ព្រោះ​មនុស្ស​ស្លាប់​ច្រើន​ពេក ហ្គាហ្សាកំពុង​រង​វិបត្តិខ្វះ​ក្រណាត់​រុំ​សាកសព

នៅពេលដែលវិបត្តិមនុស្សធម៌កាន់​ធ្ងន់​ធ្ងរ​ខ្លាំង​មែន​ទែន​​នៅតំបន់ហ្គាហ្សាស្ទ្រីប ប្រជាជន​នៅ​ទីនោះ​កំពុងប្រឈមមុខនឹងការពិតដ៏ឈឺចាប់នៃការបញ្ចុះសពមនុស្សជាទីស្រឡាញ់របស់ពួកគេ ដោយមិនមានក្រណាត់​រុំ​សាកសព​តាមបែបប្រពៃណីអ៊ីស្លាម។

ជាមួយនឹងចំនួនអ្នកស្លាប់ឥឡូវនេះលើសពី ៦០ ០០០​នាក់ចាប់តាំងពីថ្ងៃទី​៧​ខែតុលាឆ្នាំ​២០២៣ ការផ្គត់ផ្គង់ក្រណាត់​ពណ៌សដែលត្រូវបានគេស្គាល់នៅក្នុងសាសនាអ៊ីស្លាមថា kafan បានជិតអស់​ទៅ​ហើយ។ ក្រណាត់​​រុំ​ទាំងនេះ ដែលជានិមិត្តរូបនៃភាពបរិសុទ្ធ ការគោរព និងសមភាពក្នុងការស្លាប់ ប៉ុន្តែ​ឥឡូវ​​ត្រូវបានជំនួស​ដោយភួយ ថង់ប្លាស្ទិក កម្រាលពូកមន្ទីរពេទ្យ និងសូម្បីតែវាំងននបង្អួច។

នៅមន្ទីរពេទ្យ Al Shifa នៃ​ទីក្រុង​ហ្គាហ្សា បុគ្គលិកពេទ្យ និងក្រុមគ្រួសារសព ត្រូវបានបង្ខំ​ឲ្យ​រុំអ្នកស្លាប់នៅក្នុងសម្ភារៈអ្វីក៏ដោយ​ឲ្យ​តែ​​មាន។ កាលពីថ្ងៃទី​៣​ខែសីហា មនុស្សយ៉ាងហោចណាស់ ១៣​នាក់ត្រូវបានសម្លាប់ដោយការបាញ់ប្រហាររបស់យោធាអ៊ីស្រាអែលនៅជិតច្រកព្រំដែន Zikim ខណៈពេលដែលកំពុងរង់ចាំជំនួយមនុស្សធម៌។ សាកសពរបស់ពួកគេ ដូចជាអ្នកផ្សេងទៀតជាច្រើន ត្រូវបានរុំ​ដោយ​ពុំ​មាន​ក្រណាត់​ស​នោះ​ឡើយ។

លោក Bilal Thari អាយុ ៤០​ឆ្នាំដែលបានមកដល់មន្ទីរពេទ្យដើម្បីទទួល​យក​សាកសពរបស់សាច់ញាតិ បាននិយាយថា «យើងមិនចង់បានសង្រ្គាមទេ។ យើងគ្រាន់តែចង់បានសន្តិភាព និងការបញ្ចប់នៃការឈឺចាប់នេះ។ យើងគ្មានអ្វីនៅសេស​សល់ក្នុងជីវិតនេះឡើយ»។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) រាយការណ៍អំពីអំពើហិង្សាដែល​នៅតែបន្ត និងស្ថានភាពមនុស្សធម៌កាន់តែអាក្រក់ទៅៗ។ នៅ​ថ្ងៃទី​៤​ខែសីហា ជនជាតិប៉ាឡេស្ទីន ៤០​នាក់បានស្លាប់ ខ្លះពីការវាយប្រហារតាមអាកាសរបស់អ៊ីស្រាអែល ខ្លះទៀតពីការអត់ឃ្លាន និងខ្លះទៀតកំពុងព្យាយាមទៅដល់មជ្ឈមណ្ឌលចែកចាយអាហារ។

ចាប់តាំងពីខែឧសភាមក មនុស្សជាង ១ ០០០​នាក់ត្រូវបានគេរាយការណ៍ថាបាត់បង់​ជីវិត​នៅក្បែរក្បួនរថយន្តជំនួយមនុស្សធម៌ ដែលភាគច្រើនដោយសារតែការបាញ់កាំភ្លើង។ ខណៈពេលដែលអាជ្ញាធរសុខាភិបាលក្នុងតំបន់​បន្ទោសយោធាអ៊ីស្រាអែល មូលនិធិមនុស្សធម៌​ហ្គាហ្សាដែលគាំទ្រដោយសហរដ្ឋអាមេរិក និងអ៊ីស្រាអែល (GHF) បានបដិសេធថា ប្រតិបត្តិការរបស់ខ្លួន​មិន​ត្រូវបានកំណត់គោលដៅ​អ្វី​ទេ ដោយអះអាងថា មិនមានឧបទ្ទវហេតុណាមួយកើតឡើងនៅជិតចំណុចចែកចាយ​ជំនួយ​របស់ខ្លួន​ឡើយ។

វិបត្តិជំនួយនៅតែធ្ងន់ធ្ងរ។ ទីភ្នាក់ងារជំនួយរបស់អ៊ីស្រាអ៊ែល COGAT និយាយថា ខ្លួនបានបើក​ឲ្យ​រថយន្តជំនួយជាង ១ ២០០​គ្រឿង​ចូល​ហ្គាហ្សា​កាលពីសប្តាហ៍មុន ប៉ុន្តែអង្គការសហប្រជាជាតិនិយាយថា មានតែរថយន្តដឹកទំនិញប្រហែល ៦០០​គ្រឿងប៉ុណ្ណោះដែលបានចូលទៅក្នុងហ្គាហ្សា។

យោងតាមអង្គការសហប្រជាជាតិ ហ្គាហ្សាត្រូវការរថយន្តជំនួយចំនួន ៦០០​គ្រឿងក្នុងមួយថ្ងៃៗ ដើម្បីបំពេញតម្រូវការមនុស្សធម៌អប្បបរមា ខណៈ​ប្រជាជនប៉ាឡេស្ទីនរាប់សែននាក់​កំពុង​ស្ថិតក្នុងភាព​អស់សង្ឃឹម ដោយគ្មានអាហារគ្រប់គ្រាន់ ថ្នាំពេទ្យ ទឹកស្អាត ឬសូម្បីតែសេចក្តីថ្លៃថ្នូរនៃពិធីបញ្ចុះសព​ដ៏​ត្រឹមត្រូវមួយ៕

ដោយ៖ ឈាង