បណ្ឌិត ឈត ប៊ុនថង៖ បើគ្រាន់តែគំនិត ទស្សនៈរបស់គេផ្ទុយពីយើង ចូរកុំប្រកាន់ខឹង ឬជេរប្រទេច

អ្នកជំនាញទស្សនវិជ្ជា នៃរាជបណ្ឌិត្យសភាកម្ពុជា លោកបណ្ឌិត ឈត ប៊ុនថង បានលើកឡើងថា៖ “បើគ្រាន់តែគំនិត ទស្សនៈ ឬវិធីរបស់គេខុស ឬផ្ទុយពីយើង ចូរកុំប្រកាន់ខឹង ជេរប្រទេច ឬចោទប្រកាន់គេក្នុងបទអាក្រក់ណាមួយ”។

ការលើកឡើងរបស់លោកបណ្ឌិត តាមរយៈការផុសលើហ្វេសប៊ុកផ្ទាល់ខ្លួនចំនួន ៤ចំណុច នាព្រឹកថ្ងៃទី១៨ ខែកក្កដា ឆ្នាំ២០២៥ ពីការស្វែងយល់ពីខ្លួនឯងឱ្យបានច្រើន ទើបអាចតម្រង់ទិសខ្លួនឯងបានល្អ។

ចំណុចសំខាន់ ៣ទៀត ដែលលោកបណ្ឌិតលើកឡើងដើម្បីតម្រង់ទិសខ្លួនឯងបានល្អគឺ កុំនិយាយទៅតាមអារម្មណ៍ គំនិត កំហឹង ឬជាតិនិយមរបស់ខ្លួន ដោយខ្វះការពិចារណា ខ្វះព័ត៌មានបញ្ជាក់ និងទិន្នន័យជាដើម។ បន្ថែមពីនេះ លោកបណ្ឌិត ឈត ប៊ុនថង ថា រាល់ការចង់បានសន្តិភាព ឬជាការបញ្ចប់ជម្លោះ មិនមែនសុទ្ធតែប្រើប្រាស់មធ្យោបាយហិង្សា ប្រើកម្លាំង ឬសង្គ្រាម ដើម្បីបញ្ចប់ជម្លោះនោះទេ ពោល គឺការប្រើប្រាស់កម្លាំង ឬសង្គ្រាម គឺជាជម្រើសចុងក្រោយគេនៅពេលដែលជម្រើសផ្សេងៗលែងមានប្រសិទ្ធភាព។

ចំណុចចុងក្រោយ លោកថា៖ “ការបោះបង់ ឬការសម្លាប់ទីប្រឹក្សា និងមេទ័ពល្អៗចោលដោយការយល់ច្រឡំ នឹងធ្វើឱ្យខ្លួនយើងចុះខ្សោយ ហើយនឹងបរាជ័យនៅលើសមរភូមិ” ៕