ស្ថានទូតអាមេរិករៀបចំពិព័រណ៍សិក្សា ផ្តល់ឱកាសដល់សិស្ស-និស្សិតកម្ពុជាដែលចង់បន្តការសិក្សានៅទីនោះ

ស្ថានទូតអាមេរិកប្រចាំនៅទីក្រុងភ្នំពេញ នឹងរៀបចំពិព័រណ៍ការសិក្សានៅសហរដ្ឋអាមេរិកឆ្នាំ ២០២៥ (EducationUSA Fair 2025) ចំនួនពីរលើក ដោយលើកទី១ នៅខេត្តសៀមរាប ថ្ងៃទី ៨ ខែកញ្ញា និងនៅភ្នំពេញ ថ្ងៃទី ១០ខែកញ្ញា ដើម្បីផ្សព្វផ្សាយឱកាសសិក្សាសម្រាប់សិស្ស និស្សិតដែលមានការចំណាប់អារម្មណ៍ចង់សិក្សានៅសហរដ្ឋអាមេរិក។

ពិព័រណ៍នេះនឹងផ្តល់ឱកាសពិសេសដល់សិស្ស និស្សិតកម្ពុជា និងអាណាព្យាបាល ឲ្យធ្វើការទាក់ទងដោយផ្ទាល់ជាមួយតំណាងនៃស្ថាប័នឧត្តមសិក្សាជាង ១០ មកពីសហរដ្ឋអាមេរិក ដើម្បីស្វែងយល់អំពីអត្ថប្រយោជន៍នៃការសិក្សានៅថ្នាក់ឧត្តមសិក្សានៅអាមេរិក។

ពិព័រណ៍លើកទី១ នៅថ្ងៃចន្ទ ទី ៨ ខែកញ្ញា ឆ្នាំ ២០២៥ នៅសណ្ឋាគារ សោម៉ាទេវី អង្គរសៀមរាប ចាប់ពីម៉ោង ៨:00 ព្រឹក ដល់ ១១:៣០ ព្រឹក លោកស្រី Sara Feuerstein ប្រធានស្តីទីផ្នែកកិច្ចការសាធារណៈរបស់ស្ថានទូតអាមេរិក និងលោក លី ប៊ុនណា ប្រធានមន្ទីរអប់រំ យុវជន និងកីឡា ខេត្តសៀមរាប ប្រកាសបើកពិព័រណ៌ និងដើរទស្សនាស្តង់ពិព័រណ៍សិក្សា។

ចំណែកលើកទី២ ថ្ងៃពុធ ទី ១០ ខែកញ្ញា ឆ្នាំ ២០២៥ នៅសណ្ឋាគារ Hyatt Regency ភ្នំពេញ ចាប់ពីម៉ោង ១:៣០ ដល់ ៣:00 រសៀល ភារធារីស្តីទីនៃស្ថានទូតអាមេរិក លោក Benjamin Chiang និងលោក សោម រតនា អនុរដ្ឋលេខាធិការនៃក្រសួងអប់រំ យុវជន និងកីឡា ប្រកាសបើកពិព័រណ៍ និងដើរទស្សនាស្តង់ពិព័រណ៍សិក្សា៕