មេដឹកនាំរបបយោធាមីយ៉ាន់ម៉ា ស្នើសុំឱ្យ ត្រាំ កាត់បន្ថយអត្រាពន្ធ

យោងតាមការចេញផ្សាយរបស់ទីភ្នាក់ងារព័ត៌មាន​ Reuters នៅថ្ងៃទី១១ខែកក្កដា មេដឹកនាំរបបយោធាមីយ៉ាន់ម៉ា ឧត្តមសេនីយ៍ មីន អ៊ុងឡាំង (Min Aung Hlaing) បានស្នើសុំជាផ្លូវការនូវការកាត់បន្ថយអត្រាពន្ធ ៤០% លើការនាំចេញរបស់មីយ៉ាន់ម៉ាទៅកាន់សហរដ្ឋអាមេរិក។

នៅក្នុងការឆ្លើយតបជាលាយលក្ខណ៍អក្សរចំពោះលិខិតរបស់ប្រធានាធិបតីអាមេរិកលោក ដូណាល់ ត្រាំ ដែលបានជូនដំណឹងដល់ប្រទេសមីយ៉ាន់ម៉ាអំពីអត្រាពន្ធនាពេលបច្ចុប្បន្ន លោក មីន អ៊ុងឡាំង បានស្នើឱ្យកាត់បន្ថយពន្ធនៅចន្លោះពី ១០% ទៅ ២០% ។ ជា​ថ្នូរ​នឹង​គ្នា មីយ៉ាន់ម៉ា​បាន​ផ្តល់​ការ​កាត់​បន្ថយ​ពន្ធ​នាំ​ចូល​របស់​ខ្លួន​លើ​ទំនិញ​អាមេរិក​មក​នៅ​ចន្លោះ​ពី ០% ទៅ ១០%វិញ។

ការស្នើសុំនេះកើតឡើង ក្រោយប្រធានាធិបតីអាមេរិកលោក ដូណាល់ ត្រាំ រៀបចំដាក់ពន្ធថ្មីពី ២៥ ទៅ ៤​០% លើប្រទេសចំនួន១៤ រួមទាំងសមាជិកអាស៊ានចំនួន ០៦ ដែលនឹងចាប់ផ្តើមពីថ្ងៃទី១ខែសីហាខាងមុខ។ ក្នុង​ចំណោមប្រទេសសមាជិកអាស៊ានមានតែប្រទេសវៀតណាមប៉ុណ្ណោះដែលបានធានាកិច្ចព្រមព្រៀងកាត់បន្ថយពន្ធគយ​​របស់ខ្លួន ខណៈប្រទេសមីយ៉ាន់ម៉ានិងប្រទេសឡាវស្ថិតក្នុងចំណោមប្រទេសដែលជាប់ពន្ធខ្ពស់ជាងគេ។

ឧត្តមសេនីយ មីន អ៊ុងឡាំងក៏បានសម្តែងនូវឆន្ទៈក្នុងការបញ្ជូនក្រុមចរចាទៅកាន់ទីក្រុងវ៉ាស៊ីនតោនផងដែរ ដែលជាសញ្ញាបង្ហាញពីការបើកចំហរបស់ប្រទេសមីយ៉ាន់ម៉ាក្នុងការចរចាដោយផ្ទាល់ជាមួយរដ្ឋាភិបាលសហរដ្ឋអាមេរិក។

ប្រព័ន្ធផ្សព្វផ្សាយរដ្ឋមីយ៉ាន់ម៉ាបានគូសបញ្ជាក់ពីការសរសើររបស់លោក មីន អ៊ុងឡាំង ចំពោះប្រធានាធិបតី ត្រាំដោយបានដកស្រង់ថាលោក មីន អ៊ុងឡាំង បានទទួលស្គាល់ «ភាពជាអ្នកដឹកនាំដ៏រឹងមាំ» និងស្នេហាជាតិរបស់ ត្រាំ ក្នុងការស្វែងរកភាពរុងរឿងរបស់អាមេរិក។

គួរកត់សម្គាល់ថាចំណាត់ការនេះកើតឡើងចំពេលដែលមីយ៉ាន់ម៉ាបន្តស្វែងរកការចូលរួមផ្នែកសេដ្ឋកិច្ច បើទោះបីជាប្រឈមមុខនឹងសម្ពាធអន្តរជាតិជុំវិញស្ថានភាពនយោបាយក្នុងស្រុករបស់ខ្លួនក៏ដោយ៕

អត្ថបទ៖ ប៊ុន សុភាព