ព័ត៌មានជាតិ

៦ ខែ ឆ្នាំនេះ រដ្ឋ ចំណាយថវិកាជាង ១៣ លានដុល្លារ ជូនសមាជិក ប.ស.ស ជាស្ត្រីមានផ្ទៃពោះ និងកុមារអាយុក្រោម ២ ឆ្នាំ

បានផុស

១០ ខែ មុន

នៅ

ថ្ងៃពុធ ២ កក្កដា ២០២៥

ដោយ

នៅក្នុងរយៈពេល ៦ ខែ ឆ្នាំ ២០២៥ នេះ រាជរដ្ឋាភិបាល បានចំណាយថវិកាប្រមាណជាង ១៣ លានដុល្លារ ជូនដល់សមាជិក ប.ស.ស ជាស្ត្រីមានផ្ទៃពោះ និងកុមារអាយុក្រោម ២ ឆ្នាំ ដើម្បីចូលរួមលើកកម្ពស់សុខុមាលភាពមាតា និងទារក ឱ្យកាន់តែប្រសើរ។

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅរសៀលថ្ងៃទី ២ កក្កដា នេះថា ក្នុងឆមាសទី ១ ឆ្នាំ ២០២៥ នេះ មានស្ត្រីមានផ្ទៃពោះទទួលបានប្រាក់ឧបត្ថម្ភពីរាជរដ្ឋាភិបាលសរុបចំនួន ៨៣ ៤៣០ នាក់ កូនចំនួន ១២៨ ៧៣៣ នាក់ ដោយចំណាយថវិកាអស់ប្រមាណជា ៥៣ ពាន់ ៨៨០ លានរៀល ស្មើប្រមាណជា ១៣,៤៧ លានដុល្លារ។

លោកបណ្ឌិត បានបន្តថា ប៉ុន្តែបើគិតចាប់តាំងពីកម្មវិធីនេះបានអនុវត្តនៅថ្ងៃទី ១ ខែមករា ឆ្នាំ ២០១៨ គិតមកដល់ឆមាសទី ១ ឆ្នាំ ២០២៥ នេះ មានស្ត្រីមានផ្ទៃពោះទទួលបានប្រាក់ឧបត្ថម្ភសរុបចំនួន ៦៥៧ ៣១៩ នាក់ កូនចំនួន ៦៩០ ៧៩៣ នាក់ ដោយចំណាយថវិកាអស់ប្រមាណជា ៣៥០ ពាន់ ៤៤៧ លានរៀល ស្មើនឹងប្រមាណ ៨៧,៦ លានដុល្លារ។

លោកបណ្ឌិត បានបន្ថែមថា រាជរដ្ឋាភិបាល បានផ្តល់កម្មវិធីឧបត្ថម្ភសាច់ប្រាក់ជូនកម្មករ-និយោជិតស្ត្រីមានផ្ទៃពោះ និងកុមារក្រោមអាយុ ២ ឆ្នាំ ទាំងមុនសម្រាល ពេលសម្រាល និងក្រោយសម្រាល ក្នុងនោះ មុនពេលសម្រាលកូនកម្មករ-និយោជិតស្ត្រីមានផ្ទៃពោះទទួលបានប្រាក់ឧបត្ថម្ភចំនួន ៤ លើក ដោយ ១ លើក ទទួលបានថវិកា ៨ ម៉ឺនរៀល។ ពេលសម្រាលកូន ទទួលបានប្រាក់ឧបត្ថម្ភ ដោយកូន ១ ទទួលបានថវិកា ៨០ ម៉ឺនរៀល កូនភ្លោះ ២ ទទួលបាន ១ លាន ២ សែនរៀល និងកូនភ្លោះ ៣ ទទួលបាន ១ លាន ៦ សែនរៀល និងទទួលបានការឧបត្ថម្ភពិសេសបន្ថែមពី សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ចំនួន ៥ លានរៀល ទៀតផងដែរ។

លោកបណ្ឌិត បានបន្តឱ្យដឹងទៀតថា ក្រោយពេលសម្រាលកូនកម្មករ-និយោជិតស្ត្រីមានផ្ទៃពោះទទួលបានប្រាក់ឧបត្ថម្ភចំនួន ១០ លើក ដោយ ១ លើក ទទួលបាន ៨ ម៉ឺនរៀល ក្នុងនោះ ៣ លើក នៅពេលទៅទទួលសេវាពិនិត្យសុខភាព ក្រោយពេលសម្រាលកូន និង ៧ លើកទៀត នៅពេលយកកូនទៅទទួលថ្នាំបង្ការរហូតដល់អាយុ ២ ឆ្នាំ។

លោកបណ្ឌិត បានបញ្ជាក់ថា កម្មវិធីផ្តល់ប្រាក់ឧបត្ថម្ភសម្រាប់សមាជិក ប.ស.ស ជាស្ត្រីមានផ្ទៃពោះ និងកុមារអាយុក្រោម ២ ឆ្នាំ គឺជាគោលនយោបាយរបស់រាជរដ្ឋាភិបាលក្នុងគោលបំណងលើកកម្ពស់សុខុមាលភាពមាតា និងទារក ព្រមទាំងរួមចំណែកដោះស្រាយកង្វះអាហារូបត្ថម្ភរបស់កុមារចាប់តាំងពីកូននៅក្នុងផ្ទៃរហូតដល់កូនមានអាយុ ២ ឆ្នាំ៕

អត្ថបទ ៖ សំអឿន