ព័ត៌មានជាតិ

ចុងឆ្នាំនេះ ក្រុមហ៊ុនអាកាសចរណ៍ ៤ ទៀត ភ្ជាប់ការហោះហើរមកអាកាសយានដ្ឋានសៀមរាបអង្គរ

បានផុស

៩ ខែ មុន

នៅ

ថ្ងៃសុក្រ ១៨ កក្កដា ២០២៥

ដោយ

បើតាមប្រភពពីមន្រ្តីបម្រើការនៅអាកាសយានដ្ឋានសៀមរាបអង្គរបានបញ្ជាក់ដល់កម្ពុជាថ្មីថា នៅចុងឆ្នាំ ២០២៥ នេះ នឹងមានក្រុមហ៊ុនអាកាសចរណ៍ចំនួន ៤ ទៀត នឹងតភ្ជាប់ជើងហោះហើរមកអាកាសយានដ្ឋានសៀមរាបអង្គរ។

លោក ពេជ្រ សុប៉ុនតារា មន្រ្តីទទួលបន្ទុកអភិវឌ្ឍន៍ការហោះហើរ នៃអាកាសយានដ្ឋានអន្តរជាតិសៀមរាប-អង្គរបានឲ្យដឹងថា អាកាសយានដ្ឋានសៀមរាបអង្គរនឹងទទួលបានជើងហោះហើរពីក្រុមហ៊ុនអាកាសចរណ៍ថ្មីចំនួន ៤ ទៀត ដែលគ្រោងតភ្ជាប់មកអាកាសយានដ្ឋានសៀមរាបអង្គរក្នុងខេត្តសៀមរាបនៅចុងឆ្នាំ ២០២៥ នេះ។

ក្រុមហ៊ុនថ្មីបន្តបន្ទាប់ដែលនឹងភ្ជាប់ប្រតិបត្តិការហោះហើរមកអាកាសយានដ្ឋានសៀមរាបអង្គរមាន ក្រុមហ៊ុន Qatar Airways មកពីដូហា ក្រុមហ៊ុន IndiGo មកពីឥណ្ឌា ក្រុមហ៊ុន Eastarjet មកពីសេអ៊ូល ប្រទេសកូរ៉េ និងក្រុមហ៊ុនអាកាសចរណ៍ Firefly មកពីកូឡាឡាំពួ ប្រទេសម៉ាឡេស៊ី។

លោក ពេជ្រ សុប៉ុនតារា បានបន្តថា ក្រុមហ៊ុន Emirate ដែលជាក្រុមហ៊ុនអាកាសចរណ៍លំដាប់ពិភពលោកមានមូលដ្ឋាននៅទីក្រុងឌុយបៃ ក៏ទើបបើកការតភ្ជាប់ជើងហោះហើរជាប្រវត្តិសាស្ត្រមកអាកាសយានដ្ឋានសៀមរាបអង្គរកាលពីខែមិថុនានេះ។

បើតាមប្រភពពីមន្រ្តីនៅអាកាសយានដ្ឋានសៀមរាបអង្គរបានឲ្យដឹងថា ថ្មីៗនេះមានសន្ទុះកើនឡើងការធ្វើដំណើរតាមជើងហោះហើរពីខេត្តសៀមរាបទៅទីក្រុងបាងកក និងពីទីក្រុងបាងកកមកខេត្តសៀមរាប ក្រោយមានការបិទខ្ទប់ព្រំដែនរវាងប្រទេសទាំងពីរ។

ស្របពេលគ្នានេះដែរ ក្រុមហ៊ុនអាកាសចរណ៍ក្នុងស្រុក ក៏កំពុងពង្រីកតភ្ជាប់ជើងហោះហើរទៅកាន់គោលដៅថ្មីៗដែលនឹងរុញកំណើនភ្ញៀវទេសចរធ្វើដំណើរតាមផ្លូវអាកាសមកខេត្តសៀមរាបកាន់តែកើនឡើងថែមទៀត។

របាយការណ៍របស់មន្ទីរទេសចរណ៍ខេត្តសៀមរាបបានបង្ហាញថា ក្នុងឆមាសទី ១ ឆ្នាំ ២០២៥ ខេត្តសៀមរាបទទួលបានភ្ញៀវទេសចរបរទេសកើនឡើងប្រមាណ ៨% បើប្រៀបធៀបរយៈពេលដូចគ្នាក្នុងឆ្នាំ ២០២៤។

ភ្ញៀវទេសចរអន្តរជាតិមកកម្សាន្តខេត្តសៀមរាបមានចំនួន ៥៦៧ ៦៧៣ នាក់ កើនឡើង ៨.៧៦% ខណៈភ្ញៀវទេសចរក្នុងស្រុកក៏មានកំណើនបើប្រៀបធៀបនឹងរយៈពេលដូចគ្នាឆ្នាំ២០២៤៕