធារីនៃស្ថានទូតអាមេរិក នឹងបំពេញទស្សនកិច្ចការងារនៅខេត្តព្រះសីហនុរយៈពេល ៥ថ្ងៃ

លោកស្រី Bridgette L. Walker ភារធារីនៃស្ថានទូតអាមេរិកនៅភ្នំពេញ នឹងដឹកនាំមន្រ្តីទូត និងបុគ្គលិកស្ថានទូតអាមេរិក បំពេញទស្សនកិច្ចការងារ នៅទឹកដីខេត្តព្រះសីហនុ ចាប់ពីថ្ងៃទី ២៦ ដល់ ៣០ ខែសីហា ដើម្បីការអបអរ​សាទររយៈពេលពេញមួយឆ្នាំ នៃខួបទី ៧៥ ឆ្នាំនៃទំនាក់ទំនងការទូតរវាងសហរដ្ឋអាមេរិក និងកម្ពុជា។

សេចក្តីប្រកាសព័ត៌មានស្ថានទូតអាមេរិកប្រចាំកម្ពុជា ឱ្យដឹងថា ប្រធានបទសម្រាប់ទស្សកិច្ចការងារនេះគឺ «សប្តាហ៍ស្ថានទូតនៅខេត្តព្រះសីហនុ ឆ្នាំ ២០២៥ ៖ ខួបទី ៧៥ នៃភាពជាដៃគូ និងមិត្តភាព» ដែលជាឱកាសដើម្បីពង្រឹងទំនាក់ទំនងទ្វេភាគី បង្កើនទំនាក់ទំនងរវាងប្រជាជនអាមេរិក និងប្រជាជនកម្ពុជា បង្កើនទំនាក់ទំនងសេដ្ឋកិច្ច ផ្តល់ការបណ្តុះបណ្តាលលើការកសាងសមត្ថភាពរបស់មន្ត្រីមានសមត្ថកិច្ច និងសន្តិសុខ គាំទ្រគម្រោងអភិវឌ្ឍសុខភាព និងផ្តល់សេវាផ្នែកកុងស៊ុលដល់ពលរដ្ឋអាមេរិក នៅខេត្តព្រះសីហនុ។

តាមសេចក្តីប្រកាស លោកស្រីភារធារី Walker និងបុគ្គលិកស្ថានទូតអាមេរិក នឹងចូលរួមជាមួយរដ្ឋបាលខេត្តព្រះសីហនុ ក្នុងពិធីលើកស្លាកមិត្តភាពកម្ពុជា-អាមេរិក លើកំណាត់ផ្លូវជាតិលេខ ៤។ បន្ថែមពីនេះ នឹងមានពិធីដាំដើមឈើ ដើម្បីអបអរសាទរខួប ៧៥ ឆ្នាំនៃមិត្តភាពរវាងសហរដ្ឋអាមេរិក និងប្រទេសកម្ពុជា។

នាឱកាសបំពេញទស្សនកិច្ចនេះ ផ្នែកកិច្ចការសាធារណៈនៃស្ថានទូតអាមេរិក នឹងរៀបចំកិច្ចសន្ទនាអំពីការធ្វើមាតុភូមិនិវត្តន៍នៃវត្ថុបុរាណខ្មែរ ពីសហរដ្ឋអាមេរិកមកកម្ពុជា ហើយនឹងមានការចាក់បញ្ចាំងខ្សែភាពយន្តឯកសារទាក់ទងនឹងឧក្រិដ្ឋកម្មនៃការជួញដូរវត្ថុបុរាណ ដែលមានចំណងជើងថា «Loot» នៅទីតាំងសាលារៀនសុវណ្ណភូមិ។ វាគ្មិនក្នុងវេទិកានេះ មានតំណាងពីស្ថានទូតអាមេរិក ក្រសួងវប្បធម៌ និងវិចិត្រសិល្បៈ និងសហអ្នកនិពន្ធ៕