ព័ត៌មានអន្ដរជាតិ

ត្រាំ បញ្ជាក់ពីចំនួនខែលអាកាស Patriot ដែលឲ្យទៅអ៊ុយក្រែន

បានផុស

៥៥ នាទីutes មុន

នៅ

ថ្ងៃអង្គារ ១៥ កក្កដា ២០២៥

ដោយ

Chheang

លោកប្រធានាធិបតី ដូណាល់ ត្រាំ បានប្រកាសកាលពីថ្ងៃទី១៤ខែកក្កដាថា សហរដ្ឋអាមេរិកនឹងផ្តល់ប្រព័ន្ធមីស៊ីលការពារដែនអាកាស Patriot ចំនួន ១៧គ្រឿងទៅកាន់ប្រទេសអ៊ុយក្រែន ដើម្បីការពារពីការកើនឡើងនៃការវាយប្រហារដោយមីស៊ីល និងយន្តហោះគ្មានមនុស្សបើករបស់រុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសនេះ បានធ្វើឡើងក្នុងសន្និសីទសារព័ត៌មានរួមគ្នាជាមួយអគ្គលេខាធិការអង្គការណាតូ លោក ម៉ាក រូតេ ដែលលោក ត្រាំ បានសង្កត់ធ្ងន់លើភាពបន្ទាន់នៃការពង្រឹងសមត្ថភាពការពារដែនអាកាសរបស់អ៊ុយក្រែន ចំពេលមានការឈ្លានពានពីរុស្ស៊ីកាន់តែខ្លាំង។ គ្រាន់តែក្នុងខែមិថុនាឆ្នាំនេះ ទីក្រុងមូស្គូបានបាញ់មីស៊ីលចំនួន ៣៣០គ្រាប់ និងយន្តហោះគ្មានមនុស្សបើកចំនួន ៥ ០០០គ្រឿងលើអ៊ុយក្រែន ដែលបណ្ដាលឲ្យជនស៊ីវិលស្លាប់ចំនួន ២៣២នាក់ និងរបួស ១ ៣៤៣នាក់ ដែលជាចំនួនអ្នកស្លាប់ប្រចាំខែខ្ពស់បំផុតក្នុងរយៈពេល ៣ឆ្នាំកន្លងមកនេះ។

លោក ត្រាំ បានបញ្ជាក់យ៉ាងច្បាស់ថា ប្រព័ន្ធ Patriot នឹងត្រូវបានផ្តល់ជូនក្រោមក្របខណ្ឌដែលគាំទ្រដោយអង្គការណាតូ ដែលសម្ព័ន្ធមិត្តអឺរ៉ុបនឹងផ្តល់មូលនិធិពេញ១០០% ជាសំណងដល់សហរដ្ឋអាមេរិកវិញសម្រាប់ការចំណាយពាក់ព័ន្ធទាំងអស់។

ប្រព័ន្ធការពារអាកាសទាំងនេះ កំពុងត្រូវបានរៀបចំរួចហើយសម្រាប់ការដឹកជញ្ជូនយ៉ាងឆាប់រហ័ស ដោយមានការរំពឹងទុកខ្លះថានឹងទៅដល់អ៊ុយក្រែនក្នុងរយៈពេលប៉ុន្មានថ្ងៃទៀត។

ទន្ទឹមនោះ លោក ត្រាំ ក៏ប្រកាសប្រើធម៌ក្តៅដាក់រុស្ស៊ីផងដែរ ដោយគំរាមថា លោកទុកពេលឲ្យមេដឹកនាំវិមានក្រឹមឡាំង វ្ល៉ាឌីមៀរ ពូទីន ៥០ថ្ងៃដើម្បីឈានដល់កិច្ចព្រមព្រៀងបញ្ចប់សង្គ្រាម បើមិនដូច្នោះទេ រដ្ឋាភិបាលទីក្រុងវ៉ាស៊ីនតោន នឹងដាក់ពន្ធ១០០%លើទីក្រុងមូស្គូនិងពន្ធបន្ទាប់បន្សុំ ហើយបញ្ជូនសព្វាវុធកាន់តែច្រើនទៅឲ្យទីក្រុងកៀវ៕