ថៃ ទម្លាយទឹកពីទំនប់ចៅប្រាយ៉ា បង្កការជន់លិចខេត្តអយុធ្យា ធ្ងន់ធ្ងរ ខ្ទេចផលដំណាំរាប់រយហិកតា

ការទម្លាយទឹកពីទំនប់ចៅប្រាយ៉ា បានបង្កជាជំនន់លិចលង់ខេត្តអយុធ្យា បំផ្លាញផលដំណាំរាប់រយហិកតា ធ្វើឲ្យពលរដ្ឋរងទុក្ខលំបាក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Khaosod នៅថ្ងៃសៅរ៍ទី៦ខែកញ្ញាឆ្នាំ២០២៥, ប្រជាកសិករថៃ កំពុងទួញសោក ដោយសារតែទំនប់ចៅប្រាយ៉ា បញ្ចេញទឹក ១ ៥០០គីឡូម៉ែត្រគូបក្នុងមួយវិនាទី។

ការបញ្ចេញទឹកនេះ គឺដើម្បីបញ្ចៀសការធ្លាយទំនប់ ព្រោះតែអាងនេះស្តុកទឹកដល់កម្រិត ហើយស្របពេលដែលភ្លៀងធ្លាក់នៅតែបន្តមិនឈប់ ទើបវាបង្កហានិភ័យបាក់។

ទោះបីជាយ៉ាងណាក៏ដោយ លទ្ធផលនៃការទម្លាយទឹកនេះ បង្កជាជំនន់លិចលង់ធ្ងន់ធ្ងរក្នុងខេត្តអយុធ្យា​ ដោយតំបន់ខ្លះត្រូវទឹកលិចត្រឹមចង្កេះ បំផ្លាញផលដំណាំរបស់កសិករជាពិសេសក្នុងស្រុក Bang Ban។

មុននេះនាយកដ្ឋានធារាសាស្រ្តថៃ បានចេញការព្រមានរួចទៅហើយ ឲ្យខេត្តចំនួន១០រួមទាំងទីក្រុងបាងកកផងដែរ ត្រូវប្រយ័ត្ននិងត្រៀមខ្លួនឲ្យហើយព្រោះថា ស្ថានភាពទំនប់ចៅប្រាយ៉ា កាន់តែមិនស្រួលដោយសារទឹកហូរបុកខ្លាំង ហើយការបញ្ចេញទឹកពីទំនប់នេះបន្ថែមទៀត ក៏អាចបង្កជាជំនន់ផងដែរ។

ដោយសារតែឥទ្ធិពលនៃព្យុះជាបន្តបន្ទាប់វាយប្រហារប្រទេសថៃ បានបណ្តាលឲ្យមានភ្លៀងធ្លាក់ខ្លាំងធ្វើឲ្យទឹកនៅក្នុងអាងនេះ ឡើងហូរហៀជិតដល់កម្រិតទប់ទល់លែងបាន ត្រូវបង្ខំចិត្តបញ្ចេញទឹកបន្ថែម បើមិនដូច្នេះទេនឹងត្រូវប្រឈមហានិភ័យបាក់ធ្លាយទំនប់។

ដូច្នេះហើយ ការបញ្ចេញទឹកច្បាស់ជាប៉ះពាល់ធ្ងន់ធ្ងរដល់ខេត្តចំនួន១០ដូចជា៖ Uthai Thani, Chai Nat, Sing Buri, Ang Thong, Suphan Buri, Ayutthaya, Lop Buri, Pathum Thani, Nonthaburi និង Samut Prakan រួមទាំងរាជធានី បាងកកផងដែរ៕

អត្ថបទ៖ សុខ សុវណ្ណ

ចុចអាន៖ ថៃ ព្រមាន ១០ខេត្តរួមទាំង បាងកក ត្រូវត្រៀមខ្លួនឲ្យហើយ ព្រោះទំនប់ចៅប្រាយ៉ា កាន់តែមិនស្រួល