ព័ត៌មានអន្ដរជាតិ

ត្រាំ ជំរុញ EU ឱ្យដាក់ពន្ធ ១០០% លើចិន ឥណ្ឌា ដើម្បីបង្ខំឱ្យរុស្ស៊ីបញ្ចប់សង្រ្គាមនៅអ៊ុយក្រែន

បានផុស

១០ ខែ មុន

នៅ

ថ្ងៃពុធ ១០ កញ្ញា ២០២៥

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃអង្គារ បានជំរុញឱ្យមន្ត្រីសហភាពអឺរ៉ុប (EU) ដាក់ពន្ធលើចិន និងឥណ្ឌា រហូតដល់ ១០០ ភាគរយ ដើម្បីជាផ្នែកមួយនៃយុទ្ធសាស្រ្តបង្ខំឱ្យរុស្ស៊ីបញ្ចប់សង្រ្គាមឈ្លានពានអ៊ុយក្រែន។ នេះបើតាមការឱ្យដឹងពីប្រភពមន្រ្តីអាមេរិក និងការទូត EU។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់សារព័ត៌មានរ៉យទ័រ បានផ្សាយថា លោក ត្រាំ បានស្នើបែបនេះតាមរយៈកិច្ចប្រជុំតាមអនឡាញជាមួយប្រេសិតទទួលបន្ទុកការដាក់ទណ្ឌកម្មរបស់ EU លោក David O’Sullivan និងមន្ត្រី EU ផ្សេងៗទៀត។ ឥឡូវនេះ គណៈប្រតិភូ EU កំពុងនៅទីក្រុងវ៉ាស៊ីនតោន ដើម្បីពិភាក្សាអំពីការសម្របសម្រួលទណ្ឌកម្ម។

ប្រភពការទូត EU បាននិយាយថា សហរដ្ឋអាមេរិកមានឆន្ទៈក្នុងការដំឡើងពន្ធស្រដៀងគ្នា ប្រសិនបើ EU នឹងធ្វើតាមសំណើរបស់ខ្លួន។ ប្រភពនិយាយយ៉ាងដូច្នេះថា៖ «មែនទែនទៅ ពួកគេ(អាមេរិក) និយាយថា ពួកយើងនឹងធ្វើវា ប៉ុន្តែអ្នកត្រូវតែចូលរួមធ្វើជាមួយយើងដែរ»។

គេមើលឃើញថា ការជំរុញរបស់ ត្រាំ ប្រសិនបើធ្វើតាមនោះ នោះនឹងទៅរកការផ្លាស់ប្ដូរយុទ្ធសាស្ត្រសម្រាប់ EU ដែលមានចេតនាផ្ដាច់រុស្ស៊ីឱ្យនៅឯកោជាមួយនឹងទណ្ឌកម្ម ជាជាងការដាក់ពន្ធ។ កន្លងមក លោក ត្រាំ បានគំរាមកំហែងជាញឹកញាប់ថានឹងដាក់ពន្ធលើឥណ្ឌា និងចិន ចំពោះការទិញប្រេងរុស្ស៊ី។ លោកបានដំឡើងពន្ធលើឥណ្ឌា រហូតដល់ ៥០ ភាគរយ រួចហើយ ខណៈសង្រ្គាមពាណិជ្ជកម្មជាមួយចិនបានធ្លាក់ចូលជ្រោះនៃភាពស្មុគស្មាញដោយសារតែពន្ធគយបដិការ។

ចិន និងឥណ្ឌា គឺជាអតិថិជនប្រេងរុស្ស៊ីដ៏សំខាន់។ បែបនេះ ប្រទេសទាំង២ ដើរតួនាទីយ៉ាងសំខាន់ក្នុងការរក្សាសេដ្ឋកិច្ចរបស់រុស្ស៊ីឱ្យស្ថិតស្ថេរ ចំពេលបន្តសង្រ្គាមឈ្លានពានអ៊ុយក្រែន ដែលផ្ទុះឡើងទ្រង់ទ្រាយធំនៅខែកុម្ភៈ ឆ្នាំ ២០២២៕