សេដ្ឋកិច្ច

អ្នកនាំពាក្យលើកមូលហេតុចម្បង ៣ ដែលក្រសួងត្រូវរៀបចំចងក្រងជាសហគមន៍កសិកម្មទំនើប

បានផុស

១០ ខែ មុន

នៅ

ថ្ងៃចន្ទ ២៥ សីហា ២០២៥

ដោយ

អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ឃឹម ហ្វីណង់ បានលើកឡើងពីមូលហេតុចម្បងចំនួន ៣ ដែលក្រសួងចាំចាប់ដុតដៃដុតជើងត្រូវរៀបចំឱ្យមានជាសហគមន៍កសិកម្មទំនើប ស្របពេលដែលកំពុងមានបញ្ហាថ្លៃស្រូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកហ្វីណង់ បានលើកឡើងថា ជុំវិញការចងក្រងឱ្យមានជាសហគមន៍កសិកម្មទំនើប នៅតែមានអ្នកសួរថា ហេតុអ្វីបានជាផ្ដោតយកចិត្តទុកដាក់តែលើការងារសហគមន៍ ស្របពេលដែលកំពុងមានបញ្ហាថ្លៃស្រូវ?

ឆ្លើយតមទៅនិងការចោទសួរនេះដែរ លោក ឃឹម ហ្វីណង់ បានគូសបញ្ជាក់មូលហេតុចម្បង ៣ រួមមាន៖

១.សហគមន៍កសិកម្មទំនើប គឺជាដំណោះស្រាយ មិនមែនជាការងារដាច់ដោយឡែកទេ ទោះបីមិនអាចដោះស្រាយបានភ្លាមៗ ក៏គង់ជួយដោះស្រាយក្នុងរដូវកាលក្រោយៗទៀតបានដែរ។ សហគមន៍កសិកម្មទំនើប គឺជាជម្រើសប្រសើរបំផុត ដែលអាចការពារប្រជាកសិករពីបញ្ហាវិបត្តិថ្លៃដូចពេលបច្ចុប្បន្ន និងអនុញ្ញាតឱ្យរាជរដ្ឋាភិបាលមានលទ្ធភាពជួយស្ដារសមត្ថភាពផលិតកម្មឡើងវិញ តាមរយៈការផ្តល់កម្ចីការប្រាក់ទាបដើម្បីទ្រទ្រង់ជាដើមទុន និងការជួយកាត់បន្ថយថ្លៃដើម។

២.សហគមន៍កសិកម្មទំនើប គឺជាការងារដែលលោកទទួលបន្ទុកផ្ទាល់ តែមន្ត្រីដទៃទៀតរបស់ក្រសួង រាប់តាំងពីថ្នាក់ជាតិដល់ថ្នាក់ក្រោមជាតិ កំពុងតែនៅឱ្យជួយសម្របសម្រួលទីផ្សារ និងស្វែងរកមធ្យោបាយដឹកជញ្ជូនឱ្យទាន់ពេលវេលា ដើម្បីបញ្ចៀសការកកស្ទះការប្រមូលផលរបស់ប្រជាកសិករនៅតាមទីវាល មិនថាក្នុងម៉ោង ឬក្រៅម៉ោងធ្វើការទេ។

៣.រដូវកាលដាំដុះថ្មីនៅសល់តែមួយខែពីរខែទៀតប៉ុណ្ណោះ បើមិនរៀបចំសហគមន៍ពីឥឡូវទេ ការងារនេះនឹងយឺតពេលហើយ ព្រោះសហគមន៍កសិកម្មទំនើបត្រូវត្រៀម កសិករអ្នកធ្វើ ទីផ្សារអ្នកទិញ ធនាគារអ្នកផ្តល់កម្ចីដើមទុន និងការកក់ធាតុចូលសំខាន់ៗដូចជាពូជ-ជី-ថ្នាំទុកជាមុន។

កសិករដែលបានចូលរួមក្នុងសហគមន៍កសិកម្មទំនើបក្នុងរដូវកាលនេះ មិនបានជួបបញ្ហាធ្លាក់ថ្លៃដូចអ្នកនៅក្រៅសហគមន៍ឡើយ ដោយក្នុងនោះស្រូវសែនក្រអូប ទទួលបានតម្លៃ ១២៥០៛ ក្នុងមួយគីឡូក្រាម ស្រូវស្រង៉ែស្រាល ទទួលបានតម្លៃ ៩៥០៛ ក្នុងមួយគីឡូក្រាម និងប្រភេទស្រូវ អូអឹម៤៩០០ តម្លៃ ១០០០៛ ក្នុងមួយគីឡូក្រាម។

លោក ឃឹម ហ្វីណង់ បានអះអាងថា មូលហេតុនេះហើយបានជាក្រុមការងារខំប្រឹងដុតដៃដុតជើងរៀបចំសហគមន៍កសិកម្មទំនើបឱ្យបានច្រើន និងបានលឿន។

សូមជម្រាបថា បើគិតពីចំនួនសហគមន៍កសិកម្ម និងសហគមន៍កសិកម្មទំនើបទាំងអស់នៅប្រទេសកម្ពុជា គិតត្រឹមខែមិថុនា ឆ្នាំ២០២៥ នេះ មានចំនួនសរុបប្រមាណ ១ ៤៣០សហគមន៍ ដែលមានកសិករសរុបចំនួន ១៩៣ ៨៨៩ នាក់ ដែលក្នុងនោះ មានសមាជិកនារីចំនួន ១១៤ ០៣០ នាក់ និងមានដើមទុនសរុបចំនួនប្រមាណ ១០៦ ៨៦៩ ០៤៤ ៨៩៥ រៀល៕

ដោយ៖ ឌិន ថារី

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា