UNICEF៖ កុមារជិត ២០០នាក់ ស្លាប់ក្នុងសង្គ្រាមអ៊ីរ៉ង់ 

សង្គ្រាមមជ្ឈិមបូព៌ាបានឈានចូលថ្ងៃទី៧ហើយ នៅថ្ងៃសុក្រទី៦ខែមីនា ខណៈតួលេខមនុស្សស្លាប់ ​ចេះតែបន្តកើនឡើងច្រើនទៅៗ ហើយអ្វីដែលកាន់តែរន្ធត់នោះគឺក្នុងរបាយការណ៍របស់អង្គការ UNICEF ​បង្ហាញថា មានកុមាររហូតដល់ទៅជិត២០០នាក់ បានបាត់បង់ជីវិតចាប់តាំងពីផ្ទុះសង្គ្រាមថ្ងៃ២៨កុម្ភៈ។

យោងតាមទិន្នន័យរបស់ UNICEF ដែលផ្សាយដោយសារព័ត៌មាន Al Jazeera, មានកុមាររហូតដល់ទៅ ១៩២នាក់ត្រូវបានសម្លាប់ក្នុងសង្គ្រាមនេះ ខណៈរាប់រយនាក់ទៀតរងរបួស។

ក្នុងចំណោមកុមារទាំង១៩២នាក់នោះ មាន១៨១នាក់ទៅហើយដែលស្លាប់ក្នុងប្រទេសអ៊ីរ៉ង់ ជាពិសេសការវាយប្រហារលើសាលារៀននៅសាលាបឋមសិក្សាកុមារី Shajareh Tayyebeh ក្នុងក្រុង Minab រីឯ៧នាក់ស្លាប់លីបង់ ៣នាក់នៅអ៊ីស្រាអែលនិងម្នាក់នៅគុយវ៉ែត។ 

យោងតាមរបាយការណ៍ដដែលនោះ, ភាគច្រើននៃកុមារដែលស្លាប់ គឺមានអាយុចន្លោះពី ៧ ដល់ ១២ ឆ្នាំ ហើយសាលារៀនយ៉ាងតិច ២០ និងមន្ទីរពេទ្យ ១០ បានរងការខូចខាត។

ជុំវិញបញ្ហានេះ UNICEF និយាយថា៖ «កុមារមិនមែនជាអ្នកបង្កសង្គ្រាមទេ ប៉ុន្តែពួកគេបែរជាអ្នកដែលរងទុក្ខធំ ដែលមិនអាចទទួលយកបានទៅវិញ។ ការកើនឡើងនូវអំពើយោធានៅទូទាំងតំបន់មជ្ឈិមបូព៌ា បានជះឥទ្ធិពលយ៉ាងធ្ងន់ធ្ងររួចទៅហើយដល់កុមារ»។

យ៉ាងណា ពាក់ព័ន្ធសោកនាដកម្មនៅសាលា Shajareh Tayyebeh, រដ្ឋាភិបាលទីក្រុងវ៉ាស៊ីនតោន បានប្រកាសបើកការស៊ើបអង្កេតជាផ្លូវការរួចហើយ។

រដ្ឋមន្ត្រីការពារជាតិអាមេរិក Pete Hegseth បានចេញមុខមកបកស្រាយថា ខាងក្រសួងការពារជាតិកំពុងតាមដាន និងពិនិត្យមើលរឿងនេះយ៉ាងដិតដល់បំផុត ប៉ុន្តែលោកសង្កត់ធ្ងន់យ៉ាងម៉ឺងម៉ាត់ថា កងទ័ពអាមេរិកប្រកាន់ខ្ជាប់នូវគោលការណ៍មិនកំណត់គោលដៅលើទីតាំងស៊ីវិលឡើយ។

ទោះបីជាមានការបកស្រាយបែបនេះក្តី ក៏អភិបាលក្រុង Minab លោក Mohammad Radmehr បានបញ្ជាក់យ៉ាងច្បាស់ថា គ្រាប់បែកបានធ្លាក់ចំកណ្តាលអាគារសាលារៀនពេញទំហឹង។

រដ្ឋាភិបាលក្រុងតេហេរ៉ង់បានចោទប្រកាន់ចំៗទៅលើសហរដ្ឋអាមេរិក និងអ៊ីស្រាអែលថា ជាអ្នកនៅពីក្រោយ «ឧក្រិដ្ឋកម្មសង្រ្គាម» ដ៏សាហាវឃោរឃៅមួយនេះ៕

អត្ថបទ៖ សុខ សុវណ្ណ