ចំពេលជម្លោះកំពុងតានតឹង សម្តេច ហ៊ុន សែន ប្រាប់ពលរដ្ឋនៅជាប់ព្រំដែនថៃ ជីកលេណដ្ឋាន​ដើម្បី​ការពារ​ខ្លួន

សម្ដេចតេជោ ហ៊ុន សែន នៅព្រឹកថ្ងៃទី២៦ ខែមិថុនានេះ បានប្រាប់ឱ្យប្រជាពលរដ្ឋរស់នៅតាមតំបន់ជាប់ព្រំដែនជាមួយថៃ ជីកលេណដ្ឋានដើម្បីការពារខ្លួន ខណៈភាពតានតឹងនៃជម្លោះព្រំដែនកាន់តែឡើងកម្ដៅ។ សម្ដេចតេជោ ថា ជម្លោះនេះអាចអូសបន្លាយក្នុងពេលយូរ បើករណីប្រទេសថៃពុំមានការផ្លាស់ប្ដូរមេដឹកនាំ។

សម្ដេចតេជោ ប្រធានព្រឹទ្ធសភា បញ្ជាក់ថា «ប្រទេសយើងកំពុងជួបប្រទះបញ្ហាវិវាទជាមួយថៃ បើមិនមានការ​ផ្លាស់​ប្តូរ​មេដឹកនាំក្រុងបាងកក អាចមានសង្គ្រាមយូរ ហើយមិនដូច​កន្លង​ទៅ​ កាល​ពី​ឆ្នាំ​២០១១​នោះ​ទេ​»។ ក្នុងន័យនេះ សម្តេចបានណែនាំប្រជាពលរដ្ឋឱ្យជីកលេណដ្ឋាន ​ដើម្បី​ការពារ​ខ្លួន។ ខណៈរដូវវស្សាចូលមកដល់ សម្ដេចតេជោក៏បានលើកទឹកចិត្តពលរដ្ឋឱ្យបង្កើនការបង្ក​បង្កើន​ផលផងដែរ។

ការណែនាំរបស់សម្ដេចតេជោ ហ៊ុន សែន គឺបានធ្វើឡើងនៅក្នុងគ្រាដែលសម្ដេចអញ្ជើញជួបសំណេះសំណាលជាមួយសមាជិកក្រុមប្រឹក្សាឃុំ-សង្កាត់ ក្នុងខេត្តឧត្តរមានជ័យ នៅព្រឹកថ្ងៃទី២៦ ខែមិថុនា ឆ្នាំ២០២៥នេះ។

នាយឧត្តមសេនីយ៍ផុតលេខផ្កាយមាស៥ សម្ដេចតេជោ ហ៊ុន សែន អះអាងថា ស្ថានភាព​នយោបាយរបស់ប្រទេសជិតខាង គឺថៃបានរុញច្រានទៅមានវិវាទជាមួយកម្ពុជា ដែលក្នុងកាលៈទេសៈនេះសម្តេចមើលឃើញថា វិបត្តិក៏បានក្លាយទៅ​ជា​កាលា​នុវត្តភាពផងដែរ​។

ត្រង់ចំណុចនេះ សម្តេចតេជោ បានណែនាំដល់ក្រុ​ម​ប្រឹក្សា​ជំរុញ​ប្រជាពលរដ្ឋ​ដាំ​ដុះ​ផលិត​ផល​កសិកម្ម​ប្រែ​ក្លាយ​វិបត្តិ​ទៅ​ជា​កាលានុវត្តភាព តាមរយៈការលើកទឹកចិត្តឱ្យមានការផលិតក្នុងខេត្ត ផ្គត់ផ្គង់ក្នុង​ខេត្ត​ហើយ​កង​ទ័ព​ នគរបាល ពលរដ្ឋចូលរួមសហការគ្នា ជំរុញពលរដ្ឋឱ្យមានការដាំដុះ ដើម្បីផ្គត់​ផ្គង់​កម្លាំង​ប្រដាប់​អាវុធ​នៅនឹងកន្លែងតែម្ដង៕

ដោយ៖ ធឿន វ៉ាន់សុង