សម្តេចតេជោ ក្រើនរំឭកជាថ្មីដល់សមាជិកក្រុមប្រឹក្សាឃុំសង្កាត់ បម្រើប្រជាជនឱ្យបានល្អ

សម្តេចតេជោ ហ៊ុន​ សែន ប្រធានព្រឹទ្ធសភា បានក្រើនរំឭកជាថ្មីដល់សមាជិកក្រុមប្រឹក្សា ឃុំ សង្កាត់ បម្រើប្រជាជនឱ្យបានល្អ ទាំងការផ្តល់សេវាសាធាណៈ ជាពិសេស កិច្ចការបង្ក្រាបករណីលួច ប្លន់ និងគ្រឿងញឿនឱ្យមានប្រសិទ្ធភាពនៅក្នុងមូលដ្ឋានរៀងៗខ្លួន។

ការណែនាំនេះធ្វើឡើងនាឱកាស សម្តេចតេជោ អញ្ជើញជួបសំណេះសំណាលជាមួយសមាជិកក្រុមប្រឹក្សា ខេត្តព្រះវិហារ កាលពីថ្ងៃទី ២៧​ខែមិថុនា ឆ្នាំ ២០២៥។​ សម្តេចតេជោ ថ្លែងថា៖« ខ្ញុំផ្តាំផ្ញើទៅសមាជិកក្រុមប្រឹក្សាឃុំ សង្កាត់ ធ្វើកិច្ចការឱ្យល្អ បម្រើប្រជាជនឱ្យបានល្អ​ ជាពិសេស អនុវត្តនយោបាយភូមិឃុំ មានសុវត្ថិភាព។ បញ្ហាចោរកម្ម លួច ប្លន់ គ្រឿងញៀន ក្មេងទំនើង ល្បែងស៊ីសង ត្រូវមើលរឿងនេះ»។

សម្តេចតេជោ បញ្ជាក់ថា កន្លងមកប្រមុខរាជរដ្ឋាភិបាលកម្ពុជា​ សម្តេចធិបតី ហ៊ុន ម៉ាណែត បានណែនាំជារឿយៗជុំវិញបញ្ហានេះ ប៉ុន្តែក្នុងនាមប្រធានព្រឹទ្ធសភា និងជាប្រធានគណបក្សប្រជាជនកម្ពុជា គ្រាន់តែសូមរំឭកបន្ថែម​ដើម្បីបម្រើប្រជាជន។

ការក្រើនរំឭកជាថ្មីនេះ ដោយសង្កេតឃើញថា មន្រ្តីមួយចំនួនបានខិតខំបំពេញភារកិច្ច ​និងបម្រើប្រជាពលរដ្ឋ តាមរយៈផ្តល់សេវាសាធារណៈ ឬការអនុត្តគោលនយោបាយ ភូមិ ឃុំ មានសុវត្ថិភាព បានល្អប្រសើរហើយ ប៉ុន្តែបញ្ហាទាំងនោះមួយចំនួននៅបន្តកើតមាន មិនថាសេវាសាធារណៈ ឬករណីចោរ លួចប្លន់ គ្រឿងញៀននោះទេ។

គួរជម្រាបថា ពាក់ព័ន្ធការអនុវត្តគោលនយោបាយភូមិឃុំ មានសុវត្ថិភាពនេះ ត្រូវបានសិក្សាកាលពីឆ្នាំ ២០១០ ដោយដំបូងឡើយ សម្តេចក្រឡាហោម ស ខេង អតីតរដ្ឋមន្រ្តីក្រសួងមហាផ្ទៃ បានលើកយកបញ្ហានេះនៅក្នុងក្របខណ្ឌក្រសួងមហាផ្ទៃប៉ុណ្ណោះ។ ប៉ុន្តែដោយសង្កេតឃើញអត្ថប្រយោជន៍ កម្មវិធីភូមិ ឃុំ មានសុវត្ថិភាព ត្រូវបានពង្រីកទៅជាកម្មវិធីនយោបាយរបស់រាជរដ្ឋាភិបាល របស់គណបក្ស ហើយបន្តវេនដល់រដ្ឋាភិបាលជំនាន់បន្តវេននេះ ដែលកិច្ចការនេះ មានសារៈសំខាន់ខ្លាំងណាស់ជាមួយនឹងការធានានូវស្ថិរភាពក្នុង ភូមិ ឃុំ សុវត្ថិភាព៕