​កម្ពស់ទឹកទន្លេមេគង្គ​ខេត្ត​ក្រចេះ​ពី​ ២០-២១ ម៉ែត្រ នាំ​ទឹក​ចូល​អាង ដើម្បីរក្សាទឹកទុកធ្វើស្រែប្រាំង

ទឹកជំនន់នៅខេត្តក្រចេះមាន ២ គឺជំនន់ទឹកទន្លេមេគង្គ និងជំនន់ទឹកភ្លៀង។ បច្ចុប្បន្ន ខេត្តក្រចេះកំពុងជួបប្រទះនូវជំនន់ទឹក​ទន្លេមេគង្គ ប៉ុន្តែនៅពុំទានធ្ងន់ធ្ងរនៅឡើយទេ។ នេះបើ​តាមការឱ្យដឹងពីលោក ហេង រតន្ន័ម៉ូន្នីដា ប្រធានមន្ទីរធនធានទឹក និងឧតុនិយមខេត្តក្រចេះ។

លោកប្រធានមន្ទីរធនធានទឹកខេត្តបានបន្តថា នៅថ្ងៃទី០១ ខែសីហា ឆ្នាំ២០២៥នេះ កម្ពស់ទឹកទន្លេមេគង្គ ២០.៧៤ម៉ែត្រ បើធៀបនឹងថ្ងៃខែដូចគ្នាឆ្នាំ២០២៤ កម្ពស់ទឹក ១៨.៧០ ម៉ែត្រ ឃើញថា ឆ្នាំនេះទឹកខ្ពស់ជាងឆ្នាំមុន ២.០៤ម៉ែត្រ។

លោកបានបញ្ជាក់ថា កម្ពស់ទឹក ២០.៧០ ម៉ែត្រនេះ ជាកម្ពស់ទឹកមួយល្អសម្រាប់ខេត្តក្រចេះ ដែលនៅជាប់ដងទន្លេមេគង្គ ដោយសារខេត្តត្រូវការទឹកចូលអាង ដើម្បីរក្សាស្តុបទឹកទុកធ្វើស្រែប្រាំងស្រែប្រដេញទឹក។

ពាក់ព័ន្ធនឹងការលិចលង់ស្រូវរបស់កសិករ​ លោកប្រធានមន្ទីរធនធានទឹកខេត្ត​បានឆ្លើយតប​ថា ដោយសារ​ប្រជាពលរដ្ឋធ្វើជាលើកទី ៣ ដូច្នេះស្រូវលើកទី៣ និងដំណាំនៅបាតអាង គឺប្រមូលផលអត់ទាន់ទេ ហើយអាជ្ញាធរដែនដីក៏បានផ្សព្វផ្សាយ​​ណែនាំជូនប្រជាពលរដ្ឋហើយដែរ ធ្វើស្រែបានតែ ២ ដង ប៉ុណ្ណោះ ក្នុង១ឆ្នាំ។ ប៉ុន្តែទោះជាយ៉ាងណាអត់មានបញ្ហាអ្វីចោទទេ ដោយសារប្រជាពលរដ្ឋបានប្រមូលផល ទោះបីជាស្រូវសើមក៏មានឈ្មួញចាំទិញផងដែរ។

តាមការព្យាករណ៍របស់ក្រសួងធនធានទឹក និងការសង្កេតផ្ទាល់នៅមូលដ្ឋាន កម្ពស់ទឹកទន្លេមេគង្គឆ្នាំ២០២៥ គឺប្រហាក់ប្រហែលនឹងឆ្នាំ២០២៤ ព្រោះឆ្នាំ២០២៤ អតិបរមា ២១.៦៤ ម៉ែត្រ នៅថ្ងៃទី២៥ ខែកញ្ញា។ ឥឡូវនេះកម្ពស់ទឹកទើបតែ ២០.៧៤ម៉ែត្រ នៅសល់ប្រហែលជា ១ ម៉ែត្រទៀត សម្រាប់ខេត្តក្រចេះ កម្ពស់ទឹក ២០ ទៅ ២១ម៉ែត្រ គឺកម្ពស់ទឹកល្អ ប៉ុន្តែ​ចាប់ពី ២២ ទៅ ២៣ម៉ែត្រ គឺជាកម្ពស់ទឹកប្រកាសអាសន្ន៕

អត្ថបទ ប្រុញ វិធិន