វិសាខា ពង្រីកកីឡដ្ឋានឱ្យទំនើបស្តង់ដា ជាចក្ខុវិស័យត្រៀមធ្វើម្ចាស់ផ្ទះ ពេល​លេងពានអន្តរជាតិ

លោក ហុក សុចិត្រា អគ្គលេខាធិការរបស់ក្លិបាល់ទាត់ វិសាខា បានបង្ហាញពីចក្ខុវិស័យរបស់ក្លិប ដោយខិតខំពង្រីកហេដ្ឋារចនាសម្ព័ន្ធ ជាពិសេសគឺកីឡដ្ឋានតែម្តង ដើម្បីត្រៀមធ្វើជាម្ចាស់ផ្ទះរៀបចំការប្រកួតពានរង្វាន់អន្តរជាតិនាពេលអនាគត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយតបនឹងសំណួររបស់សារព័ត៌មាន «កម្ពុជាថ្មី» ថា តើការខិតខំពង្រីកកីឡដ្ឋានឱ្យទំនើបស្តង់ដា ហើយឥឡូវនេះបានបំពេញកន្លែងអង្គុយដល់ទៅ ៤ ជ្រុង ជាការត្រៀមខ្លួនរបស់ក្លិបក្នុងការលេងពានអន្តរជាតិនាពេលអនាគតមែនឬទេ? លោក ហុក សុចិត្រា មានប្រសាសន៍ថា៖ «នេះវាជាគោលដៅ ជាគោលដៅរបស់លោកជំទាវប្រធាន ដែលលោកដាក់គោលដៅឱ្យក្រុមការងាររបស់យើងធ្វើ ហើយក៏ដាក់គោលដៅឱ្យក្រុមការងាររបស់យើងទាំងអស់គ្នាធ្វើបច្ចុប្បន្នភាព រៀងរាល់ឆ្នាំ។ បានសេចក្តីថា ជាគោលដៅរបស់យើង គឺយើងចង់យកក្លិបរបស់យើងតំណាងឱ្យប្រទេសទៅចូលរួមការប្រកួតលក្ខណៈអន្តរជាតិ»។

បុរសវ័យ ៥១ ឆ្នាំរូបនេះបានបន្តទៀតថា៖ «អ៊ីចឹងមុនពេលយើងទៅចូលរួម ទាល់តែយើងមានហេដ្ឋារចនាសម្ព័ន្ធ យើងមានការអភិវឌ្ឍ យើងមានការរៀបចំបណ្តុះបណ្តាលថ្នាល យុវជនគ្រប់ទាំងអស់។ នេះគឺជាគោលដៅរបស់លោកជំទាវ ដែលលោកបានដាក់មកឱ្យពួកយើងធ្វើ ធ្វើម៉េចដើម្បីឱ្យបានទៅដល់គោលដៅរបស់លោក។ អ៊ីចឹងអ្វី ដែលពួកយើងកំពុងធ្វើរាល់ថ្ងៃនេះ គឺជាការធ្វើដំណើតាមដំណាក់កាលនីមួយៗ រហូតទៅដល់គោលដៅ។ យើងស្វែងរកការប្រកួតអន្តរជាតិមួយលេងតំណាងឱ្យប្រទេស ហើយយើងធ្វើឱ្យការប្រកួតរបស់យើង នៅក្នុងទឹកដីរបស់យើង ដែលអាចប្រើប្រាស់កីឡដ្ឋានផ្ទាល់ខ្លួន សម្រាប់តំណាងការប្រកួតតំណាងឱ្យប្រទេសតែម្តង»។

ទាក់ទងជាមួយនឹងរឿងនេះ លោក ហុក សុចិត្រា បានបញ្ជាក់យ៉ាងច្បាស់អំពីគោលដៅ ក៏ដូចជាចក្ខុវស័យរបស់ក្លិប ដែលទទួលបានអនុសាសន៍ពីប្រធានក្លិបលោកជំទាវ កែ សួនសុភី។ តាមរយៈការខិតខំពង្រីកកីឡដ្ឋានឱ្យស្របតាមស្តង់ដាអន្តរជាតិនេះដែរ គឺក្លិបមានគោលដៅធំ ដើម្បីអាចយកកីឡដ្ឋានផ្ទាល់ខ្លួន រៀបចំធ្វើជាម្ចាស់ផ្ទះ នៅពេលខ្លួនមានឱកាសទទួលបានកៅអីចូលលេងពានអន្តរជាតិណាមួយនាពេលអនាគត។

គួរឱ្យដឹងថា បច្ចុប្បន្ននេះ ក្លិបវិសាខា ត្រូវបានគេចាត់ទុកជាក្លិប ដែលមានហេដ្ឋារចនាសម្ព័ន្ធទំនើបជាងគេបំផុតមួយនៅក្នុងប្រទេស កម្ពុជា។ កាលពីពេលថ្មីៗនេះ ក្លិបទើបតែបានធ្វើពិធីក្រុងពាលី ដើម្បីសុំសេចក្តីសុខក្នុងការសាងកន្លែងអង្គុយមួយខាងទៀតនៅទិសខាងជើង ដើម្បីបង្គ្រប់ឱ្យគ្រប់ចំនួន ៤ ជ្រុង៕

អត្ថបទ៖ សេម កុសល