អ្នកនាំពាក្យក្រសួងការបរទេស បកអាក្រាតថៃលេងល្បិច កំពុងចរចា តែបញ្ជាកងទ័ពបាញ់ផ្លោងមកទីតាំងឈរជើងទ័ពកម្ពុជា

នៅក្នុងសន្និសីទសារព័ត៌មាន ស្តីពីបច្ចុប្បន្នភាពនៃការឈ្លានពានរបស់កងទ័ពថៃមកលើទឹកដីកម្ពុជា ថ្ងៃទី ២៥ ខែកក្កដានេះ លោក ជុំ សុន្ទរី  អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានបកអាក្រាតធាតុពិត និងទង្វើក្រឡេចក្រឡុចរបស់ថៃរឿងចរចាឈប់បាញ់ ប៉ុន្តែបញ្ជាកងទ័ពបាញ់ផ្លោងមកទីតាំងឈរជើងទ័ពកម្ពុជា។

ក្នុងជម្លោះផ្ទុះអាវុធនៅតាមព្រំដែន ជាការពិតនាយករដ្ឋមន្រ្តីកម្ពុជា សម្តេចធិបតី ហ៊ុន ម៉ាណែត បានផ្ញើលិខិតមួយច្បាប់ទៅកាន់ នាយករដ្ឋមន្រ្តី ម៉ាឡេស៊ី ដែលជាប្រធានប្តូរវេនអាស៊ាន ដើម្បីស្នើសុំជួយបញ្ចប់ការឈានពានរបស់ថៃមកលើអធិបតេយ្យភាពកម្ពុជា។ ក្រោយមកនាយករដ្ឋមន្រ្តី ម៉ាឡេស៊ី ក៏បានធ្វើការទំនាក់ទំនងដោយផ្ទាល់ជាមួយនាយករដ្ឋមន្រ្តីកម្ពុជា និងនាយករដ្ឋមន្រ្តីស្តីទីរបស់ថៃ ហើយតាមការសម្របសម្រួល កាលពីយប់ថ្ងៃទី ២៤ កក្កដា គឺពិតជាអាចមានលេចចេញនូវលទ្ធភាពដើម្បីឱ្យប្រទេសទាំងពីរបញ្ចប់នូវប្រយុទ្ធគ្នានៅតាមព្រំដែន។

យ៉ាងណាមិញលោក ជុំ សន្ទរី មានប្រសាសន៍ថា៖«ក៏ប៉ុន្តែជាការគួរឱ្យសោកស្តាយ ក្នុងរយៈពេលប្រហែលជាមួយម៉ោងបន្ទាប់មក ខាងភាគីថៃមានការផ្លាស់ប្តូរជំហរហើយម៉ោង ៦ព្រឹក ថ្ងៃទី ២៥ ខែកក្កដា ភាគីថៃបានចាប់ផ្តើមធ្វើការបាញ់ផ្លោងមកលើទីតាំងឈរជើងរបស់ទាហានកម្ពុជា នេះជាព័ត៌មានពិត»។ មូលហេតុដែលមានការអន្តរាគមន៍របស់នាយករដ្ឋមន្រ្តីម៉ាឡេស៊ី ដើម្បីបញ្ចប់ជម្លោះប៉ុន្តែមិនសម្រេចបានលទ្ធផលនេះ គឺដោយសារភាគីថៃខ្វះឆន្ទៈបញ្ចប់សង្គ្រាម។ លោកថា៖«ការសម្រេចមិនបានលទ្ធផល គឺមិនដោយកម្ពុជាខ្វះឆន្ទៈទទួលយកដំណោះស្រាយនោះទេ ធាតុពិតគឺភាគីថៃបានផ្លាស់ប្តូរជំហរ»។

គួរជម្រាបថា ការផ្ទុះអាវុធនៅតាមព្រំដែន កាលពីថ្ងៃទី ២៤ ខែកក្កដា ឆ្នាំ ២០២៥ បង្កឡើងដោយភាគីថៃមានបំណងឈ្លានពានទឹកដីកម្ពុជា និងចង់កាន់កាប់ប្រាសាទតាមាន់ និងប្រាសាទនានានៅតាមខ្សែបន្ទាត់ព្រំដែន។ ជម្លោះប្រដាប់អាវុធនេះបានឡើងកម្តៅ កំពុងបន្តឈានដល់ថ្ងៃទី២នេះ បណ្តាលឱ្យស្លាប់មនុស្សទាំងសងខាង៕