ព័ត៌មានជាតិ

ស្ត្រីពលករខ្មែរម្នាក់ ឈឺពោះសម្រាលកូន ខណៈឆ្លងដែនចូលមកកម្ពុជា តាមច្រកអន្តរជាតិប៉ោយប៉ែត

បានផុស

១០ ខែ មុន

នៅ

ថ្ងៃព្រហស្បតិ៍ ៣ កក្កដា ២០២៥

ដោយ

កាលពីថ្ងៃទី ២ ខែកក្កដា ឆ្នាំ ២០២៥ ម្សិលមិញ ស្ត្រីជាពលករខ្មែរម្នាក់ ឈ្មោះ សេង កែវមុនី បានឈឺពោះសម្រាលកូនក្នុងទឹកដីប្រទេសថៃពេលធ្វើដំណើរវិលត្រលប់មកកម្ពុជាវិញ តែគ្មានការយកចិត្តទុកដាក់ពីភាគីថៃឡើយ បែរជាឲ្យដើរដោយថ្មើរជើងឆ្លងស្ពានព្រំដែនច្រកអន្តរជាតិប៉ោយប៉ែត ចូលមកកម្ពុជាវិញ ដោយឃើញស្ថានភាពបែបនេះ ក្រុមការងារ សមត្ថកិច្ច និងគ្រូពេទ្យប្រចាំការនៅច្រកព្រំដែនអន្តរជាតិប៉ោយប៉ែត បានចេញអន្តរាគមន៍ជួយបញ្ជូនទៅមន្ទីរពេទ្យបង្អែកដីថ្មី និងសម្រាលកូនដោយសុវត្ថិភាព។

លោក អោក ទីណា ប្រធានមន្ទីរពេទ្យបង្អែកប៉ោយប៉ែត បានប្រាប់ថា ស្ត្រីដែលឈឺពោះឆ្លងទន្លេកាលពីវេលាម៉ោង ១៤ និង ១០ នាទី ថ្ងៃទី ២ ខែកក្កដា ឆ្នាំ ២០២៥ ម្សិលមិញ សម្រាលបានកូនប្រុស ទម្ងន់ ៣១៦៨ ក្រាម ទាំងម្ដាយ និងកូន មានសុខភាពល្អធម្មតា ហើយក្រុមគ្រូពេទ្យអនុញ្ញាតឲ្យវិលទៅសម្រាកនៅលំនៅឋានវិញហើយ។

គួរជម្រាបថា កម្ពុជា នៅតែបន្តអនុវត្តកិច្ចការងារមនុស្សធម៌ ទោះស្ថិតក្នុងកាលៈទេសៈណាក៏ដោយ។ កម្ពុជា តែងតែយកចិត្តទុកដាក់លើគ្រប់ជាតិសាសន៍ មិនថាជនជាតិថៃឡើយ បើទោះបីស្ថានភាពនៅតាមព្រំដែនរវាងកម្ពុជា-ថៃ កំពុងមានភាពតានតឹងក៏ដោយ។ ជាក់ស្ដែងប៉ុន្មានថ្ងៃមុន មានស្ត្រីម្នាក់ ជាជនជាតិថៃ បានឈឺពោះសម្រាលកូន ត្រូវបានក្រុមគ្រូពេទ្យនៅក្រុងប៉ោយប៉ែតយកចិត្តទុកដាក់បញ្ជូនទៅមន្ទីរពេទ្យសម្រាលកូនដោយជោគជ័យ និងបញ្ជូនទៅដល់ទឹកដីប្រទេសថៃប្រកបដោយសុវត្ថិភាព។ ដោយឡែកចំពោះទង្វើរបស់ភាគីថៃដែលធ្វើទៅលើស្ត្រីមានផ្ទៃពោះខ្មែរម្នាក់ ត្រូវបានអន្តរជាតិមើលឃើញថា ជាទង្វើរំលោភលើសិទ្ធិមនុស្ស អមនុស្សធម៌ ហើយតែងលើកសរសើរខ្លួនឯងឲ្យថាល្អ ទម្លាក់កំហុសមកលើកម្ពុជា ទាំងដែលខ្លួនជាអ្នកបង្កបញ្ហានៅព្រំដែនរវាងកម្ពុជា-ថៃ និងធ្វើការបិទច្រកព្រំដែនជាមួយកម្ពុជាជាឯកតោភាគី ដោយគ្មានការជូនដំណឹងមកកម្ពុជាមួយម៉ាត់៕

អត្ថបទ ៖ អ ពៅ