រដ្ឋមន្ត្រីឧស្សាហកម្ម លើកទឹកចិត្តសហគ្រិនស្ត្រីចាប់ផ្តើមប្រើប្រាស់វត្ថុធាតុដើមក្នុងស្រុក

លោក ហែម វណ្ណឌី រដ្ឋមន្ត្រី​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកទឹកចិត្តសហគ្រិន​ស្ត្រី​ឱ្យ​ចាប់ផ្តើម​ពី​ការផ្លាស់​ប្តូរ​តូចៗ ដូចជា​ពិនិត្យ​តាមដាន​ការ​ប្រើប្រាស់​ថាមពលរបស់រោងចក្រ-សហគ្រាស កាត់​បន្ថយ​សំណល់ និងប្រើប្រាស់វត្ថុធាតុដើមដែលមាននិរន្តរភាព ពិសេស​ពី​ប្រភព និង​ធនធាន​កសិផល​ក្នុង​ស្រុក។

ក្នុង​ទិវាសហគ្រិន​ស្ត្រី​កម្ពុជា​ឆ្នាំ២០២៥ នៅ​ថ្ងៃ​ទី​១១ ខែ​​វិច្ឆិកា នេះ លោក ហែម វណ្ណឌី បាន​មាន​ប្រសាសន៍​ថា ការវិវត្តឆ្ពោះទៅផលិតកម្មកាន់តែបៃតង ខ្សែច្រវាក់ផ្គត់ផ្គង់កាន់តែមានតម្លាភាព និងក្រមសីលធម៌អាជីវកម្ម មិនមែនគ្រាន់តែជានិន្នាការប៉ុណ្ណោះទេ ប៉ុន្តែកំពុងក្លាយជាស្តង់ដារថ្មីសម្រាប់ពាណិជ្ជកម្មសកល។

យោងតាមទិន្នន័យអង្កេតសេដ្ឋកិច្ចកម្ពុជាឆ្នាំ២០២២ ប្រមាណ ៧០% នៃអង្គភាពសេដ្ឋកិច្ចរបស់កម្ពុជា គ្រប់គ្រងដោយស្ត្រី ឬមានស្ត្រីជាម្ចាស់។ ប៉ុន្តែអង្គភាពសេដ្ឋកិច្ចដែលដឹកនាំដោយស្ត្រីទាំងនោះ ភាគច្រើន ប្រតិបត្តិការក្នុងសេដ្ឋកិច្ចក្រៅប្រព័ន្ធ ដែលរឹតត្បិតលទ្ធភាពទទួលសេវាហិរញ្ញវត្ថុផ្លូវការ ជំនួយអភិវឌ្ឍអាជីវកម្ម និងការលើកទឹកចិត្តនានាពីរាជរដ្ឋាភិបាល។

លោក​រដ្ឋមន្ត្រីបានបន្ថែមថា ការផ្លាស់ប្តូរទៅរកផលិតកម្មបៃតងក៏នៅមានបញ្ហាប្រឈមមួយចំនួនផងដែរ។​ វត្ថុធាតុ​ដើម​ដែលមានមេត្រីភាពបរិស្ថាន ថាមពលស្អាត បច្ចេកវិទ្យាបៃតង ឬវិញ្ញាបនបត្របៃតង អាចធ្វើឱ្យថ្លៃដើមផលិតកម្មកើនឡើងចំពោះមុខ ជាពិសេសសម្រាប់សហគ្រាសធុនតូច និងមធ្យមដែលមានដើមទុនតិច។

លោក​រដ្ឋមន្ត្រី​ ក៏​បានលើកទឹកចិត្តសហគ្រិនស្ត្រីឱ្យចាប់ផ្តើមពីការផ្លាស់ប្តូរតូចៗ ដូចជាពិនិត្យ​តាមដាន​ការ​ប្រើប្រាស់​ថាមពលរបស់រោងចក្រ-សហគ្រាស កាត់បន្ថយសំណល់ និងប្រើប្រាស់វត្ថុធាតុដើមដែលមាននិរន្តរភាព ពិសេសពីប្រភពនិងធនធានកសិផលក្នុងស្រុក។

ទិវាសហគ្រិនស្ត្រីកម្ពុជាឆ្នាំ២០២៥ ត្រូវបានរៀបចំឡើងក្រោមប្រធានបទ”ពីទស្សនៈវិស័យទៅជាបេសកកម្ម៖សហគ្រិន​ស្រ្តីជំរុញឆ្ពោះទៅកាន់សេដ្ឋកិច្ចបៃតង”ដោយរំលេចតួនាទីដ៏សំខាន់របស់សហគ្រិនស្ត្រី ក្នុងការជំរុញកំណើនប្រកបដោយចីរភាព និងបរិយាបន្ន៕